Pika (NSS) - အောက်တိုဘာ ၁

မြောက်ကိုရီးယားခေါင်းဆောင်ကင်ဂျုံအန်းဟာ နျူကလီးယားလက်နက်တွေနဲ့တောင်ကိုရီးယားကို တိုက်ခိုက်ခဲ့မယ်ဆိုရင် ကင်ဂျုံအန်းအစိုးရအဆုံးသွားသတ်မယ့် အန္တရာယ်ကိုရင်ဆိုင်ရလိမ့်မယ်လို့ တောင်ကိုရီးယားသမ္မတယွန်ဆက်ယိုလ်က အောက်တိုဘာလ(၁)ရက်နေ့မှာ သတိပေးပြောဆိုခဲ့ပါတယ်။

တောင်ကိုရီးယားစစ်တပ်တည်ထောင်ခြင်း နှစ်ပတ်လည်အထိမ်းအမှတ်အခမ်းအနားမှာ ယွန်ဆက်ယိုလ်က ယခုလိုထုတ်ဖော်ပြောဆိုခဲ့တာလည်းဖြစ်ပါတယ်။ ယွန်ဆက်ယိုလ်က "မြောက်ကိုရီးယားဟာ နျူကလီးယားလက်နက်တွေအသုံးပြုဖို့ ကြိုးပမ်းခဲ့မယ်ဆိုရင် ကျွန်တော်တို့စစ်တပ်ရဲ့ ပြတ်သားတဲ့လက်တုံ့ပြန်မှုတွေကို ရင်ဆိုင်ရပါလိမ့်မယ်။ အဲဒီနေ့က မြောက်ကိုရီးယားခေါင်းဆောင်ကင်ဂျုံအန်းရဲ့အစိုးရ အဆုံးသတ်မယ့်နေ့ပါပဲ"လို့ပြောဆိုခဲ့ပါတယ်။

ဒါ့ပြင် တောင်ကိုရီးယားဟာ မြေအောက်ဘန်ကာတွေကို ဖျက်ဆီးပစ်နိုင်စွမ်းရှိတဲ့ ၎င်းရဲ့အကြီးဆုံးပဲ့ထိန်းဒုံးကျည်ဖြစ်တဲ့ Hyunmoo-5 ကို ပထမဆုံးအကြိမ် ပြသခဲ့တယ်လို့လည်း သိရပါတယ်။ မြောက်ကိုရီးယားအစိုးရဟာ ၎င်းရဲ့ယူရေနီယမ်သန့်စင်တဲ့စက်ရုံရဲ့ ဓာတ်ပုံတွေကို ပထမဆုံးအကြိမ်ထုတ်ပြန်ပြသပြီးနောက် သီတင်းပတ်အနည်းငယ်အကြာမှာ ယွန်ဆက်ယိုလ်ရဲ့ သတိပေးချက်ထွက်ပေါ်လာတာပဲဖြစ်ပါတယ်။ ဒါ့ပြင် မြောက်ကိုရီးယားနိုင်ငံမှာ ယူရေနီယမ်သန့်စင်ဖို့အတွက် နေရာအများအပြားရှိပုံပေါ်တယ်လို့ ကျွမ်းကျင်သူတွေက သုံးသပ်ပြောကြားထားပါတယ်။ ယူရေနီယမ်ဟာ သဘာဝအတိုင်းတည်ရှိနေတဲ့ ရေဒီယိုသတ္တိကြွဒြပ်စင်ဖြစ်ပြီး အများအားဖြင့် နျူကလီးယားလက်နက်တွေမှာ အသုံးပြုတယ်လို့လည်း သိရပါတယ်။မြောက်ကိုရီးယားဟာ လာမည့်နိုဝင်ဘာလမှာကျင်းပမယ့် အမေရိကန်သမ္မတရွေးကောက်ပွဲအပြီးမှာ ၎င်းရဲ့(၇)ကြိမ်မြောက်စမ်းသပ်မှု ဖြစ်လာမယ့် နျူကလီးယားစမ်းသပ်မှုကို လုပ်ဆောင်နိုင်ဖွယ်ရှိနေတယ်လို့ တောင်ကိုရီးယားထောက်လှမ်းရေးအေဂျင်စီက အရာရှိတစ်ဦးက ပြီးခဲ့တဲ့ရက်ပိုင်းမှာ ထုတ်ပြန်ပြောဆိုခဲ့ဖူးပါတယ်။