Pika (NSS) - အောက်တိုဘာ ၁

ရုရှားသမ္မတပူတင်ကဖော်ပြထားသော နျူကလီးယား လက်နက်မူဝါဒဆိုင်ရာပြောင်းလဲမှုက ရုရှားကိုတိုက်ခိုက်မှုတွင်ပါဝင်ခဲ့မည်ဆိုလျှင် နောက် ဆက်တွဲ အကျိုးဆက်များရှိလာမည်ဆိုသည့် အချက်ကို အနောက်အုပ်စုနိုင်ငံများကို အချက်ပြခြင်းမျိုးဖြစ်ကြောင်း ရုရှားအစိုးရက စက်တင်ဘာလ (၂၆)ရက်နေ့တွင် ထုတ်ပြန်ပြောဆိုခဲ့သည်။

ရုရှားနိုင်ငံကို ပုံမှန်အသုံးပြုနေကျ ဒုံးကျည်များဖြင့်တိုက်ခိုက်ခဲ့မည်ဆိုလျှင်ပင် နျူကလီးယားလက်နက်များကို ရုရှားက အသုံးပြုနိုင်ကြောင်း သမ္မတ ပူတင်က စက်တင်ဘာလ(၂၅)ရက်နေ့တွင် ထုတ်ပြန်ပြောဆိုခဲ့သည်။ ထို့ပြင် ရုရှားအပေါ်တိုက်ခိုက်မှုမှန်သမျှကို နျူကလီးယားလက်နက် အသုံးပြုထားသည့် ပူးတွဲတိုက်ခိုက်မှုအဖြစ် ထည့်သွင်းစဉ်းစား သွားမည်ဖြစ်ကြောင်းလည်း သမ္မတပူတင်က ပြောကြားခဲ့သည်။ 

တရားဝင် နျူကလီးယားမူဝါဒကို ပြောင်းလဲရန် ဆုံးဖြတ်ချက်သည် ရုရှားနိုင်ငံအတွင်းရှိ ပစ်မှတ်များကို တိုက်ခိုက်ရန်အတွက် အနောက်အုပ်စုနိုင်ငံများ၏ဒုံးကျည်များကို ယူကရိန်းကိုအသုံး ပြုခွင့် ပေးနိုင်ခြေ ရှိ/မရှိဆိုသည့်အချက်ကို ဆွေးနွေးနေသည့် အမေရိကန်နှင့် ဗြိတိန်တို့အတွက် ရုရှား၏ အဖြေဖြစ်ကြောင်း ပူတင်ကပြောဆိုခဲ့သည်။

နျူကလီးယား ဟန့်တားရေးနယ်ပယ်တွင် ရုရှားနိုင်ငံ၏ အခြေခံမူဝါဒအုတ်မြစ်ဟုခေါ်ဆိုသည့် စာရွက်စာတမ်းကို ပြုပြင်ပြောင်းလဲမှုများလုပ် ဆောင်ခဲ့ကြောင်း ရုရှားအစိုးရပြောရေးဆိုခွင့်ရှိသူ ဒီမစ်ထရီ ပက်စကော့ဗ်ကပြောကြားခဲ့သည်။

အဆိုပါပြောင်းလဲမှုများက အနောက်အုပ်စုသို့ အချက်ပြမှုတစ်ခု ဟုတ်/မဟုတ် ဆိုသည့်မေးခွန်း များကို ဒီမစ်ထရီပက်စကော့ဗ်က ပြန်လည်တုံ့ပြန် ဖြေကြားခဲ့ကြောင်းလည်း သိရသည်။ ဒီမစ်ထရီပက် စကော့ဗ်က “ ဒါဟာ တိကျသေချာတဲ့ အချက်ပြမှု တစ်ခုလို့ယူဆလို့ရပါတယ်။ ကျွန်တော်တို့ နိုင်ငံကို နျူကလီးယားလက်နက်နဲ့တင်မဟုတ်ဘဲ နည်းလမ်း အမျိုးမျိုးတွေနဲ့ တိုက်ခိုက်မှုတွေမှာ ပါဝင်ခဲ့မယ် ဆိုရင် နောက်ဆက်တွဲ အကျိုးဆက်တွေရှိလာနိုင်တယ်ဆိုတာကို အနောက်အုပ်စုနိုင်ငံတွေကို သတိပေးတဲ့ အနေနဲ့ အချက်ပြတာမျိုးပဲဖြစ်ပါတယ်” ဟု ပြောဆိုခဲ့သည်။

ထို့ပြင် ပြုပြင်ပြောင်းလဲထားသော ရုရှား၏ နျူကလီးယားစာရွက် စာတမ်းများကို ထုတ်ပြန်ရန် ရှိ/ မရှိဆိုသည့် ဆုံးဖြတ်ချက်ကို နောက်ပိုင်းတွင်ချမှတ်သွားမည်ဖြစ်ကြောင်း ဒီမစ်ထရီပက်စကော့ဗ်ကပြော ကြားခဲ့သည်။