Pika (NSS) - စက်တင်ဘာ ၂၉

လက်ဘနွန်နိုင်ငံက ဟစ်ဘိုလာလက်နက်ကိုင်အဖွဲ့ခေါင်းဆောင် Hassan Nasrallah ကို လုပ်ကြံသတ်ဖြတ်နိုင်မှုက အရှေ့အလယ်ပိုင်းဒေသမှာ အစ္စရေးရဲ့ တာဝေးပစ်စစ်လက်နက်ပစ္စည်းတွေ မရောက်ရှိနိုင်တဲ့နေရာမရှိဘူးဆိုတာကို ပြသနေတာဖြစ်တယ်လို့ အစ္စရေးဝန်ကြီးချုပ်နေတန်ရာဟုက ဒေသတွင်းပြိုင်ဖက်တွေကို စက်တင်ဘာလ(၂၈)ရက်နေ့မှာ သတိပေးပြောဆိုလိုက်ပါတယ်။

အစ္စရေးတပ်ဖွဲ့တွေဟာ ဘေရွတ်မြို့မှာရှိတဲ့ မြေအောက်ဘန်ကာတစ်ခုကို ဗုံးကြဲတိုက်ခိုက်မှုအတွင်း ဟစ်ဘိုလာလက်နက်ကိုင်အဖွဲ့ရဲ့ခေါင်းဆောင် Hassan Nasrallah ကို လုပ်ကြံသတ်ဖြတ်နိုင်ခဲ့တာလည်းဖြစ်ပါတယ်။Hassan Nasrallah သေဆုံးမှုကို ဟစ်ဘိုလာလက်နက်ကိုင်အဖွဲ့က အတည်ပြုခဲ့တယ်လို့လည်း သိရပါတယ်။ ဒါ့ပြင် ဘယ်လိုခြိမ်းခြောက်မှုမျိုးကိုမဆို အစ္စရေးက လက်တုံ့ပြန်တိုက်ခိုက်သွားမယ်လို့လည်း နေတန်ရာဟုက အီရန်ကို သတိပေးပြောဆိုခဲ့ပါတယ်။ 

နေတန်ရာဟုက "ကျွန်တော်တို့ကို တိုက်ခိုက်တဲ့နိုင်ငံတွေကို ပြန်ပြီးလက် တုံ့ပြန်တိုက်ခိုက်သွားမှာပါ။ အီရန် ဒါမှမဟုတ် အရှေ့အလယ်ပိုင်းဒေသမှာ အစ္စရေးရဲ့တာဝေးပစ်စစ်လက်နက်ပစ္စည်းတွေ မရောက်ရှိနိုင်တဲ့နေရာမရှိဘူးဆိုတာ ဒီနေ့လုပ်ရပ်က သက်သေပါပဲ"လို့ ပြောဆိုခဲ့ပါတယ်။ ဟစ်ဘိုလာလက်နက်ကိုင်အဖွဲ့ခေါင်းဆောင် Hassan Nasrallah ကို အစ္စရေးရဲ့ လုပ်ကြံသတ်ဖြတ်မှုဟာ ဂါဇာကမ်းမြောင်ဒေသမှာရှိတဲ့ ဟားမတ်စ်လက်နက်ကိုင်အဖွဲ့အတွက် နောက်ထပ်သတင်းစကားတစ်ခုဖြစ်တယ်လို့လည်း နေတန်ရာဟုကပြောကြားခဲ့ပါတယ်။ နေတန်ရာဟုက "ဖြစ်ပျက်နေတဲ့ အခြေအနေတွေအားလုံးကို ဟားမတ်စ်လက်နက်ကိုင်အဖွဲ့နိုင်ငံရေးခေါင်းဆောင် ယာယာဆင်ဝါက နားလည်လေလေ ကျွန်တော်တို့ရဲ့ဖမ်းဆီးခံထားရတဲ့ ဓားစာခံတွေ ပြန်လွတ်လာနိုင်ဖို့ အခွင့်အလမ်းတွေ ပိုများလာလေပါပဲ"လို့ ပြောဆိုခဲ့ပါတယ်။

ဒါ့ပြင် အစ္စရေးဟာ လက်ဘနွန်နိုင်ငံတောင်ပိုင်းကို ကျူးကျော်ဝင်ရောက်တိုက်ခိုက်ဖို့ စီစဉ်နေတယ်လို့ ABC သတင်းဌာနရဲ့သတင်းရင်းမြစ်တွေက ရေးသားဖော်ပြထားပါတယ်။ ပြီးခဲ့တဲ့နှစ်အောက်တိုဘာလမှာ အစ္စရေး-ဟားမတ်စ်စစ်ပွဲစတင်ဖြစ်ပွားပြီးနောက်ပိုင်းတည်းက အစ္စရေးနဲ့ လက်ဘနွန်အခြေစိုက် ဟစ်ဘိုလာလက်နက်ကိုင်အဖွဲ့တို့ဟာ ဒရုန်းတွေ၊ ဒုံးကျည်တွေနဲ့ နယ်စပ်ဖြတ်ကျော်တိုက်ခိုက်မှုတွေကို နေ့စဉ်နီးပါးလုပ်ဆောင်ခဲ့ကြတာလည်း ဖြစ်ပါတယ်။ ပြီးခဲ့တဲ့ရက်ပိုင်းက လက်ဘနွန်နိုင်ငံတွင်းမှာ ထောင်နဲ့ချီတဲ့အီလက်ထရွန်းနစ်ပစ္စည်းတွေ  နှစ်ရက်ဆက်တိုက်ပေါက်ကွဲခဲ့ပြီးနောက် တင်းမာမှုတွေ ပိုမိုမြင့်တက်လာခဲ့တာလည်းဖြစ်ပါတယ်။