Pika (NSS) - စက်တင်ဘာ ၂၆

အမေရိကန်အဆိုတော်နှင့်ရုပ်ရှင်သရုပ်ဆောင်လေဒီဂါဂါသည် Joker: Folie A Deux ဇာတ်ကားအတွက် အယ်လ်ဘမ်တစ်ခုကို လာမည့်စက်တင်ဘာလ (၂၇)ရက်နေ့တွင် ထွက်ရှိရန်စီစဉ်ထားကြောင်း သိရသည်။

အသက်(၃၈)နှစ်အရွယ် လေဒီဂါဂါသည် ရုပ်ရှင်သရုပ်ဆောင် Joaquin Phoenix နှင့်အတူ Joker: Folie A Deux ဇာတ်ကားတွင် ပါဝင်သရုပ်ဆောင်ထားပြီး ဟာလီကွင်းဟုခေါ်သည့် သီချင်း(၁၃)ပုဒ်ပါဝင်သော အယ်လ်ဘမ်အသစ်ကို စက်တင်ဘာလ(၂၇)ရက်နေ့တွင် ထွက်ရှိရန်စီစဉ်ထားကြောင်း ထုတ်ပြန်ကြေညာခဲ့သည်။ လေဒီဂါဂါက "Joker: Folie a Deux ဇာတ်ကားအတွက် အယ်လ်ဘမ် Harlequin က စက်တင်ဘာလ(၂၇)ရက်နေ့မှာ ထွက်ရှိမှာပါ"ဟု ပြောဆိုခဲ့သည်။ ထို့ပြင် ၂၀၂၄ ခုနှစ် အောက်တိုဘာလ(၄)ရက်နေ့တွင် စတင်ထွက်ရှိလာမည့် Joker: Folie ‌a Deux ရုပ်ရှင်ဇာတ်ကားတွင် ဟာလီကွင်းဇာတ်ကောင်အဖြစ် သရုပ်ဆောင်ခဲ့သော ၎င်း၏အခန်းကဏ္ဍနှင့်ပတ်သက်ပြီး လုံးဝမတူကွဲပြားမှုများကို တွေ့မြင်ရမည်ဖြစ်ကြောင်းလည်း လေဒီဂါဂါကပြောကြားခဲ့သည်။

လေဒီဂါဂါက "Joker: Folie a Deux ရုပ်ရှင်ဇာတ်ကားမှာ ဟာလီကွင်းအဖြစ် သရုပ်ဆောင်ခဲ့တဲ့ ကျွန်မရဲ့ဗားရှင်းက ဘယ်သူနဲ့မှမတူဘဲ ကိုယ်ပိုင်ဖြစ်ပါတယ်။ ကျွန်မရဲ့ဗားရှင်းက ဒီရုပ်ရှင်၊ ဒီဇာတ်ကောင်အတွက် လုံးဝကိုက်ညီပါတယ်။ ဒီဇာတ်ကားကို လူတိုင်းရုပ်ရှင်ရုံမှာ သွားရောက်ကြည့်ရှုခံစားသင့်တယ်လို ကျွန်မထင်ပါတယ်"ဟု ပြောဆိုခဲ့သည်။ အဆိုပါဇာတ် ကားသည် ၎င်း၏ပေါ့ပ်စတားအရည်အချင်းများကို အကောင်းဆုံးအသုံးချထားခြင်းအားပြသမည့် ဇာတ်ကားတစ်ခုဖြစ်ကြောင်း လေဒီဂါဂါက ပြောဆိုခဲ့သည်။ လေဒီဂါဂါက "ဒီဇာတ်ကားမှာ သီချင်း၊ ကတာတွေနဲ့ အံ့ဩစရာကောင်းတဲ့ သရုပ်ဆောင်မှုတွေပါဝင်ပါတယ်။ ဒီဇာတ်ကားထဲမှာ ပါဝင်သရုပ်ဆောင်တဲ့အချိန်အတွင်း လုပ်ခဲ့တဲ့အရာတွေအားလုံးကို ကျွန်မအရင်ကတစ်ခါမှမလုပ်ခဲ့ဖူးပါဘူး။ ဒါကြောင့် ကျွန်မရဲ့ အခန်းကဏ္ဍကလုံးဝအသစ် စက်စက်ဖြစ်ပြီး အရမ်းပျော်ဖို့ကောင်းတာကို တွေ့ရပါလိမ့်မယ်"ဟုပြောဆိုခဲ့ဖူးသည်။