Pika (NSS) - စက်တင်ဘာ ၂၃ 

အမေရိကန်နိုင်ငံ အလာဘားမားပြည်နယ်မှာ သေနတ်သမား အများအပြားပါဝင်တဲ့ အစုလိုက်အပြုံလိုက်ပစ်ခတ်မှု တစ်ခုဖြစ်ပွားခဲ့ရာ အနည်းဆုံးလူ(၄)ဦးသေဆုံးခဲ့ပြီး အခြားလူဒါဇင်ချီထိခိုက်ဒဏ်ရာရရှိခဲ့တယ်လို့ ရဲတပ်ဖွဲ့က စက်တင်ဘာလ(၂၁)ရက်မှာ ထုတ်ပြန်ပြောကြားခဲ့ပါတယ်။

ရဲအရာရှိ ထရူးမန်းဖစ်ဂီရက်က" ည (၁၁)နာရီလောက်က ဘာမင်ဂမ်မြို့ရဲ့ခရိုင်တစ်ခုမှာ သေနတ်သမား အများအပြားဟာ လူအုပ်စုတစ်စုကို သေနတ်တွေနဲ့ အချက်ပေါင်းများစွာ ပစ်ခတ်ခဲ့တယ်လို့ ကျွန်တော်တို့ ယုံကြည်ပါတယ်" လို့ ပြောခဲ့ပါတယ်။

ပစ်ခတ်မှုတွေဖြစ်ပွားပြီးနောက် လူသွားလမ်းတစ်ခုမှာ သေနတ်ဒဏ်ရာတွေနဲ့  သေဆုံးနေတဲ့အရွယ်ရောက်ပြီးသား အမျိုးသားနှစ်ဦးနဲ့ အမျိုးသမီးတစ်ဦးကို ရဲတပ်ဖွဲ့က ရှာဖွေတွေ့ရှိခဲ့တယ်လို့ ထရူးမန်းဖစ်ဂီရက်က ပြောကြားခဲ့ပါတယ်။ အဲဒီပစ်ခတ်မှုအတွင်း ထိခိုက်ဒဏ်ရာရရှိခဲ့တဲ့ နောက်ထပ်လူတစ်ဦးက ဆေးရုံမှာကုသမှုတွေ လုပ်ဆောင်နေစဉ်အချိန်အတွင်း သေဆုံးသွားခဲ့တယ်လို့ ၎င်းက ထပ်မံပြောကြားခဲ့ပါတယ်။

ပစ်ခတ်မှုအတွင်း ဒါဇင်နဲ့ချီတဲ့လူတွေ ထိခိုက်ဒဏ်ရာရရှိခဲ့ပြီး ၎င်းတို့အနက်(၄)ဦးက စိုးရိမ်ရတဲ့အခြေအနေမှာ ရှိနေတယ်လို့လည်း ၎င်းက ပြောကြားခဲ့ပါတယ်။ ပစ်ခတ်မှုနဲ့ပတ်သက်ပြီး သံသယရှိသူတွေကို ရဲတပ်ဖွဲ့က ဆက်လက်ရှာဖွေစုံစမ်းနေဆဲဖြစ်ပြီး စုံစမ်းစစ်ဆေးမှုကိုအကူအညီဖြစ်စေနိုင်မယ့် သတင်းအချက်အလက်တွေရှိရင် ပေးကြဖို့ ပြည်သူတွေကို ရဲတပ်ဖွဲ့က တိုက်တွန်းထားတယ်လို့လည်း သိရပါတယ်။

ဒါ့ပြင် ဗဟိုစုံစမ်းစစ်ဆေးရေးဗျူရိုနဲ့ အရက်၊ဆေးရွက်ကြီး၊ လက်နက်နဲ့ ဖောက်ခွဲရေးပစ္စည်းဗျူရိုတို့ အပါအဝင် အေဂျင်စီအများအပြားဟာ စုံစမ်းစစ်ဆေးမှုမှာ ပါဝင်ကူညီပေးနေတယ်လို့လည်း သိရပါတယ်။ Gun Violence Archive (GVA) ရဲ့အဆိုအရ အမေရိကန်နိုင်ငံမှာ ယခုနှစ်အတွင်း သေဆုံး ဒါမှမဟုတ် ထိခိုက်ဒဏ်ရာရရှိသူ အနည်းဆုံး(၄)ဦးပါဝင်တဲ့ အစုလိုက်အပြုံလိုက်ပစ်ခတ်မှုပေါင်း (၄၀၃)မှုထိ ရှိခဲ့တယ်လို့ သိရပါတယ်။

ဒါ့ပြင် GVA ရဲ့ အဆိုအရအမေရိကန်နိုင်ငံမှာ ယခုနှစ်အတွင်း သေနတ်ပစ်ခတ်မှုတွေကြောင့် အနည်းဆုံးလူ (၁၂၄၁၆) ဦး သေဆုံးခဲ့တယ်လို့လည်း သိရပါတယ်။