ရောင်နီ (NSS) - စက်တင်ဘာ ၁၈

           မကာအိုမှာ အခန်းအတွင်း၌ ဆေးလိပ်သောက်ခဲ့တဲ့ ပုံရိပ်ကြောင့် တောင်ကိုရီးယား K Pop အဆိုတော် ဘဲ့ဟွန်းကို ဆိုရှယ်မီဒီယာမှာ ဝေဖန်မှုတွေရှိနေပြီး ၎င်းရဲ့အေဂျင်စီက ပြန်လည်တောင်းပန်ခဲ့ရပါတယ်။ 

          ဘဲ့ဟွန်းဟာ စက်တင်ဘာ ၁၆ ရက်က တရုတ်နိုင်ငံ၊ ကိုယ်ပိုင်အုပ်ချုပ်ခွင့်ရဒေသ မကာအိုရှိ စားသောက်ဆိုင်တစ်ခုမှာ vape သောက်ရင်း သူ့ရဲ့ဝန်ထမ်းလို့ ယူဆရတဲ့ လူတချို့နဲ့ စကားပြောနေတဲ့ ဗီဒီယို အွန်လိုင်းမှာ ပျံ့နှံ့နေခဲ့တာပါ။ အဆိုပါ ဗီဒီယိုနဲ့ပတ်သက်ပြီး ပရိသတ်တွေက ဝေဖန်မှုတွေ ပြုလုပ်လာတာကြောင့် တုံ့ပြန်တဲ့အနေနဲ့ ဘဲ့ဟွန်းရဲ့အေဂျင်စီ INB100 မှ တရားဝင်တောင်းပန်ချက်ထုတ်ပြန်ခဲ့ပါတယ်။  

"ကျွန်တော်တို့ရဲ့ အနုပညာရှင် ဘဲ့ဟွန်းနဲ့ပတ်သက်ပြီး မကြာသေးခင်က အခန်းတွင်း ဆေးလိပ်သောက်တဲ့ ဗီဒီယိုနဲ့ပတ်သက်ပြီး အဆင်မပြေဖြစ်ခဲ့ကြသူတိုင်းကို  စိတ်ရင်းမှန်နဲ့ တောင်းပန်အပ်ပါတယ်၊ အဲဒီအချိန်တုန်းက ဘဲ့ဟွန်းနဲ့ ကျွန်တော်တို့ ဝန်ထမ်းတွေ မကာအိုမှာ အီလက်ထရွန်းနစ်စီးကရက် သောက်သုံးခြင်းမျိူး တားမြစ်ထားတဲ့အကြောင်း လုံး၀ မသိရှိခဲ့ကြပါဘူး၊ ဘဲ့ဟွန်းဟာ မကာအိုမှာ ဖျော်ဖြေပြီးနောက် နားနေစဉ် ဝန်ထမ်းတွေနဲ့ စကားစမြည်ပြောဆိုရင်း အီလက်ထရွန်နစ်စီးကရက်ကို မသိစိတ်က သောက်ခဲ့မိတာ ဖြစ်ပါတယ်"လို့ ပြောကြားခဲ့ပါတယ်။ 

ဒါကြောင့် ဘဲ့ဟွန်းရဲ့ပေါ့ဆမှုဟာ ပရိသတ်များစွာကို စိတ်ပျက်စေခဲ့တဲ့အတွက် စိတ်မကောင်းဖြစ်ရကြောင်း၊ နောက်ထပ်ဒီလိုဖြစ်ရပ်များ မဖြစ်အောင် ဂရုစိုက်မယ့်အကြောင်း ထပ်လောင်း ပြောကြားခဲ့ပါတယ်။ တောင်ကိုရီးယားမှာ celebrity တွေ ဆေးလိပ်သောက်၊ အရက်သောက်ပြီး ကားမောင်းခြင်းတို့နဲ့ပတ်သက်ပြီး ဆိုးဆိုးရွားရွား ဝေဖန်ခံရလေ့ ရှိပါတယ်။