Pika (NSS) - စက်တင်ဘာ ၁၇

ဟားမတ်စ်လက်နက်ကိုင်အဖွဲ့ဟာ အီရန်ကျောထောက်နောက်ခံပြုဒေသတွင်း မိတ်ဖက်တွေရဲ့ အကူ အညီတွေနဲ့အတူ အစ္စရေးနဲ့ဖြစ်ပွားနေတဲ့စစ်ပွဲကို နောက်ထပ်(၁)နှစ်နီးပါး ဆက်တိုက်ဖို့အတွက် လုံ လောက်တဲ့အရင်းအမြစ်တွေရှိတယ်လို့ ဟားမတ်စ်လက်နက်ကိုင်အဖွဲ့အကြီးအကဲ ယာယာဆင်ဝါက စက်တင်ဘာလ(၁၆)ရက်နေ့မှာ ထုတ်ပြန်ပြောကြားခဲ့ပါတယ်။

ယာယာဆင်ဝါက "အစ္စရေးနဲ့ ရှည်လျားတဲ့စစ်ပွဲကိုဆက်လက်ဖြစ်ပွားနိုင်ဖို့အတွက် ကျွန်တော်တို့ ကိုယ့်ကိုကိုယ်ပြင်ဆင်ထားပြီးပါပြီ"လို့ ပြောဆိုခဲ့ပါတယ်။ ဒါ့ပြင် အစ္စရေးတပ်ဖွဲ့တွေရဲ့ ဒုံးကျည်တွေနဲ့ပစ်ခတ်တိုက်ခိုက်မှုကြောင့် အနည်းဆုံးလူ(၂)ဒါဇင်လောက် သေဆုံးခဲ့တယ်လို့ ဆေးဘက်ဆိုင်ရာနဲ့ကယ်ဆယ်ရေးအဖွဲ့တွေက စက်တင်ဘာလ(၁၆)ရက်နေ့မှာ ပြောကြားခဲ့ပါတယ်။ ဒေသတွင်းမှာ ပိုမိုကျယ်ပြန့်တဲ့ ပဋိပက္ခဖြစ်ပွားလာနိုင်ခြေနဲ့ပတ်သက်ပြီး အစ္စရေးကာကွယ်ရေးဝန်ကြီးYoav Gallant က သတိပေးပြောဆိုခဲ့ပြီးနောက် အဲဒီတိုက်ခိုက်မှုတွေ ထွက်ပေါ်လာတာဖြစ်ပါတယ်။ ယာယာဆင်ဝါက "လက်ဘ  နွန်နိုင်ငံနဲ့ အီရတ်တို့မှာရှိတဲ့ အခြားအဖွဲ့တွေနဲ့အတူ ကျွန်တော်တို့ရဲ့ပူးပေါင်းကြိုးပမ်းမှုတွေက ရန်သူတွေကို ချေမှုန်းပစ်နိုင်ပါလိမ့်မယ်"လို့ ပြောဆိုခဲ့ပါတယ်။ 

အမေရိကန်အပါအဝင် အခြားနိုင်ငံတွေဟာ အစ္စရေးနဲ့ဟားမတ်စ်လက်နက်ကိုင်အဖွဲ့ကြား အပစ်အခတ်ရပ်စဲရေးသဘောတူညီချက်ရရှိဖို့အတွက် ဆွေးနွေးပွဲတွေကို အကြိမ်ကြိမ်လုပ်ဆောင်နေပေမယ့်လည်း လက်ရှိအချိန်အထိတော့ သဘောတူညီချက်မရရှိသေးဘူးလို့လည်း သိရပါတယ်။ ဒါ့ပြင် အမေရိကန်နိုင်ငံခြားရေးဝန်ကြီး အန်တိုနီဘလင်ကန်ဟာ အီဂျစ်အရာရှိတွေနဲ့အတူ အစ္စရေး-ဟားမတ်စ်စစ်ပွဲအပစ်အခတ်ရပ်စဲရေးဆွေးနွေးပွဲကို လုပ်ဆောင်ဖို့အတွက် ယခုသီတင်းပတ်အတွင်း အီဂျစ်နိုင်ငံကို သွား ရောက်လည်ပတ်လိမ့်မယ်လို့ အမေရိကန်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ မက်သရူးမီလာကပြောကြားခဲ့ပါတယ်။