Pika (NSS) - စက်တင်ဘာ ၁၇

တရုတ်နိုင်ငံရဲ့ စစ်ရေးနဲ့နိုင်ငံရေးအရ ဖိအားပေးမှုတွေကို ရင်ဆိုင်ရာမှာ တိုက်ပွဲဝင်ဖို့ အဆင်သင့်ဖြစ်နေစေဖို့ အမေရိကန်ဒေါ်လာ(၂၂၈)သန်းတန်ဖိုးရှိ စစ်ဘက်ဆိုင်ရာပစ္စည်းတွေကို ထိုင်ဝမ်ကိုရောင်းချဖို့အတွက် အတည်ပြုခဲ့တယ်လို့ အမေရိကန်နိုင်ငံခြားရေးဝန်ကြီးဌာနက စက်တင်ဘာလ(၁၆)ရက်နေ့မှာ ထုတ်ပြန်ပြောကြားခဲ့ပါတယ်။

အဲဒီစစ်ဘက်ဆိုင်ရာ အပိုပစ္စည်းတွေကို ထိုင်ဝမ်တပ်ဖွဲ့တွေမှာ တပ်ဆင်ပေးဖို့အတွက် ထိုင်ဝမ်စစ်တပ်မှာ အခက်အခက်တွေရှိမှာမဟုတ်ဘူးလို့လည်း အမေရိကန်နိုင်ငံခြားရေးဝန်ကြီးဌာနကပြောကြားခဲ့ပါတယ်။အမေရိကန်နိုင်ငံဟာ ထိုင်ဝမ်နဲ့တရားဝင်ဆက်ဆံရေးတွေ မရှိပေမယ့်လည်း ထိုင်ဝမ်ရဲ့အရေးအကြီးဆုံး ထောက်ခံသူနဲ့ စစ်လက်နက်ပစ္စည်းထောက်ပံ့ပေးတဲ့နိုင်ငံဖြစ်တယ်လို့လည်း သိရပါတယ်။ယခုလအတွင်း အကောင်အထည်ပေါ်လာနိုင်ပုံပေါ်တဲ့ စစ်ဘက်ဆိုင်ရာအပိုပစ္စည်းရောင်းချမှုနဲ့ပတ်သက်ပြီး အမေရိကန်အစိုးရကို ကျေးဇူးတင်မိတယ်လို့ ထိုင်ဝမ်ကာကွယ်ရေးဝန်ကြီးဌာနကပြောကြားခဲ့ပါတယ်။

ထိုင်ဝမ်ကာကွယ်ရေးဝန်ကြီးဌာနက "တရုတ်စစ်တပ်ရဲ့ စစ်ရေးလေ့ကျင့်မှုတွေနဲ့ နိုင်ငံရေးအရ ဖိအားပေးမှုတွေဟာ ကျွန်တော်တို့ရဲ့လေပိုင်နက်နဲ့ရေပိုင်နက်အတွင်းမှာ လေ့ကျင့်ရေးနေရာနဲ့ တုံ့ပြန်မှုအချိန်တွေကို ပိုမိုကျဉ်းမြောင်းနည်းပါးလာစေပါတယ်။ စစ်ဘက်ဆိုင်ရာအပိုပစ္စည်းတွေရောင်းချဖို့ အမေရိကန်အစိုးရရဲ့သဘောတူညီမှုဟာ ကျွန်တော်တို့စစ်တပ်ရဲ့ တိုက်ခိုက်ရေးအဆင်သင့်ဖြစ်မှုနဲ့ ဘေးကင်းမှုတို့ကို ဆက်လက်ထိန်းသိမ်းထားနိုင်ဖို့ ကူညီပေးပါလိမ့်မယ်"လို့ ပြောဆိုခဲ့ပါတယ်။ တရုတ်အစိုးရဟာ ထိုင်ဝမ်ကျွန်းကို ၎င်းရဲ့ပိုင်နက်နယ်မြေအဖြစ်ရှုမြင်ထားပြီး ငြိမ်းချမ်းစွာ ပြန်လည်ပေါင်းစည်းနိုင်ဖို့အတွက် လိုအပ်ပါက အင်အားသုံးဖြေရှင်းသွားမယ်လို့ တရုတ်သမ္မတရှီကျင့်ဖျင်က ယခင်က ထုတ်ပြန်ပြောခဲ့ဖူးပါတယ်။