Pika (NSS) - စက်တင်ဘာ ၁၇

တရုတ်နှင့်အိန္ဒိယကြားဖြစ်ပွားနေသော နယ်စပ်အငြင်းပွားမှုများနှင့်ပတ်သက်၍ ဆွေးနွေးမှုများ တွင် တိုးတက်မှုအနည်းငယ်ရှိခဲ့ပြီး ပြဿနာများ၏(၇၅) ရာခိုင်နှုန်းခန့်ကို ဖြေရှင်းပြီးဖြစ်ကြောင်း အိန္ဒိယ ပြည်ပရေးရာဝန်ကြီး S. Jaishankar က စက်တင်ဘာလ(၁၂)ရက်တွင် ထုတ်ပြန်ပြောကြားခဲ့သည်။ 

(၂၀၂၀) ပြည့်နှစ်တွင် နယ်စပ်ဒေသ၌တရုတ်နှင့်အိန္ဒိယတပ်ဖွဲ့ကြား တိုက်ပွဲများဖြစ်ပွားခဲ့ပြီး နှစ်ဖက် စလုံးတွင် အသေအပျောက်များရှိခဲ့ပြီးနောက်ပိုင်းတည်းက နယ်စပ်ဆိုင်ရာ ဆွေးနွေးပွဲများကို လုပ်ဆောင်ခဲ့ခြင်းဖြစ်ကြောင်း သိရသည်။ 

S. Jaishankar က “ဒါပေမဲ့လည်း ကျွန်တော်တို့မှာ လုပ်စရာတွေတော့ရှိပါသေးတယ်” ဟု မှတ်ချက်ပြုပြောဆိုခဲ့သည်။ အာရှအင်အားကြီး နှစ်နိုင်ငံကြား သဘောတူညီချက်များကို ပျက်ပြားသွား စေခဲ့သည့် (၂၀၂၀) ပြည့်နှစ်ကဖြစ်ပွားခဲ့သော ဖြစ်ရပ်သည် နှစ်နိုင်ငံကြားဆက်ဆံရေးကို ထိခိုက်စေခဲ့ ကြောင်း S. Jaishankar ကပြောကြားခဲ့သည်။ 

ထို့ပြင် နှစ်နိုင်ငံလုံးက အခြေခံအဆောက်အအုံ များကို တည်ဆောက်နေသည့် နယ်စပ်ဒေသတွင် ဖြစ်ပွားနေသော စစ်ရေးတင်းမာမှု ပြဿနာများကို  S. Jaishankar က အလေးပေး ပြောကြားခဲ့ကြောင်း လည်းသိရသည်။ အိန္ဒိယနှင့်တရုတ်နိုင်ငံတို့ကြား ထိစပ်နေသော နယ်စပ်အရှည် (၃၃၇၉) ကီလိုမီတာသည် ကမ္ဘာပေါ်တွင် လူဦးရေအများဆုံးနိုင်ငံ နှစ်နိုင်ငံကြား ဖြစ်ပွားနေသော တင်းမာမှုများ၏ အဓိက ရင်းမြစ် ဖြစ်နေခဲ့သည်မှာ အချိန်အတော်ကြာပြီလည်းဖြစ်သည်။

(၂၀၂၀)ခုနှစ်တွင် နယ်စပ်ဒေသ၌ နှစ်နိုင်ငံ တပ်ဖွဲ့များကြား တိုက်ပွဲများဖြစ်ပွားခဲ့ပြီးနောက် ပြီးခဲ့ သည့် လေးနှစ်နီးပါးအတွင်း အိန္ဒိယနှင့်တရုတ်တို့သည် နယ်စပ်ဆိုင်ရာဆွေးနွေးပွဲများကို အကြိမ်ပေါင်း (၃၀)ကျော် လုပ်ဆောင်ခဲ့ကြကြောင်းသိရသည်။ ထို့ပြင် နှစ်နိုင်ငံစလုံးသည်နယ်စပ်အငြင်းပွားမှု ပြဿနာများ နှင့်ပတ်သက်ပြီး အပြုသဘောဆောင်သည့်အမြင်များကို ပွင့်ပွင့်လင်းလင်း ဖလှယ်ခဲ့ကြကြောင်း အိန္ဒိယ အစိုးရက ပြောကြားခဲ့ဖူးသည်။

အိန္ဒိယနှင့်တရုတ်တို့သည် ၎င်းတို့၏ တပ်ဖွဲ့များ ကို ပုံမှန်လည်ပတ်နေကျအခြေစိုက်စခန်းများ ကို ပြန်လည်ခေါ်ယူထားရန်နှင့် တရားဝင် မသတ်မှတ်ထားသော နယ်စပ်တစ်လျှောက်ရှိ အချို့ နေရာ များတွင် ကင်းလှည့်မှုများနှင့်ပတ်သက်ပြီး သဘောတူညီချက်များရရှိရန်အတွက် ညှိနှိုင်းနေကြကြောင်း S. Jaishankar က ပြောကြားခဲ့သည်။