Pika (NSS) - စက်တင်ဘာ ၉

အမေရိကန် နဲ့ အီရတ်တို့ဟာ အမေရိကန်ဦးဆောင်တဲ့ညွန့်ပေါင်းတပ်ဖွဲ့တွေ ရုတ်သိမ်းရေးနဲ့ပတ်သက်ပြီး သဘောတူညီခဲ့ကြပေမယ့်လည်း နောက်ဆုံးသဘောတူညီချက်ကို လက်မှတ်မရေးထိုးရသေးဘူးလို့ အီရတ်ကာကွယ်ရေးဝန်ကြီးက စက်တင်ဘာလ(၈)ရက်နေ့မှာ ထုတ်ဖော်ပြောဆိုခဲ့ပါတယ်။

ISIS အကြမ်းဖက်အဖွဲ့ကို ဆန့်ကျင်တဲ့နိုင်ငံတကာညွန့်ပေါင်းတပ်ဖွဲ့ရဲ့ တစ်စိတ်တစ်ပိုင်းအနေနဲ့ အီရတ်နိုင်ငံမှာ အမေရိကန်တပ်ဖွဲ့ဝင်(၂၅၀၀)ခန့်ရှိပြီး ဆီးရီးယားမှာ တပ်ဖွဲ့ဝင်(၉၀၀)ခန့်ရှိတယ်လို့လည်း သိရပါတယ်။ အမေရိကန်နဲ့ အီရတ်တို့ဟာ အီရတ်နိုင်ငံတွင်းမှာရှိတဲ့ တပ်ဖွဲ့တွေကို ရုတ်သိမ်းရေးနဲ့ပတ်သက်ပြီး ဆွေးနွေးမှုတွေကို လပေါင်းများစွာလုပ်ဆောင်ခဲ့ပေမယ့်လည်း ရုတ်သိမ်းမယ့် အချိန်ဇယားကိုတော့ ထုတ်ပြန်ကြေညာတာမျိုးမရှိခဲ့ဘူးလို့ သိရပါတယ်။ အမေရိကန်ဦးဆောင်တဲ့ ညွန့်ပေါင်းတပ်ဖွဲ့တွေဟာ Baghdad မြို့နဲ့ အခြားအစိတ်အပိုင်းတွေမှာရှိတဲ့ ညွန့်ပေါင်းတပ်ဖွဲ့တွေကို ၂၀၂၅ ခုနှစ် စက်တင်ဘာလမှာ စတင်ရုတ်သိမ်းသွားမည်ဖြစ်ပြီး ၂၀၂၆ ခုနှစ် စက်တင်ဘာလမှာ ကိုယ်ပိုင်အုပ်ချုပ်ခွင့်ရကာဒစ်စတန်ဒေသမှာရှိတဲ့ ညွန့်ပေါင်းတပ်ဖွဲ့တွေကို ရုတ်သိမ်းသွားမှာဖြစ်တယ်လို့ အီရတ်ကာကွယ်ရေးဝန်ကြီး Thabet al-Abbassi က စက်တင်ဘာလ(၈)ရက်နေ့မှာ ထုတ်ပြန်ပြောကြားခဲ့ပါတယ်။

ရုတ်သိမ်းမှုမှာ အဆင့်(၂)ဆင့်ရှိပြီး လာမယ့်ရက်ပိုင်းအတွင်း ရုတ်သိမ်းမှုသဘောတူညီချက်ကို လက်မှတ်ရေးထိုးသွားမယ်လို့ Thabet al-Abbassi ကပြောကြားခဲ့ပါတယ်။ ဒါပေမဲ့လည်း တပ်ဖွဲ့ဝင်တွေ ရုတ်သိမ်းမှုဟာ အချိန် (၂)နှစ်နဲ့ မလုံလောက်ဘူးလို့ အမေရိကန်ကာကွယ်ရေးဝန်ကြီး လွိုက်အော်စတင်က အစည်းအဝေးအတွင်းမှာ ပြောကြားခဲ့တယ်လို့လည်း သိရပါတယ်။ Thabet al-Abbassi က"တပ်ဖွဲ့ဝင်တွေရုတ်သိမ်းမှုနဲ့ပတ်သက်ပြီး အပိုတစ်နှစ်ထပ်ပေးဖို့နဲ့ပတ်သက်တဲ့ လွိုက်အော်စတင်ရဲ့အဆိုပြုချက်ကို ကျွန်တော်တို့ ငြင်းဆန်ပယ်ချခဲ့ပါတယ်'လို့ ပြောဆိုခဲ့ပါတယ်။ ဂါဇာကမ်းမြောင်ဒေသမှာဖြစ်ပွားနေတဲ့ အစ္စရေး-ဟားမက်စစ်ပွဲနဲ့ပတ်သက်ပြီး အီရတ်နဲ့ဆီးရီးယားတို့မှာရှိတဲ့ အမေရိကန်ဦးဆောင်တဲ့ညွန့်ပေါင်းတပ်ဖွဲ့တွေဟာ ဒရုန်းတွေ၊ဒုံးကျည်တွေနဲ့ အကြိမ်ပေါင်းများစွာ ပစ်မှတ်ထားတိုက်ခိုက်ခံခဲ့ရတယ်လို့လည်းသိရပါတယ်။ ဒါ့ပြင် အမေရိကန်တပ်ဖွဲ့တွေဟာ နှစ်နိုင်ငံစလုံးမှာရှိတဲ့ အကြမ်းဖက်အဖွဲ့တွေအပေါ် လက်တုံ့ပြန်တိုက်ခိုက်မှုတွေကို ပြန်လည်လုပ်ဆောင်ခဲ့တယ်လို့လည်း သိရပါတယ်။