ယွန်း (NSS) -  သြဂုတ် ၂၅

ဘဏ်လုပ်ငန်းများရပ်ဆိုင်းနေသည့် သီပေါမြို့နယ်ရှိ ကျန်းမာရေးဝန်ထမ်းများ၏ လစာငွေများကို  ယခုလကုန်တွင် တောင်ကြီးမြို့၌ထုတ်ပေးမည်ဖြစ် ကြောင်း ကျန်းမာရေးဝန်ကြီးဌာနက မီဒီယာများကို အသိပေးထားသည်။

ရှမ်းပြည်နယ်၊ သီပေါမြို့နယ် နမ့်လန်ရွာဆေးရုံရှိ ကျန်းမာရေးဝန်ထမ်းများအနေဖြင့် ပြီးခဲ့သည့် ဇူလိုင်လမှစ၍ လစာငွေမရရှိကြောင်း သိရသည်။

ကျန်းမာရေးဝန်ကြီးဌာန၏ ဖြေကြားချက်အရ အဆိုပါနမ့်လမ်တိုက်နယ်ဆေးရုံသည် သီပေါမြို့နယ်တွင် ပါဝင်ပြီး ယခင်ကသီပေါမြို့နယ်ဘဏ်မှ ထုတ်ယူလျှက်ရှိနေရာ လက်ရှိအခြေအနေကြောင့် သီပေါမြို့နယ်တွင် ဘဏ်လုပ်ငန်းများ ရပ်ဆိုင်းနေရကြောင်း ကျန်းမာရေးဝန်ကြီးဌာနက ဆိုထား သည်။

အလားတူ ပြည်နယ်ရုံးတည်ရှိသည့် လားရှိုးမြို့နယ်တွင်လည်း ဘဏ်လုပ်ငန်းများ ရပ်ဆိုင်းခဲ့ရခြင်းကြောင့် ရှမ်းပြည်နယ်တောင်ပိုင်း၊ တောင်ကြီးမြို့နယ်မှ လစာထုတ်ပေးနေပြီး ယခုသြဂုတ်လကုန်တွင် လစာရရှိမည်ဖြစ်ကြောင်း ဝန်ကြီးဌာနက အသိပေးထားသည်။

MNDAA ပူးပေါင်းအဖွဲ့များသည် ပြီးခဲ့သည့် ဇူလိုင် (၃) ရက်နေ့မှစတင်ကာ လားရှိုးမြို့နှင့် အနီးတစ်ဝိုက်တွင် တစ်ကျော့ပြန်တိုက်ပွဲများကို ပြန်လည် ဖော်ဆောင်ခဲ့ရာ လူနေအိမ်နှင့် ပစ္စည်းများစွာ ထိခိုက်မှုရှိသကဲ့သို့ လူသေဆုံးမှုများလည်း ဖြစ်ပွားခဲ့သည်။