Pika (NSS) - ဩဂုတ် ၂၁

ကမ္ဘာ့ကျန်းမာရေးအဖွဲ့ WHO က ကမ္ဘာလုံးဆိုင်ရာအရေးပေါ်အခြေအနေအဖြစ် ထုတ်ပြန်ကြေညာထားတဲ့ မျောက်ကျောက်ရောဂါကူးစက်ခံထားရတယ်လို့ ယူဆရတဲ့ သံသယဖြစ်ဖွယ် ပထမဆုံးလူနာကို နိုင်ငံတွင်းမှာ တွေ့ရှိခဲ့တယ်လို့ ထိုင်းအာဏာပိုင်တွေက ဩဂုတ်လ(၂၁)ရက်နေ့မှာ သတင်းထုတ်ပြန်ခဲ့ပါတယ်။

အဲဒီလူနာဟာ အာဖရိကနိုင်ငံတစ်ခုကနေ ထိုင်းနိုင်ငံကို လာရောက်လည် ပတ်တဲ့ ဥရောပနိုင်ငံသားတစ်ဦးဖြစ်တယ်လို့ ထိုင်းနိုင်ငံရောဂါထိန်းချုပ်ရေးဌာနအကြီးအကဲ Thongchai Keeratihattayakorn က ပြောကြားခဲ့ပါတယ်။ အဲဒီအမျိုးသားဟာ မျောက်ကျောက်ရောဂါကူးစက်ခံထားရခြင်း ရှိ/မရှိကို အတည်ပြုဖို့အတွက် ဓါတ်ခွဲစမ်းသပ်စစ်ဆေးမှုတွေကို ဆက်လက်လုပ်ဆောင်နေတယ်လို့လည်းသိရပါတယ်။ ဒါပေမဲ့လည်း အဲဒီအမျိုးသားဟာ မျောက်ကျောက်ရောဂါကူးစက်ခံထားရတယ်လို့ အာဏာပိုင်တွေက ယုံကြည်နေကြပြီး ၎င်းကို ဆေးရုံမှာ သီးသန့်အခန်းတစ်ခုမှာခွဲထားတယ်လို့လည်း သိရပါတယ်။ 

Thongchai Keeratihattayakorn က 'ကျွန်တော်တို့ စမ်းသပ်စစ်ဆေးမှုတစ်ခုကို လုပ်ဆောင်ပြီးပါပြီ။ သေချာတာကတော့ သူ့မှာမျောက်ကျောက် ရောဂါကူးစက်ခံထားရပုံပေါ်ပါတယ်။ ဒါပေမဲ့ ဟုတ်/မဟုတ်သေချာသိရဖို့အတွက် ဓါတ်ခွဲခန်းနောက်ဆုံးရလဒ်ကို နောက်ထပ်(၂)ရက်လောက်တော့ ထပ်စောင့်ရပါဦးမယ်'လို့ ပြောဆိုခဲ့ပါတယ်။ 

ကွန်ဂိုနိုင်ငံမှာ မျောက်ကျောက်ရောဂါကူးစက်ပျံ့နှံ့ခဲ့ပြီး လူ(၅၄၈)ဦး သေဆုံးခဲ့ပြီးနောက် အဲဒီရောဂါဟာ အာဖရိကတိုက်အလယ်ပိုင်းနဲ့ အရှေ့ပိုင်းတို့ကို စတင်ပျံ့နှံ့သွားခဲ့တာဖြစ်တယ်လို့လည်း သိရပါတယ်။ WHO က ကမ္ဘာလုံးဆိုင်ရာအရေးပေါ်အခြေအနေအဖြစ် ထုတ်ပြန်ကြေညာပြီးနောက် ဆွီဒင်နိုင်ငံနဲ့ ပါကစ္စတန်နိုင်ငံတို့မှာ မျောက်ကျောက်ရောဂါကူးစက်ခံထားရသူတွေကို တွေ့ရှိခဲ့ရတယ်လို့လည်း သိရပါတယ်။ ဒါ့ပြင် မျောက်ကျောက်ရောဂါကူးစက်ခံထားရတဲ့ ပထမဆုံးလူနာကို နိုင်ငံတွင်းမှာတွေ့ရှိခဲ့တယ်လို့ ဖိလစ်ပိုင်အာဏာပိုင်တွေက ပြီးခဲ့တဲ့ဩဂုတ်လ(၁၉)ရက်နေ့မှာ ထုတ်ပြန်ပြောကြားခဲ့ပါတယ်။  မျောက်ကျောက်ရောဂါဟာ တိရစ္ဆာန်တွေကနေတစ်ဆင့် လူတွေကို ကူးစက်တဲ့ဗိုင်းရပ်စ်ပိုးကြောင့် ဖြစ်ပွားတာဖြစ်ပေမယ့်လည်း လူအချင်း ချင်း နီးကပ်တဲ့ရုပ်ပိုင်းဆိုင်ရာထိတွေ့မှုတွေကနေတဆင့် ကူးစက်နိုင်တယ်လို့လည်း သိရပါတယ်။ မျောက်ကျောက်ရောဂါဟာ ဖျားနားတာမျိုး၊ ကြွက်သားတွေ နာကျင်ကိုက်ခဲတာမျိုးနဲ့ အရေပြားပေါ်မှာ အနာတွေကို ဖြစ်စေတယ်လို့လည်း သိရပါတယ်။