Pika (NSS) - ဩဂုတ် ၂၁

အိန္ဒိယဝန်ကြီးချုပ်မိုဒီဟာ ယူကရိန်းနိုင်ငံကို သွားရောက်မလည်ပတ်ခင် ဩဂုတ်လ(၂၁)ရက်နေ့မှာ ရုရှား-ယူကရိန်းစစ်ပွဲငြိမ်းချမ်းရေးအတွက် ထပ်မံတောင်းဆိုခဲ့တယ်လို့ သိရပါတယ်။

မိုဒီဟာ ပြီးခဲ့တဲ့လက ရုရှားနိုင်ငံကို အလည်အပတ်သွားရောက်စဉ်အချိန်အတွင်း ရုရှားသမ္မတပူတင်နဲ့ပွေ့ဖက်ခဲ့တဲ့အတွက် ယူကရိန်းဘက်က ပြစ်တင်ဝေဖန်မှုတွေလုပ်ဆောင်ပြီးနောက် သီတင်းပတ်များစွာအကြာမှာ ယူကရိန်းကိုသွားရောက်လည်ပတ်မယ့် ၎င်းရဲ့ခရီးစဉ်ထွက်ပေါ်လာတာဖြစ်ပါတယ်။ မိုဒီဟာ လာမယ့်ဩဂုတ်လ(၂၃)ရက်နေ့မှာ ယူကရိန်းကိုသွားရောက်မလည်ပတ်ခင် ပိုလန်နိုင်ငံကို အရင်ဆုံးသွားရောက်လည်ပတ်မှာဖြစ်တယ်လို့လည်း သိရပါတယ်။

မိုဒီက 'မိတ်ဖက်သူငယ်ချင်းတစ်ဦးအနေနဲ့ ဒေသတွင်း ငြိမ်းချမ်းရေးနဲ့တည်ငြိမ်ရေးကို အမြန်ဆုံးပြန်လည်ယူဆောင်လာနိုင်ဖို့ ကျွန်တော်တို့မျှော်လင့်ပါတယ်။ အိန္ဒိယအစိုးရဟာ ဒေသတွင်းပြိုင်ဖက်တရုတ်ကို ဆန့်ကျင်တဲ့အနောက်အုပ်စုနိုင်ငံတွေနဲ့ ဆက်ဆံရေးကို တိုးမြှင့်နေစဉ်အချိန်မှာပဲ ရုရှားနဲ့ ပိုမိုနီးကပ်တဲ့ဆက်ဆံရေးကို တည်ဆောက်ခဲ့လာတာလည်းဖြစ်ပါတယ်။ ၂၀၂၂ ခုနှစ် ဖေဖော်ဝါရီလမှာစတင်ဖြစ်ပွားခဲ့တဲ့ ယူကရိန်းစစ်ပွဲနဲ့ပတ်သက်ပြီး ရုရှားရဲ့ကျူးကျော်တိုက်ခိုက်မှုတွေကို ပြစ်တင်ရှုတ်ချဖို့ အိန္ဒိယအစိုးရက ငြင်းဆန်ခဲ့တယ်လို့လည်း သိရပါတယ်။ ဒါ့ပြင် ရုရှားနဲ့ယူကရိန်းတို့ဟာ နှစ်နိုင်ငံကြား သဘောထားကွဲလွဲမှုတွေကို ဆွေးနွေးပွဲတွေကနေတဆင့် အဖြေရှာသင့်တယ်လို့ အိန္ဒိယအစိုးရက တိုက်တွန်းခဲ့ပါတယ်။ အဲဒီခရီးစဉ်ဟာ မိုဒီကယူကရိန်းကို ပထမဆုံးအကြိမ်လာရောက်လည်ပတ်တဲ့ ခရီးစဉ်ဖြစ်တယ်လို့လည်း သိရပါတယ်။ 

ဒါ့ပြင် ယူကရိန်းပဋိပက္ခကို ငြိမ်းချမ်းစွာဖြေရှင်းရေးနဲ့ပတ်သက်တဲ့အမြင်တွေအပြင် အိန္ဒိယ-ယူကရိန်းဆက်ဆံရေးကို ပိုမိုနက်ရှိုင်းလာစေဖို့အတွက် ယူကရိန်းသမ္မတဇီလန်စကီးနဲ့ ဆွေးနွေးမှုတွေ လုပ်ဆောင်သွားမယ်လို့လည်း မိုဒီက ပြောကြားခဲ့ပါတယ်။ မိုဒီဟာ ပြီးခဲ့တဲ့ဇူလိုင်လမှာ ရုရှားနိုင်ငံ မော်စကိုမြို့ကို သွားရောက်လည်ပတ်ခဲ့ပြီး သမ္မတပူတင်နဲ့ပွေ့ဖက်နေတဲ့ ဓါတ်ပုံတွေ ဆိုရှယ်မီဒီယာပေါ်မှာ ပျံ့နှံ့လာပြီးနောက် ယူကရိန်းဘက်က ပြစ်တင်ရှုတ်ချမှုတွေ ထွက်ပေါ်လာတာလည်းဖြစ်ပါတယ်။