Pika (NSS) - ဩဂုတ် ၁၉

ပိုလန်သမ္မတ Andrzej Duda ဟာ စစ်တပ်၊ ရဲတပ်ဖွဲ့ နဲ့ နယ်ခြားစောင့်တပ် ဖွဲ့တွေအတွက် လက်နက်အသုံးပြုမှုတွေကို တိုးချဲ့ဖို့ နဲ့ ၎င်းတို့အနေနဲ့ တိုက်ရိုက်ပစ်ခတ်မှုတွေဖြစ်ပွားခဲ့မယ်ဆိုရင် ရာဇဝတ်မှုဆိုင်ရာ တာဝန်ဝတ္တရားတွေကနေ ကင်းလွတ်ခွင့်ပေးမယ့်ဥပဒေကို လက်မှတ်ရေးထိုးခဲ့တယ်လို့လည်း သိရပါတယ်။

ပိုလန်နိုင်ငံဟာ တပ်မတော်နေ့ကိုကျင်းပနေမှုနဲ့အတူ သမ္မတ Andrzej Duda ဟာ စစ်သားတွေနဲ့ အရာရှိတွေရဲ့လုပ်ရပ်တွေကို ထောက်ခံပေးတဲ့ အက်ဥပဒေကို အတည်ပြုခဲ့တယ်လို့ သမ္မတရုံးအကြီးအကဲ Malgorzata Paprocka က ထုတ်ပြန်ကြေညာခဲ့ပါတယ်။ အဲဒီဥပဒေအသစ်အရ ငြိမ်းချမ်းတဲ့ကာလအတွင်း စစ်တပ်ကို နိုင်ငံတွင်းစစ်ဆင်ရေးတွေမှာ ပါဝင်ခွင့်ပြုပြီး အခြေအနေအမျိုးမျိုးနဲ့ပတ်သက်ပြီး တပ်ဖွဲ့ဝင်တွေရဲ့ လက်နက်အသုံးပြုမှုဆိုင်ရာစည်းမျဉ်းတွေကို ချမှတ်ထားတယ်လို့လည်း သိရပါတယ်။ အခြားတစ်ခုအနေနဲ့ နယ်ခြားစောင့်တပ်ဖွဲ့ဝင်တစ်ဦးဟာ ကိုယ့်ကိုယ်ကိုယ်ကာကွယ်ဖို့ ဒါမှမဟုတ် အခြားလူတစ်ဦးကို ကာကွယ်ဖို့အတွက် ပစ်ခတ်မှုတွေလုပ်ဆောင်ခဲ့မယ်ဆိုရင် ရာဇဝတ်မှုဆိုင်ရာတာဝန်ဝတ္တရားတွေကနေ ကင်းလွတ်ခွင့်ပေးမှာဖြစ်တယ်လို့လည်း သိရပါတယ်။ 

Andrzej Duda က 'အဲဒီဥပဒေဟာ ပိုလန်စစ်သားတွေရဲ့ ဘေးကင်းလုံခြုံရေးကို တိုးမြှင့်ပေးပြီး နယ်စပ်နဲ့အခြားနေရာတွေကို ပိုမိုကောင်းမွန်စွာကာကွယ်ပေးနိုင်ခွင့်ပြုပါလိမ့်မယ်'လို့ ပြောဆိုခဲ့ပါတယ်။ ဘီလာရုစ်နိုင်ငံ နယ်စပ်မှာရှိတဲ့ နယ်စပ်ခြံစည်းရိုးကို ဖြတ်ကျော်ဝင်ရောက်လာတဲ့ ရွှေ့ ပြောင်းနေထိုင်သူတစ်ဦးက ပိုလန်စစ်သားတစ်ဦးကို ဓါးနဲ့ထိုးမှုဖြစ်ပွားခဲ့ပြီးနောက် တစ်လခွဲအကြာ ပြီးခဲ့တဲ့ဇူလိုင်လလယ်မှာ အဲဒီဥပဒေမူကြမ်းကို ပိုလန်လွှတ်တော်က အတည်ပြုခဲ့တာဖြစ်တယ်လို့လည်း သိရပါတယ်။