Pika (NSS) -  ဩဂုတ် ၁၉

ရုရှားနိုင်ငံ ကာ့စ်ဒေသကို ယူကရိန်းရဲ့ ကျူးကျော်ဝင်ရောက်တိုက်ခိုက်မှုဟာ အနောက်အုပ်စု ကျောထောက်နောက်ခံပြုထားတဲ့ အကြမ်းဖက်လုပ်ရပ်ဖြစ်တယ်လို့ မြောက်ကိုရီးယားနိုင်ငံခြားရေးဝန်ကြီးဌာနက ပြစ်တင်ရှုတ်ချခဲ့ပါတယ်။

၂၀၂၂ ခုနှစ် ဖေဖော်ဝါရီလမှာစတင်ဖြစ်ပွားခဲ့တဲ့ ပဋိပက္ခနောက်ပိုင်း နိုင်ငံ တကာအသိအမှတ်ပြုရုရှားပိုင်နက်ကို ယူကရိန်းရဲ့ကျူးကျော်တိုက်ခိုက်မှုဟာ အမေရိကန်ရဲ့ ရက်စက်ကြမ်းကြုတ်တဲ့ ရုရှားဆန့်ကျင်ရေးမူဝါဒရဲ့ ရလဒ်ဖြစ်တယ်လို့ မြောက်ကိုရီးယားနိုင်ငံခြားရေးဝန်ကြီးဌာနက ထုတ်ပြန်ပြောကြားခဲ့ပါတယ်။ မြောက်ကိုရီးယားနိုင်ငံခြားရေးဝန်ကြီးဌာနက'အမေရိကန်နဲ့ ၎င်းရဲ့မိတ်ဖက်နိုင်ငံတွေဟာ ယူကရိန်းရဲ့ကျူးကျော်တိုက်ခိုက်မှုမှာ ပါဝင်ပတ်သက်တာမျိုးမရှိဘူးလို့ အခိုင်အမာပြောဆိုပြီး ပြည်သူလူထုကို လှည့်ဖြားဖို့ကြိုးပမ်းနေကြပေမယ့်လည်း ကာ့စ်ဒေသစစ်မြေပြင်မှာ နေ့တိုင်းရှာဖွေတွေ့ရှိနေတဲ့ အမေရိကန်နဲ့ အနောက်အုပ်စုတွေရဲ့ တင့်ကားတွေအပါအဝင် အမျိုးမျိုးသောစက်ပစ္စည်းတွေက ယူကရိန်းနောက်ကွယ်မှာ ဘယ်သူရှိနေတယ်ဆိုတာကို ရှင်းရှင်းလင်းလင်းသက်သေပြနေပါတယ်'လို့ ထုတ်ပြန်ပြောကြားခဲ့ပါတယ်။

ယူကရိန်းကို စစ်လက်နက်ပစ္စည်းတွေအများအပြား ထောက်ပံ့ပေးခဲ့တဲ့ အမေရိကန်နိုင်ငံဟာ လုံခြုံရေးအခြေအနေတွေကို တတိယကမ္ဘာစစ်ဆီကို တွန်းပို့နေတယ်လို့ မြောက်ကိုရီးယားနိုင်ငံခြားရေးဝန်ကြီးဌာနက ပြောကြားခဲ့ပါတယ်။ အမေရိကန်နဲ့ အနောက်အုပ်စုနိုင်ငံတွေရဲ့ ခြယ်လှယ်မှု၊ ထောက် ခံမှုတွေနဲ့အတူ ရုရှားရဲ့နယ်မြေကို ကျူးကျော်တိုက်ခိုက်ခဲ့တဲ့ ယူကရိန်းရဲ့ လုပ်ရပ်တွေကို မြောက်ကိုရီးယားက ပြစ်တင်ရှုတ်တယ်လို့ ၎င်းတို့ရဲ့ ထုတ်ပြန်ချက်မှာ ရေးသားဖော်ပြထားပါတယ်။ ဒါ့ပြင် အချုပ်အခြာအာဏာကို ကာကွယ်ဖို့ ကြိုးပမ်းနေတဲ့ ရုရှားနိုင်ငံနဲ့အတူ အမြဲတမ်းရပ်တည်သွားမှာဖြစ်တယ်လို့ မြောက်ကိုရီးယားအစိုးရက ပြောကြားခဲ့ပါတယ်။ 

မြောက်ကိုရီးယားနဲ့ ရုရှားတို့ဟာ အပြန်အလှန်ဆက်ဆံရေးတွေကို မကြာသေးခင်ကာလအတွင်း  သိသိသာသာတိုးမြှင့်ခဲ့ပြီး နှစ်နိုင်ငံစလုံးရဲ့ခေါင်း ဆောင်တွေဟာ အနည်းဆုံးတစ်နှစ်အတွင်းမှာ အပြန်အလှန်လည်ပတ်မှုတွေကို လုပ်ဆောင်ခဲ့ကြတယ်လို့လည်း သိရပါတယ်။