ဂျန်ဇက် (NSS) - မေ ၂၇

ယူကရိန်းသမ္မတဇီလန်စကီးက လာမယ့်ဇွန်လအတွင်းကျင်းပမယ့် ငြိမ်းချမ်းရေးထိပ်သီးအစည်းအဝေးကို ကူညီထောက်ခံပေးဖို့ ကမ္ဘာ့ခေါင်းဆောင်တွေကို တိုက်တွန်းတောင်းဆိုလိုက်ပါတယ်။

ယူကရိန်းသမ္မတဟာ အမေရိကန်သမ္မတ ဂျိုးဘိုင်ဒန်နဲ့ တရုတ်သမ္မတ ရှီကျင့်ဖျင်တို့ရဲ့အားပေးထောက်ခံမှုတွေရရှိဖို့လိုလားနေတယ်လို့ သိရပါတယ်။ ယူကရိန်းသမ္မတဟာ လာမယ့်လအတွင်း ဆွတ်ဇာလန်နိုင်ငံမှာကျင်းပမယ့် ငြိမ်းချမ်းရေးအစည်းအဝေးအတွင်း ရုရှားနဲ့ ယူကရိန်းနိုင်ငံကြားဖြစ်ပွားနေတဲ့ စစ်ပွဲနဲ့ပတ်သက်ပြီး ငြိမ်းချမ်းရေးအစီအစဉ်တွေကိုတင်ပြဆွေးနွေးသွားဖွယ်ရှိနေပါတယ်။ ၎င်းက "ယူကရိန်းစစ်ပွဲအဆုံးသတ်ဖို့ ကမ္ဘာ့ခေါင်းဆောင်တွေစေ့စပ်ဆွေးနွေးဖို့ လိုအပ်တယ်။ စစ်ပွဲအဆုံးသတ်ဖို့တစ်နိုင်ငံတည်းလုပ်ဆောင်လို့မရဘူး၊"လို့ပြောပါတယ်။

ယူကရိန်း ငြိမ်းချမ်းရေးထိပ်သီးအစည်းအဝေးကို ဇွန်လ ၁၅ရက် နဲ့ ၁၆ရက်နေ့တို့မှာ ကျင်းပမှာဖြစ်ပြီး ကမ္ဘာ့ခေါင်းဆောင်အများစုတက်ရောက်ဖွယ်ရှိနေပေမယ့် တရုတ်သမ္မတအပါအဝင် BRICS အဖွဲ့ဝင်နိုင်ငံအများစုတက်ရောက်ဖွယ်မရှိကြောင်းသိရပါတယ်။ အဆိုပါထိပ်သီးအစည်းအဝေးကို ကမ္ဘာတဝှမ်းရှိနိုင်ငံပေါင်း ၈၀ ရဲ့ခေါင်းဆောင်တွေတက်ရောက်ဖို့ စာရင်းပေးထားကြောင်းသိရပါတယ်။ ဆွစ်ဇာလန်သမ္မတက ၎င်းတို့ဟာ ကမ္ဘာတဝှမ်းရှိနိုင်ငံပေါင်း ၁၆၀ ရဲ့ခေါင်းဆောင်တွေကို အစည်းအဝေးတက်ရောက်ဖို့ ဖိတ်ခေါ်ထားကြောင်းသိရပါတယ်။ ဒါပေမဲ့ ရုရှားသမ္မတ ပူတင်အပါအဝင် ရုရှားအစိုးရတာဝန်ရှိသူတွေကို ဖိတ်ခေါ်ခြင်းမရှိတဲ့အတွက် အငြင်းပွားမှုတွေရှိနေဆဲဖြစ်ကြောင်းသိရပါတယ်။ 

တရုတ်သမ္မတက အဆိုပါအစည်းအဝေးကို ယူကရိန်း နဲ့ ရုရှားအစိုးရတာဝန်ရှိသူများ နှစ်ဖက်စလုံးက ခေါင်းဆောင်တွေကိုဖိတ်ကြားသင့်တယ်လို့ပြောပါတယ်။ ယူကရိန်းနဲ့ ရုရှားကြားဖြစ်ပွားနေတဲ့ စစ်ပွဲက သုံးနှစ်အတွင်းရောက်ရှိလာပေမယ့် အပစ်ခတ်ရပ်စဲရေး ရယူနိုင်ခြင်းမရှိသေးကြောင်းသိရပါတယ်။