Pika (NSS) - ဧပြီ ၂၃

အမေရိကန်ရဲ့ စစ်ရေးအကူအညီအသစ်ဟာ ယူကရိန်းရဲ့ခုခံမှုကို တောင့် တင်းလာစေနိုင်ပေမယ့်လည်း ရုရှားနိုင်ငံကို တားဆီးဖို့လုံလောက်မှာ မဟုတ်ဘူးလို့ ယူကရိန်းအရာရှိတွေနဲ့ စစ်ရေးလေ့လာသုံးသပ်သူတွေက ထုတ်ဖော်ပြောဆိုခဲ့ပါတယ်။

အမေရိကန်အောက်လွှတ်တော်ဟာ ယူကရိန်းအတွက် အကူအညီပေးရေးအစီအစဉ်အသစ် ဥပဒေမူကြမ်း အမေရိကန်ဒေါ်လာ(၆၁)ဘီလျံကို ဧပြီလ(၂၀)ရက်နေ့က အတည်ပြုပေးခဲ့တာပဲဖြစ်ပါတယ်။ ဒါပေမဲ့လည်း အဲဒီဥပဒေမူကြမ်းဟာ အထက်လွှတ်တော်ရဲ့ အတည်ပြုမှုနဲ့ အမေရိကန်သမ္မတဂျိုးဘိုင်ဒန်ရဲ့ လက်မှတ်ရေးထိုးမှုတို့ကို လိုအပ်ပါသေးတယ်။ အမေရိကန်ရဲ့ အကူအညီပေးရေးအစီအစဉ်အသစ်ကြောင့် ရုရှားကို နိုင်နိုင်ခြေရှိသေးတယ်လို့ ယူကရိန်းသမ္မတဇီလန်စကီးက ပြောဆိုထားပေမယ့်လည်း ယူကရိန်းအရာရှိအများအပြားကတော့ ဇီလန်စကီးနဲ့ ဆန့်ကျင်ဖက်တွေကိုပဲပြောဆိုထားပါတယ်။ 

ယူကရိန်းအရာရှိတွေက 'ဒီစစ်ရေးအကူအညီအသစ်ဟာ ရှေ့တန်းစစ်မြေ မျက်နှာပြင်မှာ ယူကရိန်းရဲ့အခြေအနေတွေကို သိသိသာသာပြောင်းလဲစေမှာတော့ မဟုတ်ပါဘူး'လို့ ပြောဆိုခဲ့ပါတယ်။ ယူကရိန်းတပ်ဖွဲ့တွေဟာ ရှေ့တန်းစစ်မြေမျက်နှာပြင်မှာ ခဲယမ်းမီးကျည်ပြတ်လပ်မှုတွေကို ကြုံတွေ့နေရတာလို့လည်း သိရပါတယ်။ အမေရိကန်ထုတ် စစ်လက်နက်ပစ္စည်းတွေကြောင့် ရှေ့တန်းစစ်မြေမျက်နှာပြင်မှာ ဖြစ်ပွားနေတဲ့အခြေအနေတွေဟာ တိုးတက်မှုတွေရှိလာနိုင်တယ်လို့ ယူကရိန်းစစ်သားအချို့က ပြောဆိုထားပါတယ်။

ယူကရိန်းအကြီးတန်းအရာရှိတစ်ဦးက 'ဒီစစ်လက်နက်ပစ္စည်းတွေဟာ ရုရှားရဲ့တိုက်ခိုက်မှုတွေ နှေးကွေးသွားစေဖို့ ကူညီပေးနိုင်ပေမယ့်လည်း ရုရှားရဲ့တိုက်ခိုက်မှုတွေကိုတော့ ရပ်တန့်သွားအောင် လုပ်ဆောင်နိုင်မှာ မဟုတ်ပါဘူး'လို့ ပြောဆိုခဲ့ပါတယ်။ ဒါ့ပြင် အမေရိကန်ရဲ့အကူအညီပေးရေး အစီအ စဉ်အသစ်ဟာ ယူကရိန်းနိုင်ငံသားတွေ ပိုမိုသေဆုံးတာတွေပဲဖြစ်စေမယ်လို့ ရုရှားဘက်က ထုတ်ပြန်ပြောဆိုထားပါတယ်။ ရုရှားအစိုးရပြောရေး ဆိုခွင့်ရှိသူ ဒီမစ်ထရီပက်စကို့ဗ်က 'အမေရိကန်က ယူကရိန်းကိုပေးမယ့် အကူအညီပေးရေးအစီအစဉ်အသစ်ဟာ စစ်မြေပြင်မှာဖြစ်ပွားနေတဲ့ အခြေအနေတွေကို ပြောင်းလဲပေးနိုင်မှာ မဟုတ်ပါဘူး။ ဒီအကူအညီပေးရေးအစီအစဉ်အသစ်ဟာ ယူကရိန်းနိုင်ငံသားတွေ ပိုမိုသေဆုံးတာကိုပဲဖြစ်စေမှာပါ'လို့ပြောဆိုခဲ့ပါတယ်။