ဂျန်ဇက် (NSS) - ဧပြီ ၂ဝ

တောင်တရုတ်ပင်လယ်အရေးနဲ့ပတ်သက်ပြီး တင်းမာမှုအရှိန်မြင့်တက်နေချိန်မှာပဲ အိန္ဒိယအစိုးရဟာ ဖိလစ်ပိုင်နိုင်ငံကို အသံထက်မြန်တဲ့ ဒုံးကျည်တွေကို လွှဲပြောင်းပေးခဲ့ကြောင်းသိရပါတယ်။

အိန္ဒိယနဲ့ ဖိလစ်ပိုင်အစိုးရတို့ဟာ ၂၀၂၂ ခုနှစ်တုန်းက ဘရာမိုစ့် အမည်ရှိအသံထက်မြန်တဲ့ ခရုဇ်ဒုံးကျည်များ ရောင်းဝယ်ရေးအတွက် သဘောတူစာချုပ်လက်မှတ်ရေးထိုးခဲ့ကြောင်း သိရပါတယ်။ အဲဒီသဘောတူစာချုပ်တန်ဖိုးဟာ အမေရိကန်ဒေါ်လာ ၃၇၅ သန်း တန်ဖိုးရှိနေကြာင်း အဆိုပါစာချုပ်အရ ဖိလစ်ပိုင်နိုင်ငံကို ဒုံးကျည်တွေ ပထမအသုတ်လွှဲပြောင်းပေးခဲ့ခြင်းဖြစ် ကြောင်း သိရပါတယ်။ အိန္ဒိယနဲ့ ရုရှားနိုင်ငံတို့ ပူးပေါင်းထုတ်လုပ်ထားတဲ့ ဘရာမိုစ့် ဒုံးကျည်တွေကို ဖိလစ်ပိုင်အပြင် ထိုင်း၊ ဗီယက်နမ်၊ အင်ဒိုနီးရှားနိုင်ငံတို့ကလည်း ဝယ်ယူဖို့ စိတ်ဝင်စားနေကြောင်းသိရပါတယ်။

ဒါ့ပြင် ဆော်ဒီအာရေဗျနိုင်ငံကလည်း အိန္ဒိယနဲ့ရုရှားတို့ ထုတ်လုပ်ထားတဲ့ ဒုံးကျည်ကို ဝယ်ယူဖို့ စိတ်ဝင်စားနေပြီး ဆွေးနွေးနေရာအရောင်းအဝယ်စာချုပ်တန်ဖိုးက အမေရိကန်ဒေါ်လာ ၇ ဘီလျံအထိ ရှိလာနိုင်ကြောင်းသိရပါတယ်။ အိန္ဒိယဟာ အဲဒီဘရာမိုစ့်အမည်ရှိ ဒုံးကျည်တွေကို  C-17 အမည်ရှိ ရဟတ်ယာဉ်နဲ့ ဖိလစ်ပိုင်နိုင်ငံကိုပေးပို့ခဲ့တာမျိုးဖြစ်ကြောင်းသိရပါတယ်။ဘရာမိုစ့် ဒုံးကျည်ဟာ ရေငုပ်သင်္ဘော၊ စစ်သင်္ဘော၊ တိုက်လေယာဉ်တွေအပြင် ကုန်းမြေအပေါ်ကနေ ပစ်ခတ်နိုင်ပြီး အကွာအဝေး ၅၀၀ ကီလိုမီတာအထိရောက်ရှိပစ်ခတ်နိုင်ကြောင်းသိရပါတယ်။

ဖိလစ်ပိုင်ဟာ လက်ရှိအချိန်မှာ တရုတ်နိုင်ငံနဲ့ တောင်တရုတ်ပင်လယ်အတွင်း ပိုင်နက်နယ် မြေအငြင်းပွားမှုတွေဖြစ်ပွားနေပြီး ကာကွယ်ရေးအင်အား ပိုမိုကောင်းမွန်စေဖို့ အမေရိကန်၊ ဂျပန်၊ သြစတြေးလျအပါအဝင် မဟာမိတ်နိုင်ငံတွေနဲ့ ပူးပေါင်းဆောင်ရွက်မှု တိုးမြှင့်လုပ်ဆောင်နေကြောင်းသိရပါတယ်။