Pika (NSS) - ဧပြီ ၁၉

ယူကရိန်းအတွက် နောက်ထပ်စစ်ရေးအကူအညီတွေကို အတည်ပြုပေးဖို့ အမေရိကန်လွှတ်တော်က ငြင်းဆိုလိုက်မယ်ဆိုရင် ရုရှားနဲ့ဖြစ်ပွားနေတဲ့စစ်ပွဲအတွက် ယူကရိန်းမှာ ပလန်ဘီရှိတော့မှာမဟုတ်ဘူးလို့ နိုင်ငံခြားရေးဝန်ကြီး ဒီမစ်ထရီကူလီဘာက ပြောကြားခဲ့ပါတယ်။

အီတလီနိုင်ငံ ကာပရီကျွန်းမှာ ကျင်းပခဲ့တဲ့ G7 နိုင်ငံခြားရေးဝန်ကြီးတွေရဲ့ အစည်းအဝေးအပြီးမှာ ဒီမစ်ထရီကူလီဘာက ယခုလို ထုတ်ဖော်ပြောဆိုလိုက်တာဖြစ်ပါတယ်။ အမေရိကန်အစိုးရဟာ ယူကရိန်းအတွက် အမေရိကန်ဒေါ်လာ(၆၀)ဘီလျံ စစ်ရေးအကူအညီကို ပြီးခဲ့တဲ့ဆောင်းရာသီကတည်းက အဆိုပြုတင်သွင်းခဲ့ပေမယ့်လည်း လက်ရှိအချိန်အထိ ပေးပို့နိုင်ခြင်းမျိုးတော့ မရှိသေးပါဘူး။ အမေရိကန်အထက်လွှတ်တော်ဟာ ယူကရိန်းအတွက် အကူအညီပေးရေးအစီအစဉ်အသစ်ကို ပြီးခဲ့တဲ့ဖေဖော်ဝါရီလလယ်မှာ အတည်ပြုပေးခဲ့ပေမယ့်လည်း ရီပတ်ဘလစ်ကန်တွေကြီးစိုးထားတဲ့ အောက်လွှတ်တော်ဟာ အဲဒီဥပဒေမူကြမ်းကို လက်ရှိအချိန်အထိ အတည်ပြုပေးခြင်းမျိုးတော့ မရှိသေးဘူးလို့ သိရပါတယ်။

အမေရိကန်အောက်လွှတ်တော်ဥက္ကဋ္ဌမိုက်ခ်ဂျွန်ဆင်ဟာ ယူကရိန်းအတွက် အကူအညီပေးရေးအစီအစဉ်အသစ်ကို ဧပြီလ(၂၀)ရက်နေ့မှာ မဲခွဲဆုံးဖြတ်မယ်လို့ ယခုသီတင်းပတ်အစောပိုင်းမှာ ထုတ်ပြန်ကြေညာခဲ့ပါတယ်။ ယူကရိန်းအတွက် အကူအညီပေးရေးအစီအစဉ်အသစ်ကို အတည်ပြုလိုက်ပြီဆိုပါက အဲဒီဥပဒေမူကြမ်းကို လက်မှတ်ရေးထိုးမယ်လို့လည်း သမ္မတဂျိုးဘိုင်ဒန်က ကတိပြုထားပါတယ်။ အဲဒီမဲခွဲဆုံးဖြတ်မှုနဲ့ပတ်သက်ပြီး ထွက်ပေါ်လာမယ့် ရလဒ်ကို ခန့်မှန်းပြောဆိုဖို့ ဒီမစ်ထရီကူလီဘာက ငြင်းဆိုခဲ့တယ်လို့လည်း သိရပါတယ်။ ၎င်းက 'ဒီဥပဒေမူကြမ်းအတွက် တိုက်ပွဲအများအပြားဖြစ်ပွားနေပါတယ်။ပြီးတော့ ဒီဥပဒေမူကြမ်းအတွက် ကျွန်တော်တို့ ဆက်လက်တိုက်ပွဲဝင်သွားရဦးမှာပါ။ အဓိကကတော့ ထွက်လာမယ့် ရလဒ်ကိုပဲ စောင့်ရမှာပါ။”လို့ပြောဆိုခဲ့ပါတယ်။