ALynn (NSS) - ဧပြီ ၁၉ 

ဧပြီလ ၁၈ ရက် (ကြာသပတေးနေ့) က အမေရိကန်သည် ကုလသမဂ္ဂလုံခြုံရေးကောင်စီတွင် ပါလက်စတိုင်းအား အဖွဲ့ဝင်အဖြစ် အသိအမှတ်ပြုခြင်းနှင့်စပ်လျဉ်းသည့် မဲခွဲဆုံးဖြတ်ခြင်း အစီအစဉ်ကို ဟန့်တားခဲ့သည်။ 

ကုလသမဂ္ဂအထွေထွေညီလာခံအား အကြံပြုထားသည့် “ပါလက်စတိုင်းအား ကုလသမဂ္ဂအဖွဲ့ဝင်အဖြစ် လက်ခံရန်” အဆိုပြုချက်မူကြမ်းကို အမေရိကန်က ဗီတိုအာဏာသုံး ပယ်ချခဲ့သည်။ ထိုမူကြမ်းနှင့်ပတ်သက်၍ လုံခြုံရေးကောင်စီအဖွဲ့ဝင်များအနက် ဗြိတိန် နှင့် ဆွစ်ဇာလန်တို့က ကြားနေဆန္ဒမဲ ပေးခဲ့ကြပြီး၊ ကျန် ၁၂ နိုင်ငံကမူ ထောက်ခံခဲ့ကြသည်။ 

“လွတ်လပ်သည့် ပါလက်စတိုင်းနိုင်ငံထူထောင်ဖို့ အစ္စရေးနှင့် ပါလက်စတိုင်းအကြား တိုက်ရိုက်ဆွေးနွေးညှိနှိုင်း ဖို့သာ လိုအပ်မည်ဖြစ်ပြီး ကုလသမဂ္ဂ၏ ဝင်ရောက်ပတ်သက်ခြင်းမျိုး မလုပ်သင့်ကြောင်း” အမေရိကန်က ပြောခဲ့ သည်။ ပါလက်စတိုင်းသမ္မတကမူ “အမေရိကန်၏ ဗီတိုအာဏာကျင့်သုံးမှုသည် တရားမျှတမှုမရှိသလို ကျင့်ဝတ်နှင့် လည်း မလျော်ညီကြောင်း၊ ထို့ပြင် ပါလက်စတိုင်းအား ကုလသမဂ္ဂအဖွဲ့ဝင်ဖြစ်ရေးအတွက် ထောက်ခံနေသော နိုင်ငံတကာအသိုင်းအဝိုင်း၏ သဘောဆန္ဒကိုလည်း အမေရိကန်က စိန်ခေါ်လိုက်ခြင်းဖြစ်ကြောင်း” ဖော်ပြခဲ့သည်။ ပါလက်စတိုင်းသည် ဂါဇာကမ်းမြောင်တွင် အစ္စရေးနှင့်ဟားမက်စ်တို့အကြား စစ်ပွဲစတင်ကတည်းက ကုလသမဂ္ဂ အဖွဲ့ဝင်ဖြစ်ရေး ကြိုးပမ်းလာခဲ့သည်။ 

အစ္စရေးနိုင်ငံခြားရေးဝန်ကြီးကမူ အမေရိကန်၏ ဗီတိုအာဏာကျင့်သုံးမှုအပေါ် အားပေးချီးကျူးခဲ့ပြီး မူကြမ်းကို ထောက်ခံခဲ့သည့် အဖွဲ့ဝင် ၁၂ နိုင်ငံကိုလည်း “၎င်းတို့၏ ထောက်ခံမဲသည် ပါလက်စတိုင်းများကိုသာ ပိုမိုရဲတင်းလာ စေပြီး ငြိမ်းချမ်းရေးနှင့် အလှမ်းဝေးဖို့သာ ဦးတည်သွားမည်ဖြစ်ကြောင်း” ကုလသမဂ္ဂဆိုင်ရာ အစ္စရေးကိုယ်စား လှယ်က မှတ်ချက်ပြုခဲ့သည်။ ကုလသမဂ္ဂအထွေထွေအတွင်းရေးမှူးချုပ်ကမူ “အစ္စရေး-ဟားမက်စ်စစ်ပွဲရပ်တန့် ရေး နှစ်နိုင်ငံထူထောင်ခြင်း အဖြေသည် ဒေသတွင်းရှိ လူသန်းပေါင်းများစွာအပေါ် ထိခိုက်မှုများ၊ အန္တရာယ်များကို သာ တိုးမြင့်လာစေကြောင်း” လုံခြုံရေးကောင်စီသို့ ပြောကြားခဲ့သည်။