ရောင်နီ (NSS) - ဧပြီ ၁၉

ဗြိတိန်နိုင်ငံ၊ ဆိုမာဆက်ရှိ ကမ်းခြေတစ်ခုမှာ နှစ်သန်းပေါင်း ၂၀၀ ကျော်က ရှင်သန်နေထိုင်ခဲ့တဲ့ကျောက်ဖြစ် ရုပ်ကြွင်းကြီးတွေကို ဗြိတိန် သားအဖ ၂ ဦးက တွေ့ရှိခဲ့ပါတယ်။ 

၎င်းဟာ ကမ္ဘာပေါ်တွင် အကြီးမားဆုံး တိရစ္ဆာန်တွေထဲက တစ်ခုလို့လည်း ယူဆရပါတယ်။ 

သုတေသနပညာရှင်တွေက အဆိုပါအရိုးစုဟာ အိုင်ခ်ျသီယိုဆော (ခေါ် ) ပင်လယ်ကူး တွားသွားသတ္တဝါအမျိုးအစားထဲက စူရန်ဂလာ လို့ခေါ်တဲ့ သတ္တဝါဖြစ်တယ်လို့ ဗုဒ္ဓဟူးနေ့ (ဧပြီလ ၁၇ ရက်က အတည်ပြုခဲ့တာဖြစ်ပါတယ်။ 

Triassic Period ခေတ်ကာလကတည်းက ရှင်သန်ခဲ့တဲ့ သတ္တဝါလို့ နာမည်ပေးထားတဲ့ အဆိုပါ အရိုးစုဟာ အရှည် ၇၂ ပေမှ ၈၅ ပေ (၂၂ - ၂၆ မီတာ) ထိ ရှည်လျားတယ်လို့ သုတေသီတွေက ခန့်မှန်းခဲ့ပါတယ်။ 

၎င်းဟာ အကြီးဆုံး ရေနေတွားသွားသတ္တဝါဖြစ်ကောင်းဖြစ်နိုင်ပြီး ယနေ့ခေတ် အသက်ရှင်နေဆဲ အကြီးဆုံး မျိုးစိတ်ဖြစ်တဲ့ အကြီးဆုံး baleen ဝေလငါးတွေနဲ့ ပုံစံတူ ဖြစ်နိုင်မယ်လို့ ယူဆထားပါတယ်။ 

ကုန်းမြေကို ဒိုင်နိုဆောတွေ လွှမ်းမိုးခဲ့သလိုပဲ  ဧရာမ ရေနေတွားသွားသတ္တဝါတွေဟာ ကမ္ဘာ့သမုဒ္ဒရာကို အုပ်စိုးကြပါတယ်။

ဒီအရိုးစုတွေထဲက မေးရိုးနှစ်ခုကို ရူဘီရေးနွိုက်နဲ့ သူမရဲ့ဖခင် ဂျက်စတင်ရေးနွိုက်တို့က ၂၀၂၀ ပြည့်နှစ်မှာ တွေ့ရှိခဲ့တာဖြစ်ပါတယ်။ 

အဲဒီနောက် ၎င်းတို့သားအဖက အိုင်ခ်ျသီယိုဆော ကျွမ်းကျင်သူတွေနဲ့ အဆိုပါ ဧရိယာကို ဆက်လက်ရှာဖွေခဲ့ရာမှာ နောက်ထပ်အစိတ်အပိုင်းတွေကို တူးဖော်တွေ့ရှိခဲ့ပါတယ်။ 

ကျွမ်းကျင်သူတွေက အဆိုပါ အရိုးစုတွေမှ အိုင်ခ်ျသီယိုဆောနဲ့ပတ်သက်ပြီး ဆက်လက်အဖြေရှာနေပါတယ်။