Pika (NSS)  - ဧပြီ ၁၃

ကနေဒါနိုင်ငံ အယ်လ်ဘာတာပြည်နယ်မှ အမျိုးသမီးတစ်ဦးသည် လက်နှစ်ဖက်ကို ထောက်ထားကာ မှောက်ခုံအနေအထား (Plank Workout လုပ်ခြင်း)ဖြင့် အချိန်အကြာဆုံးနေခဲ့ပြီးနောက် ကမ္ဘာ့ ဂင်းနစ်စံချိန် (အမျိုးသမီး)ကို ချိုးဖျက်ခဲ့ကြောင်း သိရသည်။

အသက်(၅၈)နှစ်အရွယ် ဒိုနာဂျင်းလ်ဝိုင်း သည် လက်နှစ်ဖက်ကိုထောက်ထားကာ မှောက်ခုံ အနေအထားဖြင့် (၄)နာရီ(၃၀)မိနစ်နှင့်(၁၁)စက္ကန့် အထိနေခဲ့ပြီး ၂၀၁၉ ခုနှစ်တွင် ကနေဒါနိုင်ငံမှ အမျိုးသမီး ဒါနာဂလိုးဝက်ကာ တင်ထားသော ဂင်းနစ်စံချိန်ကို ချိုးဖျက်ခဲ့ခြင်းဖြစ်ကြောင်းသိရသည်။ 

ဒိုနာဂျင်းလ်ဝိုင်းသည် ဒါနာဂလိုးဝက်ကာ တင်ထားသော ဂင်းနစ်စံချိန်ထက် (၁၀)မိနစ်ပိုကြာအောင် လက်နှစ်ဖက်ကိုထောက်ထားကာ မှောက်ခုံ အနေအထားဖြင့်နေပြခဲ့ပြီးနောက် ယခုကဲ့သို့ ဂင်းနစ် စံချိန် ချိုးဖျက်နိုင်ခဲ့ခြင်းဖြစ်သည်။ 

ကမ္ဘာ့ဂင်းနစ်စံချိန်တရားဝင်ကြီးကြပ်သူ တီနာရှီသည် ဒိုနာဂျင်းလ်ဝိုင်း၏ ဂင်းနစ်စံချိန်ချိုးဖျက်မှုကို အနီးကပ်စောင့်ကြည့်ခဲ့ခြင်းဖြစ်ကြောင်း သိရသည်။

အဆိုပါဂင်းနစ်စံချိန်ကို ရရှိရန်အတွက် ကြိုးပမ်းသူသည် ၎င်း၏လက်ဖျံများနှင့်ခြေချောင်းများကို မြေပြင်နှင့်အချိန်တိုင်းထိထားရန် လိုအပ်ကြောင်းလည်း သိရသည်။ ထို့ပြင် ခန္ဓာကိုယ်ကို မြေပြင်မှခွာကာ တစ်ဖြောင့်တည်းအနေအထားဖြင့် နေရမည်ဖြစ်ကြောင်းလည်းသိရသည်။

ဒိုနာဂျင်းလ်ဝိုင်းက “ ဒီဂင်းနစ်စံချိန်ကို ချိုးဖျက်ပြီးတဲ့နောက်မှာတော့ ကျွန်မရဲ့တံတောင်ဆစ် တွေက တော်တော်ကိုနာသွားတာပါ။ ကျွန်မရဲ့ ပုံစံအနေအထားပျက်သွားမှာကို တကယ်ကို စိတ်ပူခဲ့ရတာပါ။ ပထမနှစ်နာရီက လျင်မြန်စွာ ကုန်ဆုံးသွားတယ် လို့ခံစားရပေမယ့် ကျန်ရှိနေတဲ့နှစ်နာရီကတော့ တကယ်ကိုခက်ခဲခဲ့ပါတယ်။ နောက်ဆုံး နာရီဝက်ကတော့ စိန်ခေါ်မှုအရှိဆုံး အချိန်တစ်ခုပါပဲ။ ကျွန်မရဲ့ ပုံစံအနေအထားကို ဆက်ထိန်းထားနိုင်ဖို့ အများကြီး အာရုံစိုက်ခဲ့ရတာပါ ” ဟု ပြောဆိုခဲ့သည်။