ယွန်း (NSS) - ဧပြီ ၁၁

ဧပြီလ၊ ဒုတိယပတ်အတွင်း ရန်ကုန် အပါအဝင် ပြည်နယ်နှင့် တိုင်းဒေသကြီးအချို့တွင် နေ့အပူချိန်များ တိုးလာနိုင်ကြောင်း မိုးလေဝသ နှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့၊ ဧပြီ(၁၁) ရက်တွင် ထုတ်ပြန်သည့် ဧပြီလ ဒုတိယ(၁၀)ရက်ပတ်အတွက် မိုးလေဝသခန့်မှန်းချက်၌ အထက်ပါကဲ့သို့ အသိပေးထားခြင်းဖြစ်သည်။

အဆိုပါကာလအတွင်း ရန်ကုန် အပါအဝင် နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ဧရာဝတီ၊ တနင်္သာရီ၊ ရှမ်း၊ ချင်း၊ ရခိုင်၊ ကယား၊ ကရင်နှင့် မွန်တို့တွင် ဧပြီလ ပျမ်းမျှအပူချိန်၏ ၁ ဒသမ ၅ ဒီဂရီဆဲလ်စီးယပ်နှင့်အထက် ပိုနိုင်ကြောင်း  သိရသည်။

ထို့ပြင် မိုးရွာသွန်းမှုများလည်းရှိနိုင်ပြီး နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ကချင်၊ ရှမ်း၊ ချင်း၊ ရခိုင်၊ ကယား၊ ကရင်နှင့် မွန်တို့တွင် မိုးထစ်ချုန်းရွာနိုင်ကြောင်း မိုးဇလက ဆိုထားသည်။

အဆိုပါကာလ၌ တနင်္သာရီ၊ ကချင်၊ ကရင်နှင့် မွန်တို့တွင် ၃ ရက်မှ ၄ ရက်ခန့်နှင့် နေပြည်တော်၊ စစ်ကိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ ရှမ်း၊ ချင်း၊ ရခိုင်နှင့် ကယားတို့တွင် ၁ ရက်မှ ၂ ရက်ခန့် မိုးထစ်ချုန်းရွာနိုင်ကြောင်း သိရသည်။

ယခုဧပြီလအတွင်း အယ်လ်နီညိုဖြစ်စဥ်ကြောင့် မြန်မာနိုင်ငံတစ် ဝန်းအပူချိန်မြင့်တက်လျက်ရှိရာ အပူချိန်စံချိန်သစ်တင်မြင့်တက် နေသည့် ဒေသများလည်း ရှိနေကြောင်း မိုးဇလ၏ ထုတ်ပြန်ချက်များအရ သိရသည်။