Pika (NSS) - ဧပြီ ၁၁

ယူကရိန်းအစိုးရအနေဖြင့် ယခင်က စိတ်ဓာတ်ဟောင်းများကို ချန်ထားခဲ့ကာ စစ်တပ်တွင် စစ်မှန်သော တန်းတူညီမျှမှုကို အကောင်အထည်ဖော်သင့်ကြောင်း ယူကရိန်း၏ ကျားမရေးရာပြဿနာများအတွက် စစ်ဘက်အကြံပေးအကြီးအကဲ Oksana Grigorieva က ထုတ်ဖော်ပြောဆိုခဲ့သည်။

ယူကရိန်းသည် လက်ရှိအချိန်တွင် ၎င်း၏စစ်မှုထမ်းစနစ်ကို ပြန်လည်ပြင်ဆင်နေကြောင်းသိရသည်။ လက်ရှိအချိန်တွင် အမျိုးသမီးများ စစ်မှုထမ်းရမည့် အစီအစဉ်များမရှိသေးသော်လည်း အဆိုပါကိစ္စနှင့်ပတ်သက်ပြီး အကြံပေးမှုများရှိခဲ့ကြောင်းသိရသည်။ Oksana Grigorieva က 'ကျွန်မတို့ရဲ့ ဖွဲ့စည်းပုံအခြေခံဥပဒေမှာ ယူကရိန်းမြေကို ကာကွယ်ဖို့ နိုင်ငံသားတိုင်းရဲ့တာဝန်ပဲဖြစ်ပါတယ်။ ဒါကြောင့် အမျိုးသမီးတွေလည်း စစ်မှုထမ်းသင့်ပါတယ်။ ဒီတိုင်းနေရုံနဲ့ ရုရှားကပျောက်ကွယ်သွားမှာမဟုတ်ပါဘူး။ အစ္စရေးလိုပဲ ကျွန်မတို့လည်း စစ်ပွဲအတွက်အဆင်သင့်ဖြစ်စေဖို့ အမျိုးသားနဲ့အမျိုးသမီးတွေကို လေ့ကျင့်သင်ကြားပေးသင့်ပါတယ်။"ဟုပြောဆိုခဲ့သည်။

ယူကရိန်းသည် ရှေ့တန်းစစ်မြေမျက်နှာပြင်တွင် ခဲယမ်းမီးကျည်ပြတ်လပ်မှုများ၊ တပ်ဖွဲ့ဝင်နည်းပါးမှုများကို ကြုံတွေ့နေရကြောင်း ယူကရိန်းထိပ်တန်း စစ်ဘက်အရာရှိအများအပြားက ဝန်ခံပြောဆိုခဲ့သည်။ လက်ရှိအချိန်တွင် ယူကရိန်းစစ်တပ်၌ အမျိုးသမီး (၄၅၀၀၀)ကျော် တာဝန်ထမ်းဆောင်နေကြောင်း ကာကွယ်ရေးဝန်ကြီးဌာနက ပြီးခဲ့သည့်လတွင် ထုတ်ပြန်ပြောဆိုခဲ့သည်။