ဂျန်ဇက် (NSS) - ဧပြီ ၉

ဖိလစ်ပိုင်သမ္မတ ဖာဒီနန်မာကိုစ့် ဂျူနီယာက တောင်တရုတ်ပင်လယ်အရေးအငြင်းပွားမှုတွေကို ဖြေလျှော့နိုင်ဖို့ရည်ရွယ်ပြီး တရုတ်အစိုးရနဲ့စေ့စပ်ဆွေးနွေးမှုတွေဆက်လက်လုပ်ဆောင်သွားမှာဖြစ်ကြောင်း ထုတ်ဖော်ပြောဆိုလိုက်ပါတယ်။

တရုတ်စစ်သင်္ဘောတွေဟာ တောင်တရုတ်ပင်လယ်အတွင်းမှာ ဖိလစ်ပိုင်ကမ်းခြေစောင့်တပ်ဖွဲ့ရဲ့သင်္ဘောတွေကို ဝင်တိုက်ခဲ့ပြီးနောက်နှစ်နိုင်ငံကြားတင်းမာမှုတွေမြင့်တက်လာခဲ့ကြောင်းသိရပါတယ်။ ဖိလစ်ပိုင်အစိုးရဟာ တရုတ်စစ်သင်္ဘောတွေရဲ့ ဝင်တိုက်မှုကိုမကျေနပ်တဲ့အတွက် မဟာမိတ်နိုင်ငံတွေဖြစ်တဲ့ အမေရိကန်၊ ဂျပန်၊ သြစတြေးလျနိုင်ငံတို့နဲ့ ပူးပေါင်းပြီး ပြီးခဲ့တဲ့ရက်ပိုင်းက အငြင်းပွားနေတဲ့ တောင်တရုတ်ပင်လယ်မှာ ပူးတွဲစစ်ရေးလေ့ကျင့်ခဲ့ပါတယ်။ ဖိလစ်ပိုင်သမ္မတက သင်္ဘောတွေကို ကြားဖြတ်ဟန့်တားနှောက်ယှက်တဲ့အဖြစ်အပျက်မျိုးထပ်မံမဖြစ်စေဖို့ တရုတ်နိုင်ငံနဲ့ဆွေးနွေးလိုကြောင်း တောင်တရုတ်ပင်လယ်အရေးနဲ့ပတ်သက်ပြီး တင်းမာမှုအရှိန်ပိုမိုမမြင့်စေဖို့ ရည်ရွယ်ပြီး တရုတ်ခေါင်းဆောင်တွေနဲ့ တွေ့ဆုံဆွေးနွေးဖို့ ရွေးချယ်စရာလမ်းကြောင်းအဖြစ်ရှိနေဆဲဖြစ်ကြောင်း ပြောပါတယ်။

တရုတ်နိုင်ငံက တောင်တရုတ်ပင်လယ်အတွင်းရှိ ပိုင်နက် နယ်မြေအားလုံးရဲ့ (၉၀)ရာခိုင်နှုန်းကို ၎င်းတို့ပိုင်ဆိုင်ကြောင်း ပြောဆိုထားပြီး ဖိလစ်ပိုင်အပါအဝင် အာဆီယံဒေသအတွင်းနိုင်ငံအချို့ နဲ့ ပိုင်နက်နယ်မြေအငြင်းပွားနေကြောင်း သိရပါတယ်။ ဖိလစ်ပိုင်နိုင်ငံကလည်း တောင်တရုတ်ပင်လယ်အတွင်းမှာ ၎င်းတို့ပိုင်နယ်နယ်မြေရှိနေကြောင်းပြောဆိုထားပြီး ၂၀၁၆ ခုနှစ်က နိုင်ငံတကာခုံရုံးမှာ တရားရင်ဆိုင်ချိန်အတွင်း ဖိလစ်ပိုင်နိုင်ငံ အနိုင်ရခဲ့ကြောင်းသိရပါတယ်။