Pika (NSS) - ဧပြီ ၉

အမေရိကန်က သတိပေးမှုများရှိနေသော်လည်း ဂါဇာကမ်းမြောင်ဒေသတောင်ပိုင်းရှိ ပါလက် စတိုင်းလူမျိုး(၁ ဒသမ ၄)သန်းခန့်ရှိသော ရာဖဲလ်မြို့ကို ထိုးစစ်ဆင်မှုအား လုပ်ဆောင်သွားမည်ဖြစ်ကြောင်း အစ္စရေးဝန်ကြီးချုပ်နေတန်ရာဟုက ထပ်မံကတိပြုခဲ့သည်။

နေတန်ရာဟုက 'ရာဖဲလ်မြို့ကို ထိုးစစ်ဆင်မှုက ဖြစ်လာပါလိမ့်မယ်'ဟု ပြောဆိုခဲ့သည်။သို့ သော်လည်း ထိုးစစ်ဆင်မှုနှင့်ပတ်သက်သည့် နောက်ထပ်အသေးစိတ်အချက်အလက်များကို နေတန်ရာဟုက ထုတ်ဖော်ပြောဆိုခဲ့ခြင်းမျိုးမရှိခဲ့ကြောင်းလည်း သိရသည်။ ရာဖဲလ်မြို့ကို ထိုးစစ်ဆင်ခြင်းသည် အမှားအယွင်းတစ်ခုဖြစ်လာလိမ့်မည်ဖြစ်ကြောင်း အမေရိကန်နိုင်ငံက သတိပေးပြောကြားထားသည်။ ထို့ပြင် အရပ်သားပြည်သူများကို ကာကွယ်ပေးမည့် ယုံကြည်စိတ်ချရသော အစီအစဉ်ကိုပြသရန် အစ္စရေးကို အမေရိကန်က တောင်းဆိုထားကြောင်းလည်းသိရသည်။ ဧပြီလ(၇)ရက်တွင် အစ္စရေးတပ်ဖွဲ့များသည် ဂါဇာကမ်းမြောင်ဒေသတောင်ပိုင်းရှိ Khan Younis မြို့မှ ပြန်လည်ဆုတ်ခွာခဲ့ကြောင်းလည်း သိရသည်။ ရာဖဲလ်မြို့ကို ထိုးစစ်ဆင်မှုမတိုင်မီ အစ္စရေးတပ်ဖွဲ့များအား ပြန်လည်အင်အားဖြည့်တင်းရန် လုပ်ဆောင်နေကြောင်း အစ္စရေးကာကွယ်ရေးအရာရှိများက ပြောကြားခဲ့သည်။

အစ္စရေး-ဟားမက်စစ်ပွဲစတင်ဖြစ်ပွားပြီးနောက် လက်ရှိအချိန်အထိ ပါလက်စတိုင်းလူမျိုး (၃၃၂၀၀)ဦး သေဆုံးထားကာ အခြားလူ(၇၆၀၀၀)နီးပါး ထိခိုက်ဒဏ်ရာရရှိခဲ့ကြောင်း ဂါဇာကမ်းမြောင်ဒေသရှိ ပါလက်စတိုင်းကျန်းမာရေးဝန်ကြီးဌာနက ပြောကြားခဲ့သည်။ ဂါဇာကမ်းမြောင်ဒေသတွင် သေဆုံးသူများ၏ (၃)ပုံ(၂)ပုံမှာ အမျိုးသမီးများနှင့် ကလေးငယ်များဖြစ်ကြောင်း ပါလက်စတိုင်းကျန်းမာရေးဝန်ကြီးဌာနက ပြောကြားခဲ့သည်။