ယွန်း (NSS) - ဧပြီ ၉

ကိုရီးယားနည်းပညာဖြင့် အမှိုက်များမှ မီသိန်းဓာတ်ငွေ့များ စုစည်းသန့်စင်ပြီး လျှပ်စစ်ထုတ်ယူနိုင်ရေး နှစ်နိုင်ငံဆွေးနွေးခဲ့ကြောင်း သိရသည်။

ရန်ကုန်မြို့တော်စည်ပင်သာယာရေးကော်မတီနှင့် ကိုရီးယားနိုင်ငံ GES Co.,Ltd တို့ ပူးပေါင်းဆောင်ရွက်သည့် နောက်ဆုံးစွန့်ပစ်အမှိုက်ပုံများမှ လျှပ်စစ်ထုတ်လုပ်ခြင်းစီမံကိန်း ဆွေးနွေးပွဲကို ပြီးခဲ့သည့်ရက်ပိုင်းတွင် ရန်ကုန်မြို့ရှိ Chatrium Hotel တွင် ကျင်းပခဲ့သည်။

ရန်ကုန်မြို့၏ မြို့ပြဖွံ့ဖြိုးတိုးတက်လာမှုနှင့် လူဦးရေတိုးတက်လာမှုများကြောင့် စွန့်ပစ်အမှိုက်ထွက်ရှိမှု ပမာဏသည် တစ်နှစ်ထက်တစ်နှစ် ပိုမိုမြင့်တက်လာကြောင်း ရန်ကုန်မြို့တော်စည်ပင်သာယာရေးကော်မတီဥက္ကဋ္ဌ(မြို့တော်ဝန်) ဦးဗိုလ်ဌေးက ဆိုသည်။

ရန်ကုန်မြို့၌ တစ်ရက်လျှင် စွန့်ပစ်အမှိုက် တန်(၂၅၀၀) ခန့်ထွက်ရှိနေပြီး အဆိုပါအမှိုက်များကို မြို့တော်အတွင်းမှ သိမ်းဆည်းသယ်ယူ၍ နောက်ဆုံးစွန့်ပစ် အမှိုက်ပုံများတွင် ဖိကြိတ်ကာ အမှိုက်တစ်လွှာမြေတစ်လွှာဖြင့် ဆောင်ရွက်လျက်ရှိကြောင်း သိရသည်။

ထို့ပြင် နောက်ဆုံးစွန့်ပစ်အမှိုက်ပုံများတွင် မြေနေရာရှားပါးခြင်း နှင့် အမှိုက်များကို လျော့ နည်းစေရန် သဘာဝမြေဆွေးပြုလုပ်ခြင်းများကိုလည်းဆောင်ရွက်လျက်ရှိပြီး အောင်းပူကြောင့် မီးလောင်မှုမဖြစ်စေရေး မီသိန်းဓာတ်ငွေ့များအားပိုက်များဖြင့် ထုတ်လွှတ်ထားသည်ကို အကျိုးရှိစွာ အသုံးပြုရန်ဆွေးနွေးခဲ့ကြောင်း သိရသည်။

ထိုသို့ ဆွေးနွေးရာတွင် ကိုရီးယားနိုင်ငံ၊ GES Co.,Ltd ၏ နည်းပညာဖြင့် မီသိန်းဓာတ်‌ငွေ့များ စုစည်းသန့်စင်ပြီး လျှပ်စစ်ထုတ်ယူနိုင်ရေးကို ဆွေးနွေးဆောင်ရွက်ခဲ့ကြောင်း ရန်ကုန်မြို့တော်စည်ပင်ထံမှ သိရသည်။