ယွန်း(NSS) - ဧပြီ ၈

လာမည့် ရက်ပိုင်းအတွင်း တိုင်းဒေသကြီး နှင့် ပြည်နယ်အချို့တွင် မိုးထစ်ချုန်းရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။

မိုးဇလမှ ယနေ့(ဧပြီ ၈ ရက်)တွင် ထုတ်ပြန်သည့် အချိန်အခါမဟုတ် မိုးရွာနိုင်မည့် သတိ ပေးချက်တွင် အထက်ပါကဲ့သို့ အသိပေးထားခြင်းဖြစ်သည်။

မိုးဇလ၏တိုင်းထွာချက်များအရ လာမည့် ဧပြီ(၁၀)ရက်နှင့် ဧပြီ(၁၂)ရက်အတွင်း အရှေ့ဘက်မှရွေ့လျားလာသည့် တိမ်တိုက်များနှင့် အပူပျံတက်တိမ်များ ဖြစ်ထွန်းမှု အားကောင်းခြင်းကြောင့် မိုးထစ်ချုန်းရွာသွန်းနိုင်ကြောင်း သိရသည်။ ထို့ပြင် အနောက်ဘက်မှ ‌ရွေ့လျားလာသော လေပွေလှိုင်းများ၏အရှိန်ကြောင့် တနင်္သာရီ၊ ကရင်နှင့် မွန်တို့တွင် မိုးထစ်ချုန်းရွာသွန်းနိုင်ကြောင်း မိုးဇလက ဆိုထားသည်။

အလားတူ စစ်ကိုင်းတိုင်းအထက်ပိုင်း၊ ပဲခူး၊ ကချင်၊ ရှမ်းပြည်(အရှေ့ပိုင်း)နှင့် ကယားတို့တွင်လည်း နေရာကွက်ကျား မိုးထစ်ချုန်းရွာသွန်းနိုင်ကြောင်း မိုးဇလက အသိပေးထားသည်။

ထို့ကြောင့် ပြည်သူများအနေဖြင့် အချိန်အခါမဟုတ်မိုးရွာခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းများကို သတိပြု၍နေထိုင်ရန် မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

ယခုဧပြီလအတွင်း အယ်လ်နီညိုဖြစ်စဥ်ကြောင့် မြန်မာနိုင်ငံတစ်ဝန်းအပူချိန်မြင့်တက်လျက်ရှိရာ အပူချိန်စံချိန်သစ်တင်မြင့်တက်နေသည့်ဒေသများလည်း ဖြစ်ပေါ်လျက်ရှိကြောင်း မိုးဇလ၏ ထုတ်ပြန်ချက်များအရ သိရသည်။