စော (NSS) - ဧပြီ ၈

တက္ကသိုလ်ဝင်စာမေးပွဲအောင်စာရင်းမှလွဲ၍ ကျန်အတန်းများ၏ အောင်စာရင်းများကို ဧပြီလ ၂၇ ရက်နေ့တွင် ကြေညာမည်ဖြစ်ကြောင်း သိရသည်။

၂၀၂၃-၂၀၂၄ ပညာသင်နှစ်၊ Grade 1 မှ Grade 11 အထိ စာမေးပွဲအောင်စာရင်းများကို လာမည့် ဧပြီလ (၂၇)ရက်နေ့တွင် ထုတ်ပြန်ကြေညာသွားမည်ဖြစ်ကြောင်း သိရသည်။

“၂၇ ရက်နေ့ကို ကျောင်းတိုင်းမှာ ကပ်ပေးမှာ။ ဖွင့်လို့ရတဲ့ကျောင်းတွေတော့ပါမှာပေါ့။ ဖွင့်လို့မရတဲ့ကျောင်းတွေတော့မပါဘူး။ အဲဒီလိုရှိတာပေါ့”ဟု အခြေခံပညာအထက်တန်းကျောင်းမှ ဆရာမတစ်ဦး NSS ကိုပြောသည်။

အဆိုပါ အောင်စာရင်းထွက်ရှိရာတွင် ကယားပြည်နယ်နှင့် ရခိုင်ပြည်နယ်တို့ မပါဝင်ကြောင်း လတ်တလောသတင်းများအရ သိရသည်။ ၂၀၂၃-၂၀၂၄ ပညာသင်နှစ်အတွင်း နိုင်ငံတစ်ဝန်းလုံးရှိ အခြေခံကျောင်းများအနေဖြင့် ကျောင်းအပ်နှံသူ (၈၁၀၈၂၂၇) ဦးရှိခဲ့ပြီး ကျောင်းသား/ကျောင်းသူ (၆၇၆၇၇၆၃) ဦးသာ ကျောင်းတက်ခဲ့ကြောင်း သိရသည်။

အကြောင်းအမျိုးမျိုးကြောင့် ကျောင်းတက်ရန် ပျက်ကွက်သူ (၁၃၄၀၄၆၄) ဦးရှိပြီး ရာခိုင်နှုန်းအားဖြင့် ၁၆ ဒသမ ၅၃ ရာခိုင်နှုန်းဖြစ်ကြောင်း သိရသည်။ ပျက်ကွက်သည့်ဒေသများသည် ကရင်ပြည်နယ်ရှိ ဒေသအချို့၊ ချင်းပြည်နယ်၊ ကယားပြည်နယ်၊ ရခိုင်ပြည်နယ် နှင့် ရှမ်းပြည်နယ် (မြောက်ပိုင်း) ဒေသတို့ဖြစ်ကြောင်း သိရသည်။