ယွန်း (NSS) - ဧပြီ ၈

တရားမဝင်ဖွင့်လှစ်ထားသည့် အလှအပဆိုင်ရာဆေးခန်းများကြောင့် ပြည်သူများတွင် နစ်နာမှုများရှိနေပြီး စိစစ်အရေးယူမှုများ ဆောင်ရွက်နေကြောင်း သိရသည်။၊

ကျန်းမာရေးဝန်ကြီးဌာန၊ ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက ဧပြီ(၇)ရက်တွင် ဆေးသုတေသနဦးစီးဌာန၊ အစည်းအဝေးခန်းမ၌ ကျင်းပခဲ့သည့် တွေ့ဆုံပွဲတွင် အထက်ပါကဲ့သို့ ပြောကြားခဲ့ခြင်းဖြစ်သည်။

နိုင်ငံတော်အစိုးရအနေဖြင့် ပုဂ္ဂလိကကျန်းမာရေးကဏ္ဍဖွံ့ဖြိုးတိုးတက်ရေးအတွက် အားပေးဆောင်ရွက်နေပြီး ပုဂ္ဂလိက ကျန်းမာရေးလုပ်ငန်းများကို ဥပဒေနှင့်အညီ စနစ်တကျတည် ထောင်ဖွင့်လှစ်နိုင်ရေးအတွက် ထိန်းကျောင်းဆောင်ရွက်လျက်ရှိကြောင်း သိရသည်။

ထို့ပြင် စက်မှုဝန်ကြီးဌာနမှ မြန်မာနိုင်ငံဆေးဝါးစက်ရုံမှ ဆေးဝါးများထုတ်လုပ်လျက်ရှိပြီး ပြည်တွင်းပုဂ္ဂလိကဆေးဝါးထုတ်လုပ်သည့် လုပ်ငန်းရှင်များကလည်း ဆေးဝါးများထုတ်လုပ်နေသည့်အတွက် ပြည်တွင်း၌ထုတ်လုပ်သည့်ဆေးဝါးများကို အဓိကထားဝယ်ယူ စေကြောင်း ပြည်ထောင်စုဝန်ကြီးက ပြောသည်။

အလားတူ တရားမဝင်ဖွင့်လှစ်ထားသည့် အလှအပဆိုင်ရာဆေးခန်းများကြောင့် ပြည်သူလူထုဆုံးရှုံးနစ်နာမှုများရှိနေပြီး စိစစ်အရေးယူမှုများ ဆောင်ရွက်နေကြောင်း ပြည်ထောင်စုဝန်ကြီးက ပြောသည်။ ထို့ပြင် အမျိုးသားကျန်းမာရေးအာမခံစနစ်‌ ပေါ်ပေါက်စေရေးကိုလည်း ကြိုးပမ်းဆောင်ရွက်သွားမည်ဖြစ်ပြီး ဆောင်ရွက်နေဆဲကာလ၌ ပုဂ္ဂလိကကျန်းမာရေး လုပ်ငန်းများအနေဖြင့်လည်း နည်းလမ်းမှန်စွာဖြင့် ဖွံ့ဖြိုးတိုးတက်ရန် လိုအပ်ကြောင်း သိရသည်။

ပြည်သူများအနေဖြင့် ပြည်ပသို့သွားရောက်ဆေးကုသခြင်းကြောင့် နိုင်ငံခြားငွေသုံးစွဲမှု လျော့နည်းစေရေးနှင့် ပြည်သူများကုန်ကျရသော ကျန်းမာရေးအသုံးစရိတ် လျော့နည်းစေရေးအတွက် ပြည်သူ့ဆေးရုံများ၌ သာမက ပုဂ္ဂလိကဆေးရုံများကလည်း နိုင်ငံတကာအဆင့်မီရေး မြှင့်တင်ဆောင်ရွက်ရန် ဒေါက်တာသက်ခိုင်ဝင်းက တိုက်တွန်းပြောကြားသည်။