ယွန်း (NSS) - ဧပြီ ၇

ယခုနှစ် (၂၀၂၄ ခုနှစ်) အင်းလေးရေပေါ်သင်္ကြန်ကို အင်းလေးရေလယ်ဧည့်ခန်းမတွင် စည်ကားစွာ ကျင်းပသွားမည် ဖြစ်ကြောင်း ဟိုတယ်နှင့် ခရီးသွားလာရေးဝန်ကြီးဌာနထံ မှ သိရသည်။

ဟိုတယ်နှင့်ခရီးသွားလာရေးဝန်ကြီးဌာနမှ ယမန်နေ့(ဧပြီ ၆ ရက်)တွင် အထက်ပါကဲ့သို့ အသိပေးထားခြင်းဖြစ် သည်။

အင်းလေးရေပေါ်သင်္ကြန်ပွဲတော်ကို ပြီးခဲ့သည့် ၂၀၁၉ ခုနှစ်တွင် စတင်ကျင်းပခဲ့ခြင်းဖြစ်ပြီး ၂၀၂၀ ပြည့်နှစ်မှစ၍ ကိုဗစ် ကပ်‌ရောဂါ အပါအဝင် အကြောင်းအမျိုးမျိုးကြောင့် ရပ်နားထားခဲ့ရာ ၂၀၂၃ ခုနှစ်တွင် ဒုတိယအကြိမ် ပြန်လည်ကျင်းပခဲ့ခြင်းဖြစ်သည်။

ရေပေါ်သင်္ကြန်ပြန်လည် ကျင်းပခဲ့သည့် ၂၀၂၃ ခုနှစ်တွင် ခရီးသွားဧည့်သည်များ ပြန်လည်ဝင်ရောက်လာခဲ့ပြီး ဒေသခံပြည်သူများ၏ ဟိုတယ်လုပ်ငန်း၊ စားသောက်ဆိုင်လုပ်ငန်း၊ စက်လှေအငှားပို့ဆောင်မှုလုပ်ငန်း၊ အမှတ်တရ ပစ္စည်းရောင်းချသည့် လုပ်ငန်းများ ဝင်ငွေတိုးတက်ရရှိခဲ့ကြောင်း ဝန်ကြီးဌာနမှ သိရသည်။

ယခု ၂၀၂၄ ခုနှစ်တွင်လည်း အင်းလေးရေပေါ်သင်္ကြန်ပွဲတော်ကို ရိုးရာအကအလှဖျော်ဖြေမှုများ၊ စတုဒီသာကျွေးမွေး မှုများနှင့် အသစ်ပြန်လည်ပြင်ဆင်ထား သည့် ရေလယ်ဧည့်ခန်းမတွင် ဧပြီ(၁၃)ရက် (သင်္ကြန်အကြိုနေ့) မှ ဧပြီလ (၁၆)ရက် (သင်္ကြန်အတက်နေ့)အထိ စည်ကားစွာ ကျင်းပပြုလုပ်သွားမည်ဖြစ်ကြောင်း သိရသည်။

“အရင်ကတော့ နမ့်ပန်ဘက်မှာလုပ်တာ။ အခုကတော့ ဝန်ကြီးချုပ်ပြောင်းထားတော့ နေရာသစ်မှာလုပ်တာ ထင်တယ်။ တောင်ကြီးဘက်မှာတောင် မဏ္ဍပ်တွေ နေရာပြောင်းသွားတာလေ။ နေရာအပြောင်းအလဲဖြစ်သွားတာ ပေါ့” ဟု ရှမ်းပြည်နယ်တောင်ပိုင်း ရိုးရာမီးပုံးပျံပညာရှင်များအသင်းမှ တာဝန်ရှိသူတစ်ဦးက NP News ကို ပြောသည်။

ရေပေါ်သင်္ကြန်ပွဲတော်တွင် အင်းလေကန်အတွင်း လှေ၊ သမ္ဗာန်များ၊ ဖောင်များဖြင့် ရေများပတ်ဖြန်းကြပြီး တေးသီချင်းများဖြင့် ဖျော်ဖြေတင်ဆက်သည့် ရေပေါ်အဆိုပွဲများ၊ ယိမ်းအကများ အပါအဝင် တိုင်းရင်းသားရိုးရာ အကပြိုင်ပွဲလည်း ပါဝင်ကြောင်း သိရသည်။