မြူနစ် (NSS) - ဧပြီ ၆

ဆက်သွယ်ရေးတာဝါတိုင် ဖျက်ဆီးခံရမှုကြောင့် ကရင်ပြည်နယ်၊ မြဝတီမြို့တွင် ဆက်သွယ်ရေးကွန်ရက်များ ပြတ်တောက်နေပြီး မြို့အခြေအနေသည် ပုံမှန်အတိုင်းတည်ငြိမ်လျက်ရှိကြောင်း ဒေသခံများထံမှ သိရသည်။

မြဝတီမြို့တွင် ယနေ့(ဧပြီ ၆ ရက်) နံနက်ပိုင်းမှစ၍ ဆက်သွယ်ရေးကွန်ရက်များမှာ ပြတ်တောက်သွားခဲ့ခြင်းဖြစ်ပြီး ယင်းကဲ့သို့ ပြတ်တောက်နေမှုနှင့်အတူ ကောလာဟလသတင်းများလည်း ပျံ့နှံ့နေလျက်ရှိသည်။

“တာဝါတိုင်တွေ အချိုးခံရလို့ ဖုန်းလိုင်းတွေက ပြတ်တောက်နေတာ။ ဒါပေမဲ့ ဒီဘက်မှာက ထိုင်းကတ်တွေနဲ့ အသုံးပြုလို့ရတယ်။ တစ်ချို့လည်း သုံးနေကြတာရှိတယ်။ အခုညနေပိုင်းအထိတော့ မြဝတီက ပုံမှန်ပါပဲ။ တည်တည်ငြိမ်ငြိမ် ရှိနေပါတယ်”ဟု မြဝတီမြို့တစ်ဦးက ပြောသည်။

KNLA၊ PDF ပူးပေါင်းအဖွဲ့သည် မြဝတီမြို့အနီးရှိ တပ်မတော်၏ ခမရ (၂၇၅)ကို ဝိုင်းဝန်းပိတ်ဆို့ထားသည့်အခြေအနေရှိကြောင်းလည်း သိရသည်။

ကရင်ပြည်နယ်၊ သင်္ဃန်းညီနောင်ရှိ တပ်မတော်၏ ဗျုဟာကုန်းကို KNLA၊ PDF ပူးပေါင်းအဖွဲ့သည် အင်အားအလုံးအရင်းဖြင့် ဧပြီ ၅ ရက်တွင် ဝင်တိုက်ကာ သိမ်းပိုက်နိုင်ခဲ့ကြောင်း ကရင်အမျိုးသားအစည်းအရုံး(KNU)၏ လက်နက်ကိုင်အဖွဲ့ဖြစ်သည့် KNLA က ထုတ်ပြန်ထား သည်ကို တွေ့ရသည်။

“သင်္ဃန်းညီနောင် ဗျူဟာကုန်းကို KNLA ဘက်က အင်အားတော်တော်များများနဲ့ ဝင်တိုက်တယ်လို့ သိရတယ်။ အင်အားများတော့ တပ်ဘက်ကလည်း နောက်ဆုတ်ပေးလိုက်တယ်လို့ ကြားတယ်”ဟု အမည်မဖော်လိုသော ဒေသခံတစ်ဦးက ပြောသည်။

အထက်ပါအခြေအနေများနှင့်ပတ်သက်၍ မေးမြန်းရန် NP News အနေဖြင့် နစကပြောခွင့်ရ ဗိုလ်ချုပ်ဇော်မင်းထွန်းထံသို့ ဧပြီလ ၆ ရက် ညနေ ၆ နာရီအချိန်ထိ ဆက်သွယ်ခဲ့သော်လည်း အဆက်အသွယ်မရရှိခဲ့ပေ။