ရောင်နီ (NSS) - ဧပြီ ၆ 

စိတ်ဝင်စားစရာ တူးမြောင်းများ၊ ရင်သပ်ရှုမောစရာ အနုပညာလက်ရာတွေကြောင့် ကမ္ဘာလှည့်ခရီးသွားတွေကြား နာမည်ကျော်တဲ့ အီတလီနိုင်ငံရဲ့ဗင်းနစ်မြို့ဟာ လာမယ့် ဧပြီလ ၂၅ ရက်မှစ ဝင်ကြေး ၅ ယူရို စကောက်ခံသွားမယ် လို့ သိရပါတယ်။     

ဧပြီလ ၂၅ ရက်မှစ ဗင်းနစ်ကို နေ့ချင်းပြန်လာရောက်မယ့် ခရီးသည်တွေဟာ ၅ ယူရို ပေးဆောင်ရမှာဖြစ်ပြီး ဗင်းနစ် ကို လာရောက်လည်ပတ်သူအားလုံး သတ်မှတ်ထားတဲ့ရက်တွေမှာ မြို့တွင်းရောက်ရှိနေမှု စာရင်းသွင်းရမှာ ဖြစ်တယ်လို့ သိရပါတယ်။ 

မြို့တော်ဘတ်ဂျက်နဲ့ စီးပွားရေးဆိုင်ရာတာဝန်ခံမစ္စတာမစ်ရှဲလ်ဇွန်က “ဒီလိုလုပ်ရခြင်း ရည်ရွယ်ချက်ကတော့ ခရီးသွားအရေအတွက် ပိုမိုကောင်းမွန်အောင် စီမံခန့်ခွဲပြီး အစုလိုက်အပြုံလိုက်ခရီးသွားခြင်းကို ဖြေရှင်းနိုင်ဖို့ပါပဲ၊ ဒါက ဒီမြို့ရဲ့နေထိုင်မှုအခက်အခဲကို ဖန်တီးပေးတာပါ” လို့ ပြောကြားခဲ့ပါတယ်။ ဗင်းနစ်မှာ ညအိပ်တဲ့ ဧည့်သည် တွေဟာ အခကြေးငွေပေးဆောင်ရမှာ မဟုတ်သလို အလုပ်သွားဖို့၊ ဆွေမျိုးတွေဆီ သွားလည်တာ ဒါမှမဟုတ် လေ့လာဖို့ ခရီးသွားသူတွေအတွက်လည်း ကောက်ခံမှာ မဟုတ်ဘူးလို့ ဆိုပါတယ်။ 

ဒါ့အပြင် မြို့မှာ မွေးဖွားခဲ့သူ မည်သူမဆို နဲ့ အသက် ၁၄ နှစ်အောက် အရွယ်မရောက်သေးသူတွေလည်း ကင်းလွတ်ခွင့်ရှိမယ်လို့ သိရပါတယ်။         

ဗင်းနစ်ဟာ ရာသီဥတုဖောက်ပြန်မှုနဲ့ ပင်လယ်ရေမြင့်တက်မှုတို့အပြင် အစုလိုက်အပြုံလိုက် ခရီးသွားလုပ်ငန်း ကြောင့် မြို့ရဲ့အနုပညာလက်ရာတွေနဲ့ အလှအပတွေမှာ ပျက်စီးစ ပြုလာနေပြီး ၎င်းကို ကာကွယ်ဖို့ ရုန်းကန်နေရ ပါတယ်။ Venetian ရေကန်ရဲ့အတွင်းတူးမြောင်းတွေမှာ အပျော်စီးသင်္ဘောလှေများ ဝင်ရောက်ခွင့်ကိုလည်း တားမြစ်ထားပါတယ်။ 

ဗင်းနစ်ကို မလာခင် ဝင်ဆိုဒ်မှာ စာရင်းသွင်းရမှာပြီး  QR code ရယူရမှာဖြစ်ပြီး မြို့မဝင်ခင် အဆိုပါ QR code ကို ပြသနိုင်ဖို့ လိုအပ်ပါမယ်။ QR code မပါဘဲ လာရောက်မယ် ဆိုရင်တော့ ဒဏ်ငွေ ယူရို ၅ဝ မှ ယူရို ၃ဝဝ ကြားနဲ့ ပေးဆောင်ရမယ်လို့ သိရပါတယ်။