သန့်ဇင် (NSS) - မတ် ၂၆

၂၀၂၆ ကမ္ဘာ့ဖလားခြေစစ်ပွဲအဖြစ် ယနေ့ည ယှဉ်ပြိုင်မည့် ဆီးရီးယားအသင်းနှင့် အဝေးကွင်းပွဲစဉ်တွင် မြန်မာ့ လက်ရွေးစင်ဘောလုံးအသင်း၏ ကစားသမားတစ်ချို့ ဖျားနာခြင်းနှင့်ဒဏ်ရာပြဿနာများရှိနေကြောင်း မြန်မာ့လက်ရွေးစင်ဘောလုံးအသင်းနည်းပြချုပ်က ပြောကြားခဲ့သည်။

မြန်မာ့လက်ရွေးစင်ဘောလုံးအသင်းနည်းပြချုပ်က Miachel Feichtenbeinerက  ယမန်နေ့ (မတ်လ ၂၇ ရက်)၊ နံနက်အစောပိုင်း ၁ နာရီ ၃ဝ မိနစ် အချိန်တွင် ဆော်ဒီအာရေဗျနိုင်ငံ၊ ဒါမန်းမြို့ရှိ Prince Mohamed bin Fahd အားကစားကွင်းတွင် ယှဉ်ပြိင်ကစားသွားကြမည့် မြန်မာ့လက်ရွေးစင်ဘောလုံးအသင်းနှင့် ဆီးရီးယားလက်ရွေးစင် ဘောလုံးအသင်းတို့၏ ပွဲကြိုသတင်းစာရှင်းလင်းပွဲတွင် အထက်ပါကဲ့သို့ထုတ်ဖော်ပြောကြားခဲ့ခြင်းဖြစ်ကြောင်း သိရသည်။

အဆိုပါပွဲစဉ်တွင် မြန်မာ့လက်ရွေးစင်ဘောလုံးအသင်းအနေဖြင့် ပြီးခဲ့သည့်အိမ်ကွင်း၌ ပါဝင်ကစားခဲ့သော တိုက်စစ်မှူးကျော်ကိုကို အပြင် ကစားသမားအချို့မှာ တစ်ဦးချင်းပြဿနာများကြောင့် ပါဝင်လာနိုင်ခြင်းမရှိ ကြောင်း သိရသည်။

"မနက်ဖြန် ဆီးရီးယားနဲ့ ဒုတိယအကျော့အတွက် ကျွန်တော်တို့ပြဿနာတချို့ ကြုံတွေ့နေရပါတယ်။ အိမ်ကွင်း ပွဲစဉ်မှာ ရရှိခဲ့တဲ့ဒဏ်ရာကြောင့် တချို့ကစားသမားတွေ ပါဝင်ကစားနိုင်ဖို့က သံသယရှိနေရဆဲပါ။ ကံမကောင်းစွာ နဲ့ပဲ တချို့ကစားသမားတွေကလည်း ဖျားနာနေကြပြန်ပါတယ်။ ဒါကြောင့် ဖျားနာနေတဲ့သူ ဒဏ်ရာရှိနေတဲ့သူတွေ ကို အသုံးပြနိုင်မှာ မဟုတ်ဘူးလို့ တွေးထားပါတယ်။ နောက်ပြီး ကစားသမားတစ်ဦးကလည်း ပွဲပယ်ကြောင့် ကျန်နေခဲ့ရတယ်။ ဒါကြောင့် အခုအချိန်မှာ အသင်းက တစ်ဦးချင်း ပြဿနာတချို့နဲ့ ရင်ဆိုင်နေရပါတယ်။ ဘယ်လိုပဲဖြစ်ဖြစ် ကျွန်တော်တို့အနေနဲ့ အိမ်ကွင်း ပထမပွဲမှာလိုပဲ စွမ်းဆောင်မှုကောင်းတွေ ထပ်မံ ရယူပေးနိုင် မယ်လို့ မျှော်လင့်ထားပါတယ်” ဟု မြန်မာ့လက်ရွေးစင်ဘောလုံးအသင်းနည်းပြချုပ် Miachel Feichtenbeiner က ပြောခဲ့သည်။

မြန်မာ့လက်ရွေးစင်ဘောလုံးအသင်းအနေဖြင့် ယနေ့ည ဆီးရီးယားနှင့်ယှဉ်ပြိုင်မည့် ကစားသမား ၂၂ ဦးစာရင်း စာရင်းတွင်  ဂိုး- ပြည့်ဖြိုးအောင်၊ ဆန်းဆက်နိုင်၊ ကျော်ဇင်ဖြိုး၊ နောက်တန်း- ဟိန်းဇေယျာလင်း၊ ဒေးဗစ်ထန်၊ ကောင်းထက်ပိုင်၊ ငြိမ်းချမ်း၊ ဟိန်းဖြိုးဝင်း၊ စိုးမိုးကျော်၊ သက်ဟိန်းစိုး၊ ဇွဲခန့်မင်း၊ ခွန်ကျော်ဇင်ဟိန်း၊ အလယ်တန်း- ရန်နိုင်ဦး၊ ဇော်ဝင်းသိန်း၊ ကျော်မင်းဦး၊ နေမိုးနိုင်၊ လွင်မိုးအောင်၊ ဟိန်းထက် အောင်၊ရှေ့တန်း - အောင်သူ၊ မောင်မောင်လွင်၊ အောင်ကောင်းမန်၊ ဥက္ကာနိုင်တို့ ပါဝင်လာခဲ့ကြောင်း သိရသည်။

မြန်မာ့လက်ရွေးစင်ဘောလုံးအသင်းအနေဖြင့် ပြီးခဲ့သည့် အိမ်ကွင်းပွဲစဉ်တွင် ဆီးရီးယားအသင်းကို ကောင်းမွန် သောကစားပုံဖြင့် သရေ တစ်မှတ်ရရှိအောင်ကစားနိုင်ခဲ့သဖြင့် အနိုင်ရမှတ်လိုအပ်နေသည့် ဆီးရီးယား အသင်းကို အဝေးကွင်းပွဲစဉ်ဖြစ်သည့်အလျှောက် ခက်ခဲစွာယှဉ်ပြိုင်ကစားသွားရဖွယ်ရှိနေသည်။