ယွန်း (NSS) - မတ် ၂၄

ဝါရင့်သရုပ်ဆောင်တစ်ဦးဖြစ်သည့် မြင်စိုင်းသားအောင်အောင် ယနေ့ မတ်လ ၂၄ ရက် နံနက်ပိုင်းတွင် ကွယ်လွန်ခဲ့ကြောင်း အနုပညာရှင်အသိုင်းအဝိုင်းထံမှ သိရသည်။

သရုပ်ဆောင်မြင်စိုင်းသားအောင်အောင်သည် ယနေ့(မတ်လ ၂၄ ရက်) နံနက် ၉ နာရီခွဲအချိန်ခန့်တွင် နှလုံးရောဂါဖြင့် ကွယ်လွန်ခဲ့ခြင်းဖြစ်ပြီး ကွယ်လွန်ချိန်တွင် အသက် (၇၄)နှစ်အရွယ်ရှိပြီဖြစ်ကြောင်း သိရသည်။

“အဓိကတော့ စိတ်မကောင်းပါဘူး။ မင်းသားစဖြစ်ထဲက ကျွန်တော်တို့နဲ့လက်တွဲခဲ့တာဆိုတော့ နှစ်ပေါင်းများစွာလည်းကြာခဲ့ပါပြီ။ မင်းသားအဖြစ်လည်း အောင်မြင်ခဲ့တဲ့ လူတစ်ယောက်လေနော်။ ကျန်တဲ့ အခန်းတွေရိုက်တဲ့အခါမှာလည်း အောင်မြင်မှုတွေရခဲ့တာလေ။ ဒါကြောင့် ဒီလိုအနုပညာရှင်တစ်ယောက်အတွက် ကျွန်တော်တို့အထူးဝမ်းနည်းကြေကွဲခဲ့ရပါတယ်။ ဘယ်မှာ ဆုံးတာလဲတော့ သေချာမသိသေးပါဘူး။ ဆေးရုံတက်နေရတာတော့ အကြာကြီးပဲ” ဟု မြန်မာနိုင်ငံရုပ်ရှင်အစည်းအရုံးဥက္ကဋ္ဌ ဦအေးကြူလေးက NP News ကို ပြောသည်။

၎င်းသေဆုံးမှုနှင့်ပတ်သက်၍ သမီးဖြစ်သူသရုပ်ဆောင်ဟေမာန်အောင်အောင်က “အဖေ့အတွက် စိတ်ချမ်းသာပါတယ်။ အမေနဲ့သူတွေ့ရပြီမို့” ဟု လူမှုကွန်ရက်စာမျက်နှာတွင် ရေးသားထားသည်။

မြင်စိုင်းသားအောင်အောင်သည် ၎င်းရိုက်ကူးခဲ့သည့် “မြင်စိုင်းသား”ဇာတ်ကားဖြင့် အောင်မြင်မှုများရရှိလာခဲ့ခြင်းဖြစ်ပြီး လူသိများထင်ရှားသည့် သရုပ်ဆောင်တစ်ဦးလည်းဖြစ်သည်။