မြူနစ် (NSS) - မတ် ၂၃

လူသားချင်းစာနာမှုဆိုင်ရာအကူအညီပေးရေးနှင့် ငြိမ်းချမ်းရေးကိစ္စရပ်များကို တပ်မတော်နေ့အပြီးတွင် EAO အဖွဲ့များနှင့် နစကတို့ တွေ့ဆုံဆွေးနွေးမည်ဖြစ်ကြောင်း သတင်းရရှိသည်။

လာမည့် မတ်လ ၂၇ ရက်နေ့တွင် ကျရောက်မည့် တပ်မတော်နေ့အခမ်း အနားသို့ တက်ရောက်ရန်အတွက် တိုင်းရင်းသား လက်နက်ကိုင်အဖွဲ့များကို နစကဘက်က ဖိတ်ကြားထားကြောင်း KNU/KNLA-PC မှ ဗိုလ်မှူးကြီးစောကျော်ညွန့်က NSS ကို ပြောသည်။

“ဖိတ်ပါတယ်။ တစ်ဖွဲ့ချင်းစီကို လိပ်မူပြီးတော့ ဖိတ်ပါတယ်။ PPST အနေနဲ့လည်း ဖိတ်တာမဟုတ်ဘူး။ 7 EAO Alliance အနေနဲ့လည်း ဖိတ်တာ မဟုတ်ပါဘူး။ တစ်ဖွဲ့ချင်းစီကို ဖိတ်ပါတယ်။ တစ်ဖွဲ့ချင်းစီရဲ့ လွတ်လွတ်လပ်လပ်ဆုံးဖြတ်ခွင့်နဲ့ သွားကြ မယ်ထင်ပါတယ်။ ဘယ်နှစ်ဖွဲ့ကို ဖိတ်ထားတယ်ဆိုတာတော့ ကျွန်တော်လည်း အသေအချာမသိနိုင်ပါဘူး” ဟု ဗိုလ်မှူးကြီး စောကျော်ညွန့်က ပြောသည်။

ထိုသို့ တပ်မတော်နေ့အခမ်းအနားအပြီး မတ် ၂၈ ရက်တွင် နေပြည်တော်၌ အခမ်းအနားသို့ တက်ရောက်လာသည့် တိုင်း ရင်းသားလက်နက်ကိုင်အဖွဲ့များနှင့် နစက၏ NSPNC တို့ကြား တွေ့ဆုံဆွေးနွေးသွားရန်ရှိကြောင်းလည်း ၎င်းက ဆက်လက်ပြောသည်။ အဆိုပါတွေ့ဆုံပွဲ၌ လူသားချင်စာနာထောက်ထားမှုဆိုင်ရာအကူအညီပေးရေးနှင့် ငြိမ်းချမ်းရေးကိစ္စရပ်များကို ဆွေးနွေးသွားဖွယ်ရှိကြောင်း သိရသည်။

“၂၈ ရက်နေ့ကျရင် တွေ့ဆုံပွဲတစ်ခုရှိတယ်လို့တော့ ကျွန်တော်တို့ ကြားသိရတာ ရှိတယ်။ ကျွန်တော်တို့ EAO အဖွဲ့တွေက လည်းပဲ အခုနလိုမျိုးပေါ့ တစ်ဖွဲ့ချင်းစီကို ဖိတ်တော့ ဘယ်နှစ်ဖွဲ့ သွားနိုင်နိုင်မလဲဆိုတာကိုတော့ မသိဘူး။ ဒါပေမယ့် တပ်မ တော်နေ့အခမ်းအနားလာတက်တဲ့ EAO ခေါင်းဆောင်တွေနဲ့ ဆွေးနွေးပွဲတစ်ခုရှိတယ်။ အဲဒီဆွေးနွေးပွဲကတော့ လူသားချင် စာနာထောက်ထားမှုဆိုင်ရာအကူအညီပေးရေးကိစ္စရပ်နဲ့ ငြိမ်းချမ်းရေးကိစ္စရပ်ပေါ့လေ။ အဲဒီလိုမျိုး သိရတာတော့ ရှိပါတယ်” ဟု ဗိုလ်မှူးကြီးစောကျော်ညွန့်က ပြောသည်။

တိုင်းရင်းသားလက်နက်ကိုင်အဖွဲ့များဖြစ်သော RCSS၊ NMSP၊ KNU/KNLA-PC၊ LDU၊ ALP၊ PNLO နှင့် DKBA တို့ (၇)ဖွဲ့ သည် လက်ရှိနစကအစိုးရနှင့် ပြီးခဲ့သောကာလများ၌ တွေ့ဆုံဆွေးနွေးမှုများ ရှိခဲ့ဖူးသည်။