Pika (NSS) - မတ် ၂၃

တောင်တရုတ်ပင်လယ်အတွင်းရှိ သန္တာကျောက်တန်းတစ်ခုအနီးမှာ မတ်လ(၂၃)ရက်၊ နံနက်ပိုင်းတွင် တရုတ်ကမ်းခြေစောင့်သင်္ဘောက ဖိလစ်ပိုင်ထောက်ပံ့ရေးသင်္ဘောကို တားဆီးကာ မီးသတ်ပိုက်ဖြင့်ထိုးခဲ့ကြောင်း ဖိလစ်ပိုင်အစိုးရက စွပ်စွဲပြောဆိုခဲ့သည်။ 

တစ်နာရီနီးပါးကြာမြင့်ခဲ့သော အဆိုပါဖြစ်ရပ်သည် Second Thomas Shoal ကျွန်းအနီးတွင် ဖြစ်ပွားခဲ့ခြင်းဖြစ်ကြောင်း ဖိလစ်ပိုင်စစ်တပ်ကပြောကြားခဲ့သည်။ အဖြူရောင်သင်္ဘောတစ်စင်းသည် အနီးရှိ အခြားသင်္ဘောတစ်စီးကို မီးသတ်ပိုက်ဖြင့်ထိုးနေသည့် ဗီဒီယိုဖိုင်ကို ဖိလစ်ပိုင်စစ်တပ်က ထုတ်ပြန်ခဲ့ကြောင်းလည်းသိရသည်။ အခြားဗီဒီယိုဖိုင်တစ်ခုတွင် အဖြူရောင်သင်္ဘောနှစ်စီးသည် အခြားသင်္ဘောတစ်စီးကို မီးသတ်ပိုက်ဖြင့် ထိုးနေသည်ကို တွေ့မြင်ခဲ့ရသည်။ ဖိလစ်ပိုင်စစ်တပ်က 'တရုတ်ကမ်းခြေစောင့်သင်္ဘောတွေက မီးသတ်ပိုက်နဲ့ထိုးခဲ့တာကြောင့်  UM4 ထောက်ပံ့ရေးသင်္ဘောမှာ ထိခိုက်ပျက်စီးမှုတွေရှိခဲ့ပါတယ်'ဟု ပြောဆိုခဲ့သည်။

သို့သော်လည်း ထိခိုက်ပျက်စီးမှုနှင့်ပတ်သက်သည့် အသေးစိတ်အချက် အလက် သို့မဟုတ် လူသေဆုံးမှု ရှိ/မရှိဆိုသည့်အချက်တို့ကို ဖိလစ်ပိုင်စစ်တပ်က ထုတ်ပြန်ပြောဆိုခဲ့ခြင်းမျိုးမရှိခဲ့ကြောင်းလည်း သိရသည်။တိုက်ခိုက်ခံရမှုများရှိခဲ့သော်လည်း ထိခိုက်ပျက်စီးခဲ့သော သင်္ဘောနှင့် လိုက်ပါစောင့်ကြပ်ပေးသော ကမ်းခြေစောင့်သင်္ဘောတို့သည် ဖိလစ်ပိုင်ရေတပ်အမှုထမ်း(၆)ဦးနှင့် ကုန်စည်များကို တပ်စွဲထားသော ကျွန်းများဆီသို့ ဆက်လက်ပို့ဆောင်ခဲ့ကြောင်း စစ်တပ်ကပြောကြားခဲ့သည်။