Pika (NSS) - မတ် ၂၁

ယူကရိန်းကို ငွေကြေးထောက်ပံ့ရန်အတွက် ရုရှားဗဟိုဘဏ်၏ ပြည်ပရှိပိုင်ဆိုင်မှုများ၏ အမြတ်အစွန်းများကို အသုံးပြုရန် အဆိုပြုခဲ့သော ဥရောပသမဂ္ဂအကြီးအကဲ ဂျိုးဆက်ဘော်ရဲလ်၏ အဆိုပြုချက်သည် နိုင်ငံတကာဥပဒေကို ပျက်စီးစေလိမ့်မည်ဖြစ်ကြောင်း ရုရှားအစိုးရပြောရေးဆိုခွင့်ရှိသူ ဒီမစ်ထရီပက်စကော့ဗ်က ပြောကြားခဲ့သည်။

ထို့ပြင် အဆိုပါလုပ်ရပ်သည် တစ်ကမ္ဘာလုံးတွင် ဥရောပသမဂ္ဂ၏ပုံရိပ်ကို  ကျဆင်းစေလိမ့်မည်ဖြစ်ကြောင်းလည်း ဒီမစ်ထရီပက်စကော့ဗ်က ပြောဆိုခဲ့သည်။ ယူကရိန်းအတွက် လက်နက်များဝယ်ယူရန် ရုရှား၏ပြည်ပရှိပိုင်ဆိုင်မှုများမှ ရရှိသော ဝင်ငွေ၏(၉၀)ရာခိုင်နှုန်းကို အသုံးပြုရန် ဥရောပသမဂ္ဂကို အဆိုပြုခဲ့ကြောင်း ဂျိုးဆက်ဘော်ရဲလ်က မတ်(၂၀)ရက်တွင် ထုတ်ဖော်ပြောဆိုခဲ့သည်။ ကျန်ရှိနေသော ဝင်ငွေ(၁၀)ရာခိုင်နှုန်းကို ယူကရိန်း၏ ကာကွယ်ရေးစက်မှုလုပ်ငန်းများကို ကူညီပံ့ပိုးရာတွင် အသုံးပြုရန်အတွက် ဥရောပသမဂ္ဂဘတ်ဂျက်သို့ လွှဲပြောင်းသွားရန် ဂျိုးဆက်ဘော်ရဲလ်က အဆိုပြုခဲ့ကြောင်းသိရသည်။ ဂျိုးဆက်ဘော်ရဲလ်၏ အဆိုပြုချက်သည် ဥရောပသမဂ္ဂ နိုင်ငံခြားရေးဝန်ကြီးများအများစု၏ ထောက်ခံမှုကို ရရှိခဲ့ကြောင်း အေပီသတင်းဌာနကရေးသားဖော်ပြခဲ့သည်။ 

အဆိုပါကိစ္စကို ယခုသီတင်းပတ်နှောင်းပိုင်းတွင် ဘယ်လ်ဂျီယံနိုင်ငံ ဘရပ်ဆဲလ်မြို့မှာ ကျင်းပမည့် ထိပ်သီးအစည်းအဝေးတွင် ဆွေးနွေးသွားရန် စီစဉ်ထားကြောင်းလည်း သိရသည်။ ဥရောပသမဂ္ဂအနေဖြင့် ဂျိုးဆက်ဘော်ရဲလ်၏ အဆိုပြုချက်အတိုင်း လုပ်ဆောင်ပါက ဆိုးရွားသောအကျိုးဆက်များရှိလာနိုင်ကြောင်း ဒီမစ်ထရီပက်စကော့ဗ်က သတိပေးပြောဆိုခဲ့သည်။ ၎င်းက 'ဒါဟာ ဥရောပနဲ့နိုင်ငံတကာဥပဒေရဲ့ တရားဝင်အခြေခံအုတ်မြစ်တွေကို ဖျက်ဆီးပစ်မယ့် နောက်ထပ်ထုတ်ပြန်ချက်တစ်ခုပါ။ ဒီလိုဆုံးဖြတ်ချက်တွေဟာ သူတို့ရဲ့ စီးပွားရေးနဲ့ ပုံရိပ်တွေကို ထိခိုက်ပျက်စီးစေမယ်ဆိုတာကို ဥရောပသမဂ္ဂမူဝါဒချမှတ်သူတွေက သဘောပေါက်နားလည်သင့်ပါတယ်။ ပြီးတော့ အဲဒီလုပ်ရပ်ဟာ ပိုင်ဆိုင်မှုအကာအကွယ်ပေးရေးမူနဲ့ပတ်သက်ပြီး သူတို့ရဲ့ကတိဝတ်တွေအပေါ် သံသယဝင်လာတာမျိုးတွေ ရှိလာပါလိမ့်မယ်'ဟုပြောဆိုခဲ့သည်။