ရောင်နီ (NSS) - မတ် ၁၆

        သြစတြေးလျမှာ စိုက်ပျိုးထွက်ရှိတဲ့ ၂၀.၄ ဂရမ် (၀.၇၁ အောင်စ) အလေးချိန်ရှိ ဧရာမ ဘလူးဘယ်ရီသီးဟာ ယခုသီတင်းပတ်အတွင်းမှာပဲ ကမ္ဘာ့အလေးဆုံး ဘလူးဘယ်ရီအဖြစ် တရားဝင် စံချိန်တင်ခဲ့ပါတယ်။ 

အဆိုပါ အသီးကို နိုဝင်ဘာ ၁၃ ရက်က ခူးဆွတ်ခဲ့တာဖြစ်ပြီး အလေးဆုံး ဘလူးဘယ်ရီ စံချိန်ကိုတော့ ယခု သီတင်းပတ်မှာမှ အတည်ပြုခဲ့တာ ဖြစ်တယ်လို့ ဂင်းနစ်ကမ္ဘာ့ မှတ်တမ်းအဖွဲ့မှ ပြောရေးဆိုခွင့်ရှိသူတစ်ဦးက သောကြာနေ့(မတ်လ ၁၅ ရက်) မှာ ပြောကြားခဲ့ပါတယ်။ ဘယ်ရီသီးဟာ အရှည် ၃၉.၃၁ မီလီမီ တာ (၁.၅၅ လက်မ)ရှိပြီး စားပွဲတင်တင်းနစ်ဘောလုံးလောက် အကြမ်းဖျင်း အရွယ်အစား ရှိပါတယ်။ ၎င်းကို ဘလူးဘယ်ရီစိုက်ပျိုးထုတ်လုပ်သူ Costa Group မှ ဝန်ထမ်းတွေက သြစတြေးလျနိုင်ငံ၊ ကော်ရင်ဒီ၊ နယူးဆောက်ဝေးလ် မှာ စိုက်ပျိုးခဲ့တာ ဖြစ်ပါတယ်။ 

အဆိုပါဧရာမ ဘလူးဘယ်ရီဟာ Eterna အမျိုးအစား ဖြစ်တယ်လို့ သိရပါတယ်။ ကမ္ဘာ့အလေးဆုံး ဘလူးဘယ်ရီအဖြစ် ယခင်စံချိန်ကို ၂၀၂၀ ခုနှစ်က အနောက်သြစတေးလျမှာ စိုက်ပျိုးထားတဲ့ ဧရာမ ဘလူးဘယ်ရီသီးက အလေးချိန် ၁၆.၂၀ ဂရမ် (၀.၅၇ အောင်စ) နဲ့ ရရှိခဲ့တာဖြစ်ပါတယ်။     

 ဂင်းနစ်ကမ္ဘာ့စံချိန်တင်ထားတဲ့ အခြားဧရာမ ဘယ်ရီသီး အမျိုးအစားကတော့ အစ္စရေး လယ်သမား ချာဟီအေရီရယ် စိုက်ပျိုးထားတဲ့ စတော်ဘယ်ရီသီးဖြစ်ပြီး ၎င်းရဲ့ အလေးချိန်ဟာ ၂၈၉ ဂရမ် (၁၀ အောင်စ) ထိ အလေးချိန်ရှိတယ်လို့ သိရပါတယ်။