ရောင်နီ (NSS) - မတ် ၁၆

ဝါရှင်တန်ဒီစီ National Park Service ဟာ မြို့တော်ရဲ့ယိုယွင်းနေတဲ့ပင်လယ်တံတိုင်းတွေကို ပြန်လည်ပြုပြင်ဖို့အတွက် ချယ်ရီပင် ၁၆၀ နီးပါးကို ဖယ်ရှားဖို့ ပြင်ဆင်နေတယ်လို့ အေဂျင်စီက ဗုဒ္ဓဟူးနေ့(မတ်လ ၁၃ ရက်) မှာ ကြေညာခဲ့ပါတယ်။    

ပင်လယ်တံတိုင်းပြုပြင်ရေး ဒေါ်လာ ၁၁၃ သန်း သုံးနှစ် စီမံကိန်းအတွက် နွေဦးနှောင်းပိုင်းနဲ့ နွေရာသီ အစောပိုင်းမှာ တီဒလ်မြစ်ဝှမ်းနဲ့ အနောက် Potomac ပန်းခြံကိုဖြတ်ကာ Potomac မြစ်တစ်လျှောက် စတင်ဖို့ စီစဉ်ထားပါတယ်။ 

၎င်းရဲ့ဆောက်လုပ်ရေးဇုန်တွေမှာ  သစ်ပင် ၃၀၀ နီးပါး ဖယ်ရှားဖို့ စီစဉ်ထားပါတယ်။ ဒါပေမယ့်  စီမံကိန်းပြီးဆုံးချိန်မှာတော့ ချယ်ရီပင် ၂၇၄ ပင် အပါအဝင် သစ်ပင်ပေါင်း ၄၅၀ ကျော်ပြန်လည်စိုက်ပျိုးပေးမယ်လို့ NPS က ထုတ်ပြန်ချက်မှာ ဖော်ပြထားပါတယ်။ 

ပင်လယ်ရေမျက်နှာပြင်မြင့်တက်လာခြင်းနဲ့ ပူနွေးလာတဲ့ နေ့အပူချိန်တွေဟာ ဝါရှင်တန်ဒီစီရှိ ချယ်ရီပင် ထောင်ပေါင်းများစွာကို ခြိမ်းခြောက်လျက်ရှိနေပါတယ်။ မကြာသေးမီနှစ်များအတွင်း မကြာခဏ ရေလျှံခြင်းနဲ့ ဒီရေမြစ်ဝှမ်းတစ်ဝိုက်ရှိ ပင်လယ်တံတိုင်းများ ပြိုကျခြင်းကြောင့် ပြင်းထန်တဲ့ ရေလွှမ်းမိုးမှုတွေဖြစ်ကာ သစ်ပင်တွေလည်း ရေနစ်ပြီး လိုအပ်တဲ့ အောက်ဆီဂျင်စီးဆင်းမှုကို အနှောင့်အယှက်ဖြစ်ခဲ့ရပါတယ်။

ဒါကြောင့် ဒီပြဿနာကိုဖြေရှင်းဖို့ တစ်ခုတည်းသောနည်းလမ်းဟာ လာမယ့်နှစ် ၁၀၀ အတွင်း မျှော်လင့်ထားတဲ့ ပင်လယ်ရေမျက်နှာပြင်မြင့်တက်လာမှုအတွက် လိုက်လျောညီထွေဖြစ်စေဖို့ ပင်လယ်နံရံတွေကို မြင့်မားအောင်ပြုလုပ်ဖို့ပဲဖြစ်တယ်လို့ NPS က ဆိုပါတယ်။  

National Oceanic and Atmospheric Administration ရဲ့အချက်အလက်များအရ ဝါရှင်တန်ဒီစီရှိ ပင်လယ်ရေမျက်နှာပြင်ဟာ ပြီးခဲ့တဲ့ရာစုနှစ်အတွင်း အကြမ်းဖျင်း ၁.၁၅ ပေ မြင့်တက်ခဲ့ပြီး၊ ရာစုနှစ်အကုန်မှာ ၂ ပေမှ ၆ ပေအထိ တိုးလာမယ်လို့ ခန့်မှန်းထားပါတယ်။