ဂျန်ဇက် (NSS) - မတ် ၁၄

အမေရိကန်သမ္မတ ဂျိုးဘိုင်ဒန် နဲ့ သမ္မတဟောင်း ဒေါ်နယ်ထရမ့်တို့ဟာ လာမယ့်ရွေးကောက်ပွဲမှာပါဝင်ယှဉ်ပြိုင်ခွင့်ရဖို့အတွက် သက်ဆိုင်ရာပါတီတွေရဲ့ သမ္မတလောင်းတွေအဖြစ် ရွေးချယ်ခံလိုက်ရကြောင်းသိရပါတယ်။ 

ဒီမိုကရက်တစ်ပါတီ နဲ့ ရီပတ်ဘလီကန်ပါတီတို့ဟာ သမ္မတ ရွေးကောက်ပွဲမတိုင်ခင် ပါတီကိုယ်စားပြုယှဉ်ပြိုင်မယ့် သမ္မတလောင်းရွေးချယ်ပွဲတွေကို ကျင်းပခဲ့ရာ ဒေါ်နယ်ထရမ့် နဲ့ ဂျိုးဘိုင်ဒန်တို့က ပြိုင်ဘက်တွေကိုအနိုင်ရပြီး ရွေးချယ်ခံရခြင်းမျိုးဖြစ်ပါတယ်။ ဂျိုးဘိုင်ဒန်ဟာ ပြီးခဲ့တဲ့ရက်ပိုင်းက ကျင်းပခဲ့တဲ့ ဂျော်ဂျီယာပြည်နယ်၊ မစ္စစ္စပီ ပြည်နယ် နဲ့ ဝါရှင်တန်ပြည်နယ်တို့မှာ ပြုလုပ်တဲ့ ရွေးချယ်ပွဲတွေမှာအနိုင်ရခဲ့ပြီးနောက် ဒီမိုကရက်တစ်ပါတီရဲ့သမ္မတလောင်းအဖြစ်ရွေးချယ်ခံရဖို့ လိုအပ်တဲ့မဲအရေအ တွက်ထက်ပိုမိုရရှိခဲ့ပြီး မဲအရေအတွက် ၂၁၀၇ မဲရရှိခဲ့ကြောင်းသိရပါတယ်။

ဒါ့ပြင် ဒေါ်နယ်ထရမ့်ဟာလည်း ပြီးခဲ့တဲ့ရက်ပိုင်းက ကျင်းပခဲ့တဲ့ ပြည်နယ်သုံးပြည်နယ်အတွင်းပြုလုပ်တဲ့ ရီပတ်ဘလီကန်ပါတီရဲ့သမ္မတလောင်းရွေးချယ်ပွဲမှာအနိုင်ရပြီးနောက် လိုအပ်တဲ့မဲအရေ အတွက်ဖြစ်တဲ့ ၁၂၁၅ မဲထက်ပိုပြီး မဲအရေအတွက်ပေါင်း ၁၂၄၁ မဲ ရရှိခဲ့ကြောင်းသိရပါတယ်။ ဒေါ်နယ်ထရမ့် နဲ့ ဂျိုးဘိုင်ဒန်တို့ဟာ ပြီးခဲ့တဲ့ သမ္မတရွေးကောက်ပွဲမှာ ပြိုင်ဘက်တွေအဖြစ် ယှဉ်ပြိုင်ဖူးပြီး လာမယ့်ရွေးကောက်ပွဲမှာလည်း ပြိုင်ဘက်တွေအ  ဖြစ် တစ်ကျော့ပြန်ထပ်မံတွေ့ဆုံရမှာဖြစ်ရာ ၁၉၅၆ ခုနှစ်နောက် ပိုင်း သမ္မတရွေးကောက်ပွဲရဲ့ပြိုင်ဘက်ဟောင်းနှစ်ဦး တစ်ကြော့ပြန်ထပ်မံတွေ့ဆုံခြင်းမျိုးဖြစ်လာဖွယ်ရှိနေပါတယ်။

ဂျိုးဘိုင်ဒန်ဟာ ဒီမိုကရက်တစ်ပါတီ သမ္မတလောင်းအဖြစ်ရွေး ချယ်ခံရဖို့ စီးပွားရေးသမား ဒင်ဖီးလစ်၊ စာရေးဆရာ ဝီလျံဆန်၊အပါအဝင်အခြားပြိုင်ဘက်တွေကိုကျော်ဖြတ်နိုင်ခဲ့သလို ဒေါ်နယ်ထရမ့်ဟာလည်း အမေရိကန်သံအမတ်ဟောင်း နီကီဟာလေး၊ ဖလော်ရီဒါပြည်နယ်အုပ်ချုပ်ရေးမှူး ရွန်ဒီဆန်းတစ်အပါအဝင်အခြားပြိုင်ဘက်တွေကို ကျော်ဖြတ်အနိုင်ယူခဲ့ကြောင်းသိရပါတယ်။