Pika (NSS) - မတ် ၁၄

ထိုင်ဝမ်ထိန်းချုပ်ထားသော ကင်မန်းကျွန်းအနီးတွင် တိမ်းမှောက်ခဲ့သော သင်္ဘောတစ်စီးကို ကယ်ဆယ်ရန်အတွက် ထိုင်ဝမ်နှင့်တရုတ်တို့သည် ရှားပါးသော ပူးတွဲမစ်ရှင်တစ်ခုအဖြစ် အဖွဲ့များကို မတ်လ(၁၄)ရက်က စေလွှတ်ခဲ့ကြောင်းသိရသည်။

ထိုင်ဝမ်ရေလက်ကြားတွင် တင်းမာမှုများရှိနေသည့်ကြားက နှစ်ဖက်စလုံးက ယခုကဲ့သို့ ပူးတွဲမစ်ရှင်များကို လုပ်ဆောင်ခဲ့ခြင်းဖြစ်သည်။ မတ်လ(၁၄)ရက် အစောပိုင်းတွင် တရုတ်ငါးဖမ်းသင်္ဘောတစ်စီး တိမ်းမှောက်ခဲ့ပြီးနောက် ထိုင်ဝမ် နှင့် တရုတ်တို့မှ အာဏာပိုင်များသည် ကယ်ဆယ်ရေးသင်္ဘောများကို စေလွှတ်ခဲ့ခြင်းဖြစ်ကြောင်း ထိုင်ဝမ်ကမ်းခြေစောင့်တပ်ဖွဲ့က ထုတ်ပြန်ပြောကြားခဲ့သည်။ ငါးဖမ်းသင်္ဘောတိမ်းမှောက်ပြီးနောက် လူနှစ်ဦးကို သေဆုံးလျက်တွေ့ရှိခဲ့ပြီး နှစ်ဦးကို ကယ်ဆယ်ခဲ့ကာ နှစ်ဦးမှာပျောက်ဆုံးနေဆဲဖြစ် ကြောင်း အဆိုပါထုတ်ပြန်ချက်တွင်ရေးသားဖော်ပြထားသည်။ 

တရုတ်အာဏာပိုင်များ၏ တောင်းဆိုချက်အရ ထိုင်ဝမ်သည် ကယ်ဆယ်ရေးတွင် ပါဝင်ရန်အတွက် ကမ်းခြေစောင့်သင်္ဘောများကို စေလွှတ်ခဲ့ကြောင်း အမည်မဖော်လိုသူ ထိုင်ဝမ်အကြီးတန်းအရာတစ်ဦး၏ ပြောကြားချက်အရသိရသည်။ ထိုင်ဝမ်ကမ်းခြေစောင့်တပ်ဖွဲ့သည် တရုတ်ကမ်းရိုးတန်းအနီးရှိ ကင်နမ်းကျွန်းတစ်ဝိုက်တွင် ပုံမှန်ကင်းလှည့်မှုများကို ပြီးခဲ့သည့်လက စတင်လုပ်ဆောင်ခဲ့ကြောင်းသိရသည်။ ပြီးခဲ့သည့်လတွင် တရုတ်သင်္ဘောတစ်စီး သည် တားမြစ်ထားသော ရေပိုင်နက်အတွင်းသို့ ဝင်ရောက်လာခဲ့ခြင်းကြောင့် ထိုင်ဝမ်ကမ်းခြေစောင့်တပ်ဖွဲ့များက လိုက်လံဖမ်းဆီးမှုအတွင်း တရုတ်နိုင်ငံသားနှစ်ဦးသေဆုံးခဲ့ပြီးနောက် ထိုင်ဝမ်ဘက်က ကင်းလှည့်မှုများကို စတင်လုပ်ဆောင်ခဲ့ခြင်းဖြစ်ကြောင်းသိရသည်။ 

တရုတ်ငါးဖမ်းသင်္ဘောသည် ထိုင်ဝမ်၏ Dongding ကျွန်း အနောက်ဘက် ရေမိုင် (၁ ဒသမ ၀၇)မိုင် အကွာတွင် နစ်မြုပ်ခဲ့ခြင်းဖြစ်ကြောင်း ထိုင်ဝမ်ကမ်းခြေစောင့်တပ်ဖွဲ့က ပြောကြားခဲ့သည်။ အဆိုပါကျွန်းပေါ်တွင် တပ်စွဲထားသည့် ထိုင်ဝမ်တပ်ဖွဲ့များသည်လည်း ကယ်ဆယ်ရေးလုပ်ငန်းများတွင် ပါဝင်ခဲ့ကြကြောင်းသိရသည်။ ကယ်ဆယ်ရေးလုပ်ငန်းများအတွက် ထိုင်ဝမ်ဖက်မှ ကမ်းခြေစောင့်သင်္ဘောလေးစင်းစေလွှတ်ခဲ့ပြီး တရုတ်ဘက်မှ သင်္ဘော (၆)စီး စေလွှတ်ခဲ့ကြောင်းသိရသည်။