ဂျန်ဇက် (NSS) – မတ် ၁၁ 

ဖိလစ်ပိုင်အစိုးရဟာ အငြင်းပွားနေတဲ့ တောင်တရုတ်ပင်လယ်အတွင်းမှာ အမေရိကန် အပါအဝင် မဟာမိတ်နိုင်ငံ တွေနဲ့ပူးပေါင်းပြီး ဓါတ်ငွေ့ထုတ်ယူမှုတွေစတင်လုပ်ဆောင်ဖို့ စီစဉ်နေကြောင်း သိရပါတယ်။ 

တောင်တရုတ်ပင်လယ်အရေးနဲ့ပတ်သက်ပြီး တရုတ်နိုင်ငံနဲ့ တင်းမာမှုအရှိန်မြင့်တက်နေချိန်မှာပဲ ဖိလစ်ပိုင်အစိုးရ က  အခုလိုမျိုးလုပ်ဆောင်လာခဲ့တာဖြစ်ပါတယ်။ အမေရိကန်နိုင်ငံဆိုင်ရာ ဖိလစ်ပိုင်သံအမတ်ကြီးက ဖိလစ်ပိုင်နိုင်ငံ ဟာ အမေရိကန်နိုင်ငံနဲ့ပူးပေါင်းပြီး စီးပွားရေးအကျိုးအမြတ်တွေ ရယူနိုင်အောင် ပိုမိုကြိုးပမ်းသွားမှာဖြစ်ကြောင်း ပြောပါတယ်။

ဖိလစ်ပိုင်သံအမတ်ကြီးက "တောင်တရုတ်ပင်လယ်အတွင်း ဓါတ်ငွေ့ထုတ်ယူမှုတွေစတင်ဖို့ အချိန်ကျရောက်လာ ချိန်မှာ ကျွန်တော်တို့ဟာ ဘယ်လိုမျိုးလုပ်ဆောင်မလဲဆိုတာတွေ့မြင်ရမှာပါ။ ကျွန်တော်တို့ဟာ အမေရိကန်၊ ဂျပန်၊ သြစတြေးလျနိုင်ငံတို့နဲ့ပူးပေါင်းဆောင်ရွက်မှာပါ" လို့ ပြောပါတယ်။

တောင်တရုတ်ပင်လယ်ဟာ အရင်းအမြစ်များစွာရှိနေပြီး တရုတ်နိုင်ငံက တောင်တရုတ်ပင်လယ်ရှိနေရာအများစုကို ၎င်းတို့နိုင်ငံပိုင်နက်အဖြစ် သတ်မှတ်ပြောဆိုထားပါတယ်။ တရုတ်နိုင်ငံဟာ  အာဆီယံဒေသအတွင်း နိုင်ငံအချို့နဲ့ တောင်တရုတ်ပင်လယ်အတွင်းမှာ ပိုင်နက်နယ်မြေအငြင်းပွားမှုတွေရှိနေရာ ဖိလစ်ပိုင်နိုင်ငံရဲ့လုပ်ရပ်တွေက ထိပ်တိုက်တွေ့ဆုံမှု ပိုမိုဖြစ်လာဖွယ်ရှိနေပါတယ်။ တောင်တရုတ်ပင်လယ်အတွင်း ဓါတ်ငွေနဲ့အရင်းအမြစ် ထုတ်ယူမှုတွေကို အမေရိကန်ကုမ္ပဏီတွေကို ဖိတ်ခေါ်သွားမှာဖြစ်သလို ဗီယက်နမ်နိုင်ငံလိုမျိုး အခြားနိုင်ငံတွေနဲ့ လည်း တောင်တရုတ်ပင်လယ်အတွင်းဆွေးနွေးပြီး ကြိုးပမ်းသွားမှာဖြစ်ကြောင်း ဖိလစ်ပိုင်အစိုးရက ပြောပါတယ်။ 

ဖိလစ်ပိုင်နိုင်ငံနဲ့ တရုတ်နိုင်ငံကြား  တောင်တရုတ်ပင်လယ်အရေးနဲ့ပတ်သက်ပြီး ပြီးခဲ့တဲ့နှစ်ပိုင်းအတွင်း တင်းမာမှု အရှိန်ပိုမိုမြင့်တက်လာနေကြောင်း သိရပါတယ်။ တရုတ်စစ်သင်္ဘောတွေဟာ ပြီးခဲ့တဲ့နှစ်အတွင်း တောင်တရုတ် ပင်လယ်အတွင်းမှာ ဖိလစ်ပိုင်ကမ်းခြေစောင့်သင်္ဘောတွေကို ဝင်တိုက်တာတွေလုပ်ဆောင်ခဲ့ပြီး နှစ်နိုင်ငံကြား တင်းမာမှုအရှိန်ပိုမိုမြင့်တက်လာနေကြောင်း သိရပါတယ်။