Pika (NSS) - မတ် ၁ဝ

မတ်လ(၉)ရက်တွင် အီရန်ကျောထောက်နောက်ခံပြု ဟူသီလက်နက်ကိုင်အဖွဲ့က ပင်လယ်နီနှင့် အေဒင်ပင်လယ် ကွေ့တို့ရှိ ပစ်မှတ်များဆီသို့ ဦးတည်ပစ်လွှတ်လိုက်သော ဒရုန်း(၂၈)စင်းကို ပစ်ချခဲ့ကြောင်း အမေရိကန် နှင့် ၎င်း၏ မိတ်ဖက်နိုင်ငံများက ပြောကြားခဲ့သည်။

ထို့နောက် အမေရိကန်ကုန်တင်သင်္ဘောကို ဒုံးကျည်များဖြင့် ပစ်ခတ်ခဲ့ကြောင်း နှင့် ပင်လယ်နီနှင့် အေဒင် ပင်လယ်ကွေ့တို့ရှိ အမေရိကန်စစ်သင်္ဘောများဆီသို့ ဒရုန်းများ ပစ်လွှတ်ခဲ့ကြောင်း ဟူသီလက်နက်ကိုင်အဖွဲ့က ပြောကြားခဲ့သည်။ အစ္စရေး-ဟားမက်စစ်ပွဲ စတင်ဖြစ်ပွားပြီးနောက် ဟူသီလက်နက်ကိုင်အဖွဲ့သည် ဂါဇာ ကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် ပင်လယ်နီအတွင်းရှိ ကုန်တင်သင်္ဘော များကို ဒရုန်းများ၊ ဒုံးကျည်များဖြင့် ပစ်ခတ်တိုက်ခိုက်မှုအား စတင်လုပ်ဆောင်ခဲ့ကြောင်း သိရသည်။ 

ပင်လယ်နီနှင့် အေဒင်ပင်လယ်ကွေ့တို့တွင် ဟူသီလက်နက်ကိုင်အဖွဲ့၏ ကြီးမားသော ဒရုန်းဖြင့်တိုက်ခိုက်မှုသည် မတ်လ(၉)ရက် အစောပိုင်းကဖြစ်ပွားခဲ့ခြင်းဖြစ်ကြောင်း အမေရိကန်ဗဟိုကွပ်ကဲမှုဌာနချုပ် CENTCOM က ပြော ကြားခဲ့သည်။ အဆိုပါဒရုန်းများသည် ဒေသတွင်းရှိ ကုန်တင်သင်္ဘောများ၊ အမေရိကန်နှင့် ညွန့်ပေါင်းတပ်ဖွဲ့တို့၏ စစ်သင်္ဘောများအတွက် ခြိမ်းခြာက်မှုတစ်ခုဖြစ်လာသောကြောင့် ပစ်ချခဲ့ခြင်းဖြစ်ကြောင်း CENTCOM က ပြောကြားခဲ့သည်။ 

CENTCOM က "အမေရိကန်ရေတပ်သင်္ဘောတွေနဲ့ တိုက်လေယာဉ်တွေဟာ ညွန့်ပေါင်းတပ်ဖွဲ့တွေရဲ့ ရေတပ် သင်္ဘောတွေ၊ တိုက်လေယာဉ်တွေနဲ့အတူ ဟူသီလက်နက်ကိုင်အဖွဲ့က ပစ်လွှတ်လိုက်တဲ့ ဒရုန်း(၂၈)စင်းကို ပစ်ချ ခဲ့ပါတယ်။ ရေကြောင်းလွတ်လပ်စွာ သွားလာခွင့်ကို အကာအကွယ်ပေးဖို့နဲ့ နိုင်ငံတကာရေပိုင်နက်တွေကို ပိုမို လုံခြုံအောင်စေဖို့အတွက် ဒီလိုမျိုးလုပ်ဆောင်ခဲ့တာပါ" ဟု ပြောခဲ့သည်။