Pika (NSS) - မတ် ၈ 

မြောက်ကိုရီးယားခေါင်းဆောင်ကင်ဂျုံအန်းသည် တိုက်ခိုက်ရေးစွမ်းရည်များကို မြှင့်တင်ရန်ရည်ရွယ်သည့် အမြောက်ဖြင့်ပစ်ခတ်လေ့ကျင့်မှုများကို ကြီးကြပ်ခဲ့ကြောင်း နိုင်ငံပိုင်မီဒီယာ KCNA က မတ်လ(၈)ရက်တွင် ရေးသားဖော်ပြခဲ့သည်။

ကျူးကျော်တိုက်ခိုက်မှုများလုပ်ဆောင်ရန်အတွက် အစမ်းလေ့ကျင့်မှုဟု သတ်မှတ်ထားသော အမေရိကန်နှင့် တောင်ကိုရီးယားတို့၏ စစ်ရေးလေ့ကျင့်မှုများကို ဆန့်ကျင်သည့်အနေဖြင့် သင့်လျော်သော စစ်ရေးခြေလှမ်းများကို လုပ်ဆောင်သွားမည်ဟု မြောက်ကိုရီးယားအစိုးရက ကတိပြုခဲ့ပြီးနောက် ရက်အနည်းငယ်အကြာတွင် အဆိုပါ ပစ်ခတ်လေ့ကျင့်မှုများ ထွက်ပေါ်လာခြင်းဖြစ်သည်။

မတ်လ(၇)ရက်က လုပ်ဆောင်ခဲ့သော စစ်ရေးလေ့ကျင့်မှုတွင် တောင်ကိုရီးယားနိုင်ငံ ဆိုးလ်မြို့ကို တိုက်ခိုက်နိုင် သည့် အကွာအဝေးတွင် အမြောက်များဖြင့် နေရာယူထားသော ရှေ့တန်းအမြောက်တပ်များ ပါဝင်ကြောင်း KCNA က ပြောကြားခဲ့သည်။

ထို့အပြင် အမြောက်တပ်များသည် အမှန်တကယ် တိုက်ပွဲဝင်ရမည့်အချိန်တွင် ညှာတာမှုမရှိဘဲ လျင်မြန်သော တိုက်ခိုက်မှုများဖြင့် အစပြုရမည်ဟု ကင်ဂျုံအန်းက ပြောဆိုခဲ့ကြောင်း KCNA က ဖော်ပြခဲ့သည်။

မြောက်ကိုရီးယားသည် မတ်လ(၇)ရက်တွင် ၎င်း၏နိုင်ငံအနောက်ဖက်ကမ်းရိုးတန်းရှိ ရေပြင်ထဲသို့ အမြောက်ကျည် များ ပစ်လွှတ်ခဲ့သည်ကို ခြေရာခံတွေ့ရှိခဲ့ကြောင်း တောင်ကိုရီးယားစစ်ဦးစီးချုပ်များရုံးက မတ်လ(၈)ရက်တွင် ပြောကြားခဲ့သည်။

ထို့အပြင် မြောက်ကိုရီးယား၏ ရန်စသည့်လုပ်ရပ်များကို ပြင်းပြင်းထန်ထန် လက်တုံ့ပြန်သွားမည်ဖြစ်ကြောင်း တောင်ကိုရီးယားစစ်ဦးစီးချုပ်များရုံးက ပြောကြားခဲ့သည်။ မြောက်ကိုရီးယား၏ တပ်ဖြန့်ထားသော တာဝေးပစ် အမြောက်လက်နက်များသည် နိုင်ငံနယ်စပ်မှ (၅၀)ကီလိုမီတာခန့်အကွာတွင်ရှိသော လူဦးရေ(၁၀)သန်းရှိသည့် ဆိုးလ်မြို့အတွက် လုံခြုံရေးခြိမ်းခြောက်မှုများကို ဖြစ်စေကြောင်းလည်း သိရသည်။ မတ်လ(၄)ရက်တွင် စတင် လုပ်ဆောင်ခဲ့သော အမေရိကန်နှင့် တောင်ကိုရီးယားတို့၏ နှစ်စဉ်စစ်ရေးလေ့ကျင့်မှုများကို လက်တုံ့ပြန်သည့် အနေဖြင့် သတ်မှတ်ထားခြင်းမျိုးမရှိသော စစ်ရေးလှုပ်ရှားမှုများကို လုပ်ဆောင်သွားမည်ဖြစ်ကြောင်း မြောက်ကိုရီးယားကာကွယ်ရေးဝန်ကြီးဌာနက မတ်လ(၅)ရက်တွင် ထုတ်ဖော်ပြောဆိုခဲ့သည်။

ထို့အပြင် ကင်ဂျုံအန်းသည် မတ်လ(၇)ရက်တွင် နိုင်ငံအနောက်ပိုင်းရှိ စစ်ရေးလေ့ကျင့်မှုကွင်းများကို သွားရောက် လည်ပတ်ခဲ့ပြီး စစ်ပွဲအတွက် တိုက်ခိုက်ရေးစွမ်းရည်များကို ပိုမိုမြှင့်တင်ရန် တိုက်တွန်းခဲ့ကြောင်း သိရသည်။