Pika (NSS) - မတ် ၇ 

တရုတ်နိုင်ငံအနေဖြင့် တောင်တရုတ်ပင်လယ်အတွင်းရှိ ၎င်း၏ အခွင့်အရေးများကို တရားဝင်ကာကွယ်သွားမည်ဖြစ်ကြောင်း တရုတ်နိုင်ငံခြားရေးဝန်ကြီးဝမ်ယီက မတ်လ(၇)ရက်တွင် ထုတ်ဖော်ပြောဆိုခဲ့သည်။

တောင်တရုတ်ပင်လယ်အတွင်း တရုတ်နှင့်ဖိလစ်ပိုင်တို့၏ သင်္ဘောများကြား ထိပ်တိုက်တွေ့ဆုံမှုများဖြစ်ပွားခဲ့ပြီး နောက် တရုတ်ဖက်က ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ တရုတ်နှင့် ဖိလစ်ပိုင်နိုင်ငံတို့ကြား တင်းမာမှု များမှာ ပြီးခဲ့သည့်လများအတွင်း ပိုမိုမြင့်တက်လာခဲ့ပြီး နှစ်နိုင်ငံလုံးမှ သင်္ဘောများသည် အငြင်းပွားကျွန်းများ အနီးတွင် ထိပ်တိုက်တွေ့ဆုံမှုများဖြစ်ပွားခဲ့ကြောင်းလည်း သိရသည်။ 

တရုတ်နိုင်ငံခြားရေးဝန်ကြီး ဝမ်ယီက "တောင်တရုတ်ပင်လယ်အတွင်းမှာ ကျွန်တော်တို့ရဲ့အခွင့်အရေးတွေကို ဥပဒေနဲ့အညီ တရားဝင်ကာကွယ်သွားမှာပါ။ ပင်လယ်ရေပိုင်နက်အငြင်းပွားမှုတွေမှာ တရုတ်နိုင်ငံဟာ အရာရာ တိုင်းကို အမြဲတမ်းထိန်းထိန်းသိမ်းသိမ်းလုပ်ဆောင်နေပါတယ်။ ဒါပေမယ့် ကျွန်တော်တို့ဖက်က ထိန်းထိန်း သိမ်းသိမ်းလုပ်ဆောင်နေတာတွေကို အခွင့်အရေးယူတာမျိုးတွေ လက်မခံပါဘူး။ ပြီးတော့ ရေကြောင်းဆိုင်ရာ ဥပဒေတွေကို တမင်ရည်ရွယ်ပြီး ချိုးဖောက်တာမျိုးကိုလည်း လက်မခံပါဘူး" ဟု ပြောခဲ့သည်။ 

တောင်တရုတ်ပင်လယ်အတွင်းတွင် ထောက်ပံ့ရေးမစ်ရှင်များ လုပ်ဆောင်နေသော ဖိလစ်ပိုင်သင်္ဘောများ နှင့် တရုတ်ကမ်းခြေစောင့်သင်္ဘောတို့ကြား တိုက်မိမှုနှစ်ကြိမ်ဖြစ်ပွားကာ တရုတ်ကမ်းခြေစောင့်သင်္ဘောက ဖိလစ်ပိုင် သင်္ဘောတစ်စီးကို မီးသတ်ပိုက်ဖြင့်ထိုးခဲ့ပြီးနောက် မတ်လ(၅)ရက်တွင် တရုတ်ကိုယ်စားလှယ်တစ်ဦးကို ဖိလစ်ပိုင် အစိုးရက ဆင့်ခေါ်ခဲ့ကြောင်းလည်း သိရသည်။ 

ဖိလစ်ပိုင်သင်္ဘောများသည် ၎င်း၏ အချုပ်အခြာအာဏာပိုင်ရေပိုင်နက်အတွင်းသို့ တရားမဝင် ကျူးကျော် ဝင်ရောက်လာခြင်းကြောင့် ယခုကဲ့သို့လက်တုံ့ပြန်မှုများကို လုပ်ဆောင်ခဲ့ခြင်းဖြစ်ကြောင်း တရုတ်အစိုးရက ပြောခဲ့သည်။ 

တရုတ်နိုင်ငံ၏ အဆိုပါလုပ်ရပ်များသည် ရန်စသည့်လုပ်ရပ်များဖြစ်ကြောင်း အမေရိကန်အစိုးရက ပြစ်တင် ရှုတ်ချပြောခဲ့သည်။ သို့သော်လည်း တရုတ်နိုင်ငံခြားရေးဝန်ကြီးဌာနက အမေရိကန်သည် ဖိလစ်ပိုင်နိုင်ငံကို အသုံးချကာ ဒေသအတွင်းတွင် တင်းမာမှုများကို ပိုမိုမြင့်တက်လာအောင် လုပ်ဆောင်နေခြင်းဖြစ်ကြောင်း မတ်လ (၇)ရက်တွင် ပြန်လည်စွပ်စွဲပြောဆိုခဲ့သည်။