မြူနစ် (NSS) - မတ် ၇

အင်းစိန်လူမိုက် ကိုကျော်ဝင်းစိန် သတ်ဖြတ်ခံရမှုတွင် အဓိကကျူးလွန်သူဟု စွပ်စွဲခံနေရသည့် ကြည့်မြင်တိုင်လူမိုက် ကိုငမျိုးနှင့်အဖွဲ့ကို စစ်ကိုင်းမြို့တွင် ဖမ်းဆီးရမိခဲ့ကြောင်း သတင်းရရှိသည်။

လူမိုက် ကိုရဲမျိုးသိန်း(ခ)ငမျိုးနှင့်အဖွဲ့ကို ယမန်နေ့(မတ်လ ၆ ရက်) နေ့လည်ပိုင်းတွင် စစ်ကိုင်းတိုင်း၊ စစ်ကိုင်းမြို့၊ တကောင်း ရပ်ကွက်၊ သစ္စာစေတီဘုရားအနီး၊ ပုဗ္ပာရုံကျောင်းအတွင်း၌ ဖမ်းဆီးရမိခဲ့ခြင်းဖြစ်ကြောင်း စစ်ကိုင်းတိုင်းအစိုးရအဖွဲ့ထံမှ သိရသည်။

လူမိုက် ကိုငမျိုးနှင့်အတူ အောင်ကျော်ကြား(ခ)ကျော်ကြီး၊ ဟိန်းထက်အောင်(ခ)ခေါင်းကြီး၊ အောင်မြတ်မင်း(ခ)အောင်ကြီး၊ ဥက္ကာ၊ အောင်တင်မြင့်ထွေး(ခ)အောင်လေး၊ ကျော်ဆန်းလင်း(ခ) သံမဏိ၊ မျိုးမင်းနိုင်(ခ)အရှည်ကြီးနှင့် ဇော်မင်းဦး(ခ)တွတ်ပီတို့ (၉)ဦးကို ဖမ်းဆီးရမိခဲ့ခြင်းဖြစ်သည်။

“သူတို့ဘက်က ပြန်လည်ခုခံပြီးတော့ ထွက်ပြေးတိမ်းရှောင်ဖို့ ကြိုးစားတဲ့အတွက် လက်နက်ငယ်အချို့ပစ်ဖောက်ပြီးတော့ ခြောက်လှန့် ဖမ်းဆီးခဲ့ရတယ်။ အခုတော့ သူတို့ကို ရန်ကုန်ကို ဆက်ပြီးတော့ လွှဲပေးလိုက်ပြီ”ဟု စစ်ကိုင်းတိုင်းအစိုးရအဖွဲ့မှ တာဝန်ရှိသူတစ်ဦးက NSS ကို ပြောသည်။

ထိုသို့ လူမိုက် ကိုငမျိုးနှင့်အဖွဲ့ကို ဖမ်းဆီးရမိစဉ် ကားနှစ်စီးနှင့်အတူ ဓါးရှည် (၅)ချောင်း၊ ဓါးမြှောင် (၂)ချောင်း၊ လေးခွ(၁) လက်၊ သံကုန်းသီး (၄၂)လုံးနှင့် အခြားဆက်စပ်ပစ္စည်းများကိုလည်း သိမ်းဆည်းရရှိခဲ့ကြောင်း ၎င်းက ဆက်လက်ပြောသည်။

လက်ရှိတွင် ကြည့်မြင်တိုင်လူမိုက်ဟု လူသိများသော ကိုငမျိုးအပါအဝင် (၉)ဦးကို ရန်ကုန်တိုင်းရဲတပ်ဖွဲ့ထံသို့ ပြန်လည်လွှဲ ပြောင်းပေးလိုက်ပြီဖြစ်ကြောင်းလည်း သိရသည်။

အင်းစိန်လူမိုက်ဟု လူသိများသော ကိုကျော်ဝင်းစိန်သည် ၂၀၂၃ ခုနှစ်၊ ဒီဇင်ဘာလ ၈ ရက်၊ ညပိုင်းတွင် ရန်ကုန်တိုင်း၊ ကြည့်မြင်တိုင်မြို့နယ်ရှိ ကျောင်းကြီးလမ်းပေါ်တွင် ဓါးများဖြင့် ခုတ်သတ်ခံခဲ့ရခြင်းဖြစ်သည်။ ထိုသို့ ကိုကျော်ဝင်းစိန် သတ်ဖြတ်ခံရပြီးနောက် ရက်ပိုင်းအကြားတွင် ၎င်းဖြစ်စဉ်နှင့်ပတ်သက်၍ ပါဝင်ကျူးလွန်သူ (၄)ဦးသည် ကြည့်မြင်တိုင်ရဲစခန်းတွင် လာရောက်ဖမ်းဆီးခံခဲ့ကြောင်း သိရသည်။

ကိုကျော်ဝင်းစိန် သတ်ဖြတ်ခံရမှုဖြစ်စဉ်တွင် အဓိကကျူးလွန်သူမှာ ကြည့်မြင်တိုင်လူမိုက် ကိုငမျိုးနှင့်အဖွဲ့ဖြစ်ကြောင်း သတင်းအများအပြားပျံ့နှံ့ခဲ့ပြီး ကိုငမျိုးနှင့်အဖွဲ့သည် စစ်ကိုင်းတိုင်းအတွင်း တိမ်းရှောင်နေစဉ် ယခုကဲ့သို့ ဖမ်းဆီးရမိခဲ့ခြင်းဖြစ်သည်။