ဂျန်ဇက် (NSS) - မတ် ၇

အမေရိကန်သံအမတ်ကြီးဟောင်း နီကီဟာလေးဟာ မတ်လ ၅ ရက်က ကျင်းပခဲ့တဲ့  Super Tuesday  ရွေးကောက်ပွဲမှာရှုံးနိမ့်ခဲ့ပြီးနောက် ရီပတ်ဘလီကန်ပါတီအတွင်း ယှဉ်ပြိုင်ရတဲ့ သမ္မတလောင်းအဖြစ်ပါဝင်ယှဉ်ပြိုင်မယ့် အစီအစဉ်ကို ဆိုင်းငံ့လိုက်ကြောင်း သိရပါတယ်။

နီကီဟာလေးဟာ ရီပတ်ဘလီကန်ပါတီ ကိုယ်စားပြုယှဉ်ပြိုင်မယ့် သမ္မတ အဖြစ်ရွေးချယ်ခံရဖို့ ပါတီအတွင်း ကနဦး ယှဉ်ပြိုင်နေရပြီး သမ္မတဟောင်းဒေါ်နယ်ထရမ့်နဲ့ အဓိကထားယှဉ်ပြိုင်နေရကြောင်းသိရပါတယ်။ ဒေါ်နယ်ထရမ့်ဟာ လက်ရှိအချိန်မှာ နီကီဟာလေးထက် လူကြိုက်များနေပြီး ပြီးခဲ့တဲ့ရက်ပိုင်းအတွင်းကျင်းပခဲ့တဲ့ ပြည်နယ် ၁၅ ခုအနက် ၁၄ ပြည်နယ်မှာ အနိုင်ရခဲ့ကြောင်း၊ နီကီဟာလေးဟာ အဆိုပါ ၁၅ပြည်နယ်မှာ ၁ ပြည်နယ် ကို အနိုင်ရထားကြောင်းသိရပါတယ်။ 

နီကီဟာလေးက" ကျွန်မတို့ရဲ့ မဲဆွယ်စည်းရုံးရေး အစီအစဉ်တွေကိုဆိုင်းငံ့ရမယ့်အချိန်ဖြစ်လာပြီ၊ အဲဒီအတွက်လည်းနောင်တမရဘူး"လို့ ပြောပါတယ်။ အမေရိကန်နိုင်ငံမှာ သမ္မတ ရွေးကောက် ပွဲကို  နိုဝင်ဘာလအတွင်းကျင်းပမှာဖြစ်ရာ လက်ရှိအချိန်မှာပါတီ တွေဟာ သမ္မတ လောင်းရွေးချယ်ပွဲတွေကို ကျင်းပလျက်ရှိနေပါတယ်။ ရီပတ်ဘလီကန်ပါတီရဲ့ပါတီအတွင်း သမ္မတလောင်းရွေး ချယ်ပွဲတွေကို ပါဝင်ယှဉ်ပြိုင်ခဲ့သူတွေထဲမှာ နီကီဟာလေး အပါ အဝင်အချို့က နုတ်ထွက်သွားခဲ့ပြီး ဒေါ်နယ်ထရမ့်ဟာ ရီပတ်ဘလီကန်ပါတီရဲ့သမ္မတလောင်းအဖြစ်ရွေးချယ်ခံရဖို့ အလားအလာများနေကြောင်းသိရပါတယ်။ နီကီဟာလေးဟာ ဒေါ်နယ်ထရမ့် အမေရိကန်သမ္မတအဖြစ်တာဝန်ယူချိန်အတွင်း ကုလသမဂ္ဂဆိုင်ရာအမေရိကန်သံအမတ်ကြီးအဖြစ်တာဝန်ယူခဲ့ဖူးသူဖြစ် ကြောင်းသိရပါတယ်။ 

လက်ရှိအချိန်မှာ ပါတီအတွင်းရွေးချယ်တဲ့ သမ္မလောင်းရွေးချယ်မှုကနဦးအဆင့် ရွေးချယ်မှုတွေမှာ ပါဝင်ယှဉ်ပြိုင်မှုဆိုင်းငံ့ခဲ့ပေမယ့် ဒေါ်နယ်ထရမ့်ကိုဆက်လက်ယှဉ်ပြိုင်နိုင်အောင် ကြိုးပမ်းမှာဖြစ်ကြောင်း နီကီဟာလေးကပြောပါတယ်။