ALynn (NSS) - မတ် ၆

ဂါဇာကမ်းမြောင်ဒေသတွင် အပစ်အခတ်ရပ်စဲရေးနှင့်ပတ်သက်၍ ဟားမတ်စ်တို့နှင့် သုံးရက်ကြာ ဆွေးနွေးညှိနှိုင်းမှု များသည် မွတ်ဆလင်ဥပုသ်လ မတိုင်မီ တစ်ပတ်အလိုတွင် အောင်မြင်မှုမရရှိဘဲ အဆုံးသတ်ခဲ့ရသည်။ ခြောက်ပတ် ကြာအပစ်အခတ်ရပ်စဲရေး၊ ပါလက်စတိုင်းအကျဉ်းသားအချို့ လွှတ်ပေးရေး နှင့် ဂါဇာကမ်းမြောင်ဒေသအတွက် နောက်ထပ်အကူအညီများရရှိရေး နှင့် အပြန်အလှန်အားဖြင့် ဟားမတ်စ်တို့ဖမ်းဆီးထားသော အစ္စရေးဓားစာခံများ ပြန်လွှတ်ပေးရေးတို့ ပါဝင်သည့်သဘောတူညီချက်ကို ချုပ်ဆိုနိုင်ရန် အမေရိကန်၊ ကာတာနှင့် အီဂျစ်တို့က သီတင်း ပတ်များစွာကြာအောင် ကြိုးပမ်းခဲ့ကြသည်။ 

Al Jazeera သတင်းထောက် Hamdah Salhut ၏ ဖော်ပြချက်အရ “ကိုင်ရိုတွင် ကျင်းပသည့် နောက်ဆုံးအကြိမ် ဆွေးနွေးပွဲသည် ရှေ့ဆက်မည့်အစီအစဉ်အတွက် ရေရေရာရာမရှိဘဲ အဆုံးသတ်ခဲ့ကြောင်း၊ အစ္စရေးဘက်က ဟားမက်စ်တို့၏ တုံ့ပြန်မှုကို စောင့်ဆိုင်းနေသလို ဟားမက်စ်တို့ဘက်ကလည်း အစ္စရေး၏တုံ့ပြန်မှုကို စောင့်နေ ခြင်းဖြစ်ကြောင်း၊ ကြားဝင်ဖျန်ဖြေပေးသူများသည်လည်း နှစ်ဖက်အကြားပြေလည်နိုင်မည့် အချက်တစ်စုံတရာကို ရှာဖွေနိုင်ခြင်း မရှိခဲ့ကြောင်း” သိရသည်။ 

ဟားမက်စ်တို့က ၎င်းတို့ဖမ်းဆီးထားသည့် အစ္စရေးဓားစာခံအားလုံးကို လွှတ်ပေးရန်ငြင်းဆိုခဲ့ပြီး အစ္စရေး၏ ထိုးစစ် များ ဂါဇာကမ်းမြောင်မှ ဆုတ်ခွာသွားပြီး ပါလက်စတိုင်းအကျဉ်းသားများ ပြန်လွှတ်ပေးမှသာ ကျန်ရှိနေသည့် အစ္စရေးဓားစာခံ ၃ဝ ကျော်ကို လွှတ်ပေးမည်ဟု ဖော်ပြထားသည်။ ထို့ပြင် ဟားမက်စ်အဖွဲ့၏ အကြီးတန်းအရာရှိ Osama Hamdan က “၆ ပတ်ကြာအပစ် အခတ်ရပ်စဲရေးထက် ထာဝရငြိမ်းချမ်းရေးကိုလိုလားပြီး အစ္စရေးတပ်ဖွဲ့ များ အပြီးအပိုင်ဆုတ်ခွာရေးကိုသာ ရည်ရွယ်ကြောင်း” ဖေဖော်ဝါရီလ ၅ ရက် (အင်္ဂါနေ့) က ပြောကြားခဲ့သည်။ 

အစ္စရေးဝန်ကြီးချုပ် နေတန်ယာဟုကမူ ဟားမက်စ်တို့၏ တောင်းဆိုချက်များကို လူသိရှင်ကြား ပယ်ချခဲ့ကာ ဟားမက်စ်အဖွဲ့ဖျက်သိမ်းပြီး ဓားစာခံများပြန်လွှတ်ပေးမှသာ စစ်ပွဲကို ရပ်တန့်ပေးမည်ဖြစ်ကြောင်း ဖော်ပြခဲ့သည်။ ထို့ပြင် နောက်ဆုံးအကြိမ် ဆွေးနွေးပွဲသို့ အစ္စရေးမှ ကိုယ်စားလှယ်စေလွှတ်ခဲ့ခြင်းမရှိပါ။ ဂါဇာကမ်းမြောင်ဒေသ အပေါ် အစ္စရေး၏ လက်တုံ့ပြန်ထိုးစစ်ကြောင့် လူပေါင်း ၃၀,၀၀၀ ကျော် သေဆုံးခဲ့ပြီး အများစုမှာ အမျိုးသမီးများနှင့် ကလေးသူငယ်များဖြစ်ကြောင်း ဂါဇာကျန်းမာရေးဝန်ကြီးဌာနမှ ပြောကြားခဲ့သည်။ 

ငါးလနီးပါးကြာ တိုက်ပွဲများကြောင့် ဂါဇာကမ်းမြောင်ဒေသအများစုသည် အပျက်အစီးအဆုံးအရှုံးများဖြင့် ပိုမို ဆိုးရွားလာကာ လူသားချင်းစာနာထောက်ထားမှုဆိုင်ရာ ကပ်ဘေးတစ်ရပ်ဖြစ်လာခဲ့သည်။