Pearl (NSS) - မတ် ၅

ရှမ်းပြည်နယ်အတွင်းရှိ မန်တုံ၊ နမ့်ဆန် နှင့် နမ္မတူမြို့နယ်တို့ကို နစက က စစ်အုပ်ချုပ်ရေး ( Martial Law ) ကြေညာလိုက်သည်။ 

နစကက ယမန်နေ့( မတ်လ ၄ ရက်) တွင် ဖွဲ့စည်းပုံအခြေခံဥပဒေပုဒ်မ ၄၁၉ အရ စစ်အုပ်ချုပ်ရေး (Martial Law) အမိန့်ထုတ်ပြန်လိုက်ခြင်းဖြစ်သည်။

မန်တုံ၊ နမ့်ဆန် နှင့် နမ္မတူမြို့နယ်တို့တွင် လုံခြုံရေး၊ တရာဥပဒေစိုးမိုးရေး နှင့် နယ်မြေအေးချမ်းသာယာရေးကို ပိုမို ထိရောက်စွာ ‌ဆောင်ရွက်ရန်အတွက်  အရှေ့မြောက်တိုင်းစစ်ဌာနချုပ်တိုင်းမှူးကို နစကမှ စစ်အုပ်ချုပ်ရေးကျင့်သုံး ရန် အာဏာအပ်နှင်းထားသည်။ 

ယခုကဲ့သို့ စစ်အုပ်ချုပ်ရေး အမိန်ကြေညာလိုက်သော မန်တုံ၊ နမ့်ဆန် နှင့် နမ္မတူမြို့နယ်တို့သည် တအာင်းလက်နက်ကိုင်အဖွဲ့ TNLA က ထိန်းချုပ်ထားသည့်မြို့နယ်များဖြစ်သည်။

အဆိုပါ တိုင်းမှူးသည် အချိန်နှင့်တပြေးညီ ပြောင်းလဲဖြစ်ပေါ်လျက်ရှိသော အခြေအနေအရပ်ရပ်အပေါ်မူတည်ကာ မိမိကိုယ်တိုင်သော်လည်းကောင်း၊ စစ်နယ်မြေမှူးများကို တာဝန်လွှဲအပ်၍လည်းကောင်း စစ်အုပ်ချုပ်ရေးအာဏာ ကို ကျင့်သုံးနိုင်သည်ဟု နစကမှ ဆိုသည်။

ထို့ပြင် ယင်းမြို့နယ်များအတွင်း၌ အုပ်ချုပ်ရေး နှင့် တရားစီရင်ရေးကိစ္စရပ်များကို ဆောင်ရွက်ရမည်ဖြစ်ပြီး နိုင်ငံတော်သစ္စာဖောက်ဖျက်ပုန်ကန်မှု၊ ရာဇသတ်ကြီးပုဒ်မ ၅၀၅၊ လူသတ်မှု၊ လူသေမှု၊ မုဒိမ်းမှု၊ လုယက်မှု၊ ဓါးပြမှု စသည့်အမှုများကို စစ်ခုံရုံးဖြင့် စစ်ဆေးသွားမည်ဖြစ်ကြောင်းလည်း သိရသည်။

အလားတူ ဖေဖော်ဝါရီ (၂၈)ရက်နေ့တွင်လည်း ရှမ်းပြည်နယ်အတွင်းရှိ မိုးမိတ် နှင့် မဘိမ်းမြို့နယ်တို့တွင် စစ်အုပ်ချုပ်ရေးကျင့်သုံးရန် မြောက်ပိုင်းတိုင်းစစ်ဌာနချုပ်တိုင်းမှူးကို နစကမှ အာဏာအပ်နှင်းခဲ့သည်။ 

လက်ရှိနစကအစိုးရလက်ထက်တွင် စစ်အုပ်ချုပ်ရေးအမိန့်ထုတ်ပြန်ထားသည့် မြို့နယ်ပေါင်းမှာ စုစုပေါင်း (၆၀)မြို့နယ်ထက်မနည်း ရှိနေပြီဖြစ်ကြောင်း သိရသည်။